،،،صنع الصين،،،خاص وحصري

يزور الفكر هاجوس المعاني قبل شوف العين
وياخذني قصيدي في طريقٍ دوم ملغومه

أحاول فيه غير النفس قشرى ترغب التمكين
وتسكن في قصورٍ من سنين الظلم مهدومة

تفاصيل الزمان اللي على وجه الفقير تبين
تهد جدار صمت الحرف وتصحيه من نومه

وضحكات الترف وبحور سيل الطيش والتخوين
خذت من قوت طفلٍ مات قبل يشوف مقسومة

يلوذ الصمت في وجه الضعيف اللي رماه البين
على صحراء التجاهل لين ضاعت باقي علومه

كتبنا بالحروف وثارت أقلام المعاني لين
بكت صفحاتنا ودموعها بالحرف مرسومة

على ذاك الطريق اللي نهاياته ماندري وين
مشينا والطريق يردنا والروس منجومة

صنعت من المعاني سيف وأثر السيف له حدين
ودخلت المعركة وسيوف بعض القوم مثلومة

نسيت ان ماضي التاريخ شوّه من هل التدوين
وبيبان الحقيقة سكّرت والنفس مظلومة

أنا مخلوق من كتلة مشاعر غير أساسي طين
وبعض اشيائي مجهولة وبعض اشيائي معلومة

أعرف الموت خاتمتي وقبرٍ فيه جيم وسين
وأعرف أن كل مخلوقٍ لايمكن يخلفه يومه

ولكن ياملذات الغرام وطعنة السكين
خذيتيني عن الواقع وليلي بانت حلومه

مشاعرنا تجارية عليها كتب صنع(الصين)
ولو كانت بختم الحب بين الناس مختومة