من أروع القصايد في النصح

هذه من أروع القصائد في النصح للإبن وفي الحكمة للشاعر بركات الشريف رحمه الله ينصح ابنه مالك




يقول فيها:

يا مرقبٍ بالصبـح ظلّيـت اباديـك=ما واحـدٍ قبلـي خبـرتـه تعـلاك
وليت يا ذا الدهر ما اكثـر بلاويـك=الله يزودنـا السـلامة مـن أتـلاك
ياللي على العربـان عمت شكاويـك=وليت يا دهـر الخطـا ول مقـواك
واليـوم هالكـانـون غـادٍ شبابيـك=تلعـب به الأريـاح من كل شبـاك
يا مالك اسمع جابتـي يوم أوصيـك=واعرف ترى يا بوك بامرك وانهـاك
وصيـةٍ مـن والـدٍ طامـعٍ فيـك=تسبق على السـاقه لسـانه لعليـاك
أوصيك بالتقـوى عسى الله يهديـك=لهـا وتـدركـها بتوفيـق مـولاك
احفظ دبشـك اللي عن الناس مغنيـك=اللي إلـى بان الخـلل فيـك يرفـاك
واعرف ترى مكـة ولاها ابن اخيـك=لو تطلبه خمسـة دواويـن معطـاك
اجعـل دروب المرجلـة من معاليـك=وادراج سيّسـها على العـز مرقـاك
احـذر امـر ليعـات أبيـها لتاليـك=ايضا ويرخص عنـدها قدر مـأواك
أدّب ولـدك إن كان تبغيـه يشفيـك=واستسعفـه من بعـد مربـاه بـالآك
أما سمـج واستسمجـك عند شانيـك=ويفر من فعلـه صديقـك وشـرواك
وإلاّ بعـد جهلـه تـرى هو بياذيـك=لـو زعلـت أمـه لا تخليـه يـالاك
واحذر تضيع كل من هو ذخر فيـك=معروفه لا تنسـاه واوفـه العرفـاك
ترى الصنايع بين الاجـواد تشريـك=إلـى طمعـت بركزهـا لا تعـداك
واحذر سرور بغبة البحـر يرميـك=ولا عنده افلس من تجزعك وابكـاك
واوف الرجال حقوقـها قبل تعنيـك=لا تعتمـد بالعفـو فـالحـق يقفـاك
وهرج النميمة و القفا لا يجـي فيـك=واياك وعرض الغافـل اياي وايـاك
تبـدي حديـث للنـاس فيه تشكيـك=وتهيم عند الناس بالكـذب واشـراك
واذا نويـت احـذر تعلـم بطاريـك=كم واحد تبغي به العـرف واغـواك
واحذر شماتة صاحب لك مصافيـك=والى جـرا لك جـاريٍ قال لـولاك
إن اشتـهى حط الطمـع في تواليـك=لو ما لقيتـه يا فتـى الجـود يلقـاك
والضيـف قـوم لـه حيـن يلفيـك=مما تنوشه يا فتـى الجـود يمنـاك
اكرم قبالـه فانـها مـن شواديـك=وابـذل له المجهـود ما دام يعنـاك
واحذر تلاقي الضيف مقرن علابيـك=خلـه محـب لك صـديق إذا جـاك
وأوصيك زلات الصديق إن عثا فيـك=ما زال يغطاها الشعـر فاحتمـل ذاك
راعـه ولـو ما شفـت انه يراعيـك=عسـاك تكسـر نيّتـه عن معـاداك
واحذر عـدوك لو بقا بي يصافيـك=عود الجنـا واطعنـه حينـما جـاك
لا تامنـه فاطلـب مـن الله ينجيـك=ويكفيـك ربـك شــر ذولا وذولاك
وإذا حضـرت طـلايبٍ مع شرابيـك=اسـع لهم بالصلـح والـلاش يفـداك
ابـذل لهـم بالطيـب ربـك ينجيـك=لا تجضـع الميـزان مع ذا ولا ذاك
أمـا الشـهادة أدّهـا إن دعوا فيـك=بيّن عمود الدين لا عميـت اريـاك
رابـع أصيـل في زمانـك يشاكيـك=وإلى شاف خملاتك عن الناس غطاك
ثـم العـن الشيطـان ليـاه يغويـك=تـرى إن تبعتـه للشّـرابيـك وداك
واوصيك لا تشكـي علينـا بلاويـك=أنت السبب اخـذك عيـونك بيمنـاك
واعرف ترى اللي وطا الفهر واطيك=ولا أنت أعز من الجماعة هـذولاك
المسك يا راسي عن الذل واخطيـك=واحـذر تكلـم يا لسانـي حـذاراك
يا ذيب وان جتك الغنـم في مفاليـك=فاكمن إلى حيـث الـرعايا اتّعـداك
مـن أولٍ يا ذيـب تفـرس بياديـك=واليوم جا ذيبٍ عن الفـرس عـداك
يا ذيب عاهدني وأعاهدك ما رميـك=مرميك أنا يا ذيـب لو زان مرمـاك
والنفس خالف رايـها قبـل ترميـك=ترى لها الشيطـان يرمـي بالادراك
ومن بعد ذا لا تصحب النذل يعديـك=وعن صحبة الأنذال حاشاك حاشـاك
ترى العشير النذل يخلـف طواريـك=وأنا أرجي إنـك ما تجي دون آبـاك
والهقـوة انك ما تجـي دون أهاليـك=ولا ذكر عود الـورد يثمـر بتنبـاك
والحر مثلك يستحي يصحـب الديـك=وان صاحبه عاعا معاعات الاديـاك
لا تستمع قـول الطـرف يوم يلفيـك=بالكذب يقضي حاجتـه كل ما جـاك
من نـم لك نـم بك ولا فيه تشكيـك=والاَّه قــد أزرا رفيقــك وأزراك
عندك حكا فينـا وعنـدي حكا فيـك=وأصبحت كارهنـا وحنـا كرهنـاك
ما اخطاك ما اصابك ولو كان راميك=واللي يصيبك لو تتقيـت ما اخطـاك

وقد اختصرت منها الكثير فأرجو العذر منكم