الى كل من له اب كبير .,!!

بسم الله الرحمن الرحيم
السلام عليكم ورحمة الله وبركاته

قصة محزنة ومعبرة عن بر الوالد مع قصيدة وشيلة لها ارجو ان يكون فيها الفائدة للجميع .
تقول القصه:-
أن كان به رجال اسمه جحيش بن مهاوش تزوج وجاب ثلاث عيال وكـــــــان
حريص على عياله بالحيل ومرت السنين والسنين وماتت أم العيال (( حرمتك
ياجحيش )) وهم صغار ،، فقام ابوهم جحيش بتربيتهم وماتزوج بعد امهم خايف انه
تكون قاسيه على عياله فكان يوكلهم وينومهم ويسهر عليهم ويداريهم مدارت الام
فكان لهم الام والابو حتى انه كان اليا طلع يوديهم عند الجيران على شان
مايستاحشون لحالهم فكان يطلع من الصبح يروح ايتقنص لهم ،، والمقسوم يجيبه
لعياله حتى انه كان يحرم نفسه من الاكل اذا كان الاكل شوي ويكتفي بشرب الماء
وينام عليه الله اكبر
ومرت السنـــــــــين والسنـــــــــين وكبرو العيال وصارو رجال وزوج العيال واحد
ورا الثاني وهو كبر انت ياجحيش وماعاد يقوا على القومه والقعده وضعف
شوفه وحيله وعقب كــــــــــــل اللي سواه لهم مالقى من عياله الا الجحود
والعقوق والعياذ بالله والسبب من حريم العيال اللي توذن من خدمة الشايب وكل
منهن تقول لرجله اطرد ابوك عننا ترا اوذانا حتى انهم قاموا يصكون الباب من
دونه فقررو العيال انهم يجدعونه بديره بعيده او بخرابه ويفتكون منه (( وخذاه
ولده حدى عياله اسمه علي قال يايبه نبي نسافر يم خوالي نسلم عليهم الشويب
صدق ومشى وهم بالطريق كل شوي يسأل ولده وين حنا به يقوله بالديره الفلانيه
الشايب يعرف الديار حافظهن بس ان شوفه ضعيف المهم كل يوم يسال الشايب
عن الديره اللي قاعد يمشون به وعقب كم يوم من سفرهم وهم بالطريق سال
الشايب ياوليدي حنا وين به ؟؟؟ قال حنا بالديره الفلانيه حول وادي سلاحيب فعرف
الشايب ان ولده يبي يرميه بالوادي فقال ياوليدي خلنا نستريح وجلسوا شوي
فقال الشايب :






قـال الـذي يـقـرا بلـيـا مكاتـيـب
ياللـي تقّـرون العمـى مـن عنـاكـم

ياعيـال ياللـي تشرفـون المراقـيـب
تريضوا لـي واقصـروا مـن خطاكـم

خوذوا كـلام جحيـش مابـه تكاذيـب
مثـل السنـد مضمـون للـي وراكـم

ياعلي وان صرتوا ضيـوف ومعازيـب
تـرا الكـلام الزيـن ملـحـة قـراكـم

المذهب المذهب تـرا المذهـب الطيـب
تـرا ردا المذهـب يـبـور بنسـاكـم


ياعـيـال ماسرحتـكـم باللواهـيـب
ياعيـال ماعمـر المـعـزب ولاكــم


ياعـلـي ماضربتـكـم بالمشاعـيـب
ولا سمعـو الجيـران لجـت بكـاكـم

مـن حبكـم ارطـب القلـب ترطـيـب
يفـز قلبـي يــوم يبـكـي حـداكـم

يامـا تمسعـرت القبايـل تقـل ذيـب
مـن خوفتـي يقصـر عليكـم عشاكـم

وياما قطعت مـن الفيـاض العباعيـب
نـدور مـن صيـد البـرايـا غـداكـم

ياعيـال هاكـم لحيتـي كلهـا شيـب
هـذا زمـان قعودنـا فــي ذراكــم

قمت اتوكـا فـوق عـوج المصاليـب
وقصّرت خطايـا يـوم طالـت خطاكـم

ردولـي القرضـه عليكـم مطالـيـب
ردولـي القرضـه جـزا مـن جزاكـم

مانـي بفاضحكـم بوسـط الاجانـيـب
بفعولكـم يــدرون كــل اقربـاكـم

خوالكـم ياعيـال هـم ماكـر الطيـب
ياعيال مدري هالردى منين جاكم ؟؟؟!!!!

مير ياعلكـم فـي حاميـات اللواهيـب
ياللي علـى الوالـد خبيـث(ن) لقاكـم

شفت الجفا والحيـد والظلـم والريـب
بضلوعـكـم لا يـسـر الله قـراكــم

ياعيـال بعتونـي بصفـر العراقـيـب
ماهـي حقيقـه !! سّـود الله قـراكـم

قصيتكـم واسـنـدت وادي سلاحـيـب
ولقيـت بالبـيـدا مدافـيـق مـاكـم

عسـى نساكـم ماتحمـل ولا تجـيـب
وتغيب شمس الصبـح ويغتـم سماكـم

اهبـوا هبيتـوا ياكـبـار الاغابـيـب
اخسـوا خسيتـوا يقطـع الله نمـاكـم

ولابد يومن عـاوي(ن) دونـي الذيـب
بالقبـر يفـرق طيبكـم مـن رداكــم

وهذه شيلتها هنا اسمعوها وادعوا الله ان يرزقنا بر والدينا .

http://www.safeshare.tv/w/WCRjRUuKsF

الف شكر على اختيار هذي القصة الله يعطيك العافية

شفت الجفا والحيـد والظلـم والريـب
بضلوعـكـم لا يـسـر الله قـراكــم

ياعيـال بعتونـي بصفـر العراقـيـب
ماهـي حقيقـه !! سّـود الله قـراكـم

قصيتكـم واسـنـدت وادي سلاحـيـب
ولقيـت بالبـيـدا مدافـيـق مـاكـم

عسـى نساكـم ماتحمـل ولا تجـيـب
وتغيب شمس الصبـح ويغتـم سماكـم

اهبـوا هبيتـوا ياكـبـار الاغابـيـب
اخسـوا خسيتـوا يقطـع الله نمـاكـم

ولابد يومن عـاوي(ن) دونـي الذيـب
بالقبـر يفـرق طيبكـم مـن رداكــم

الله .الله .الله

يعطيك العافية

ابو فهد
وجعلنا الله واياكم من البارين بوالديهم في حياتهم
وبعد موتهم

ولك تحيتي

الله يجزاك خير و نعوذ بالله من العقوق و اثمه و عاقبته ..

جزاك الله خيراً وجعله في ميزان حسناتك آمين
ورزقنا بر والدينا آحياء وآموات آمين