آخــر كـتـابـاتي

البارحة والشمس ذلت للمغيب=والليل وشح بالظلام اقطارها
والبدر من بعد البطا عود قريب=هيض هجوسي واستباح اسرارها
قمت آتأمل دورة الدهر العجيب=سبحانه اللي كاتبٍ مدوارها
يا بحرنا اللي تشفي جروح الحبيب=واشواق هاجوسه تطفي نارها
يا النهر يا البستان يا الروض الخصيب=يا الطير يا اهل الطير يا صقارها
يا الشيح يا الريحان يا رمثٍ وطيب=يا وردة الروضة وكل ازهارها
يا فكرة الكاتب معا صوت الخطيب=يا مهجة الشاعر وبوح اشعارها
يا بندق المغوار في اليوم العصيب=يا مهرة الفارس على مضمارها
يا العابر اللي عاش في الدنيا غريب=يبغى ربوعه واهلها وديارها
يا الشايب اللي يسهده صوت النحيب=تبكي عجوزه عجلوا باصغارها
يا الهايم اللي ينهشه نمرٍ وذيب=وسط الصحاري والظلام استارها
يا المذنب اللي ذنبه الحق المصيب=ذاق الظلايم وارتوى بامرارها
يا التاجر اللي سلعته جودٍ وطيب=وارباح سوقه مثل عج غبارها
الصبر مفتاح االفرج والله قريب=يسمع دعا الداعي بجوف اسحارها
باكر تعود الشمس بالنور المهيب=اتقطع استار الظلام انوارها
والصبح يهتك ظلمة الليل الكئيب=وتغرد الاطيار فوق اشجارها
والدهر ما تدري معه شاللي يجيب=يا كثر حزات الزمن واسرارها
وان كان طول ليلكم وازرى اللبيب=والشمس ما طقتوا بكثر اعذارها
لابد شمس الحق تطلع مالمغيب=يوم الاراضي تعترف باخبارها
يوم الصغيّر يكتسي تاج المشيب=في يومها تقطف جميل اثمارها
الجرح غاير في الحشا عله يطيب=يا قربه الغطاس من محارها