قصة قبل النوم

كل مره تغيب تتركني معاي
واجلس بظل انتظاري لك
افتشني عليك...

أنت يا اللي تبتكر للحزن فيني الف ناي
ليه تتعمد غياباتك؟؟وتتركني معاي

آآآآآه لو تدري بأني حيل تتعبني غياباتك
ويذبحني غناي
يا حدود الضي
وإطراق الصبر داخل حشاي!!

أنت تدري شلون تتركني معاي؟؟!
اتوحد كل ما اذكر من تفاصيلك
واطرز غيبتك بنجوم هذا الليل
وإتشكل سماي..

آآآه يا كثرك معاي
حيل احسك تبتدى فيني
وتتشكل وتتشكل بزوغ الغيم
او شمس إتقاطر من بلل
او صوت ماي..

انت تربكني غياباتك
احس اني وطن فارغ من احبابه
فرح طوح بيده للقلوب وسكر ابوابه

تصور بس بغيابك
اوقف لك على مفرق حزن روح الغياب
واشعل اعتابه

تروح انته وتخليني
مثل عصفور بيت بليل برد
استوطن الغابه

أنت تربكني بغيابك
حيل تربكني بغيابك
توزعني على كل البيوت الغافية
قصة لنوم اطفال
توزعني مثل حزن الغريب وبحه الموال
ترتبني مثل صمت الحجر
او وقفه التمثال
ويصلبني غيابك بالفراغ وبالصبر احتال

تدري انت شلون اشعر غيبتك؟؟
مرات احسك
مثل بسمه شفتين اتغربن
عن قلب عاشق
مثل اخر زفرتين
من الهوى بضلوع غارق
كان وده يحتفظ فيهم لصدره
وخذله هالبحر

أنت تدري شلون ينحرني الغياب؟؟؟
وكيف يتمدد بروحي؟؟
كيف يتلمس حدود الشفتين وكل بوحي؟؟

مو جروحي كانت متعبه في غيبتك
لا والله إلا كل روحي
وتدى انت والغياب اصبحتوا الإثنين فيني

بدر صفوق


سرقتني الكلمات إلى عالم غريب احببت ان انقلها لكم ..

اتمني اختياري يعجبكم...

الوفا