قصيدة للشاعر فهد الشهراني ..

أنت يلي من حكي الناس وش فيك مغبون
البشر لا ضقت منها تزيد طعونها

و لا تحاول ترضي الناس و تقول وش تبون
غايتن لو تجهد النفس تقصر دونها

و إن جلست فمجلس الزور و اللي يكذبون
لا يغرك كثرت الزاد فوق اصحونها

إن جلست فمجلس الزور تقفاك الطعون
وإن حكيت بكلمة الحق ما يرضونها

و انتبه عثرت خويك يليه الأقربون
انك تبين للأجناب و ش مضمونها

صاحبك و عيال عمك و ربعك يكرمون
قدرهم لو بعت الأشناب لجل عيونها

لو جفاهم زادهم بعد في الفزعه يجون
وقفتن يبقى صداها و لا ينسونها

خذ كلامي يا محمد و هونها تهون
كم تجرعت المرارة و ذقت اغبونها

التجارب اشعرتني بما لا يشعرون
و المصايب درستني و انا ممنونها

لين صرت اعلم الناس كيف يرتبون
الجروح و كيف الآلام ما يسلونها

عيش جرحك و أنت راضي تلذذ بالشجون
النفوس احيان تحتاج عمق شجونها

الصباح يعلم الناس كيف يقدرون
ما فضح ستر الليالي و من يسرونها

و الليالي لو فضح سترها نور العيون
كان شفنا عاقل الناس من مجنونها

آه يا مقسى نجاحي على اللي يكرهون
و آه يا محلى بيوتي على مفتونها

اييه يا كثر المشاريه و اللي يشرهون
و ناس لا قلنا قصيده تقوم قرونها

ما علينا دام في الناس ناسن يعشقون
و القصيده قبل لا اقولها يقرونها

ما زعلنا و النهايات للي ياصلون
خل ناسن من ورانا تسن سنونها

إن حكيت اعلم الناس ما لا يعلمون
و إن كتبت أ لخص القول في مضمونها

و ان بغيت انزه النفس عما يصفون
الثقة تطغى على شكلها و ظنونها

الشيوخ اليا تحاكوا بكلمة ينثنون
كلمة و عجزوا ملايين ما يثنونها

و انا شيخن من شيوخ الشعر لا يجحدون
و الفعايل تبطي الناس ما يمحونها

كل ما عديت رجم المعالي يزعلون
الله يكفاني غثى الناس و شر عيونها

و لا تحاول ترضي الناس وتقول وش تبون
غايتن لو تجهد النفس تقصر دونها



وسلامتكم

صح لسان شاعرها
وسلمت ايادي ناقلها..
رائعه جدآ ..وجميع قصائد الشهراني رائعه ..
دمت بخير

سلمت يمناك على جمال الذائقه
وصح لسان شاعرها
لك شكري وتقديري ..

أبيات رائعه
صح لسان شاعرها
سلمت يداك
الف شكر لك