قالت يا حليوه..الحقنى عشان تعرف بيتى

السلام عليكم..كيفكم يا ربعى

ذيك الأيام..الله على ذيك الأيام

كان معيظ يدرس بصف الأول ثانوى ..بمدرسه بعيده عن البيت وعشان الحاله الماديه السيئه كان
يروح و يرجع رجليه و الغالبيه كانو كذا بس وضعه كان الأسوء كان يسكن مع ابوه و امه واخوه الكبير
وثلاث بنات فى غرفتين عباره عن صندقه على سطح عماره حتى الحمام ونتو بكرامه فى طرف السطح
من ناحيه ثانيه المهم ...لكم الخيال مره مطر مره شمس وكل يوم حاله..


يمر معيظ يومياً من طريق فيه مدرسة بنات عشان يختصر الطريق ....وفى ذاك اليوم الغايم وحده تمشى
قدامه وتتميلح ..واعطته سهم من السهام وقالت ياحليوه اذا تبغى تشوفنى بعد العصر تعال وراي واعرف بيتى
وكانت قمة الغزل ذيك الأيام يجى الواحد ويشوف طاقة البيت و البنت اذا كانت مخربتها تبين نفسها
ولا طرف منها من بين الستاير ويعنى بالغلط كمان.....المهم صاحبنا معيظ بغى ينهبل..اول مره اصلاً
احد يقله يا حلو واول مره وحده تكلمه وهو ماله فى هالحركات ....مشى وراها وعرف البيت...وكمل على بيته
لخبطت عليه حساباته و افكاره وعلى قولة محمد عبده..(لفنى مثل السحايب و المزون فى عيونى برق و
بقلبى رعد)
كوى ثوبه الرجال واول مانتهت صلاة العصر حضر فى حارتها...طبعاً القصه فى الطايف..
-والطايف احلى- ابن امه يدخل حاره ماهى حارته على طول مضاربه ودم للركب....فشاف معيظ مكتب
عقار جنب بيتها وهوى دخله وسلم و جلس قريب من الباب...كان فيه اثنين صاحب المكتب وواحد معاه منكبين على خريطه ويتكلمون على ارض و يتفاصلون فى سعرها..وراعى المكتب يقول لو اعطاك اياها ب250 الف انت الربحان.. فى هذى الأثناء معيظ يطالع فى بيت البنت والطيق ويتلفت لا احد يكفشه...شويه وخرج الرجال
وقال راعى المكتب وش عندك يا ورع...طبعاً اثرت فى نفسه ذا الكلمه ...ورد معيظ انا رجال مانى ورع..طيب
يارجال وش تبغى ..قال ابغى اشترى الأرض الى تتكلمون عليها من شويه...قال من يبغاها قال انا ..وابغاك تورينى ايها...طبعاً على مضض تلحلح راعى المكتب وقفل المحل وراح يورى معيظ الأرض الى كانت
فى نفس الحاره ورى بيت البنت ...وشاف الأرض و اعجب بها ..وهو من جنبها لا يفهم فى العقار ولا شى اولى ثانوى يا هوه..المهم قال بكم تبيعها ..على باله خضار..قال راعى المكتب صاحبها يبغى فيها 280 الف..قال معيظ لالا ..مستحيل كلم صاحبها اذا يبيعها ب 250 انا شراى و فلوسى جاهزه.....قال راعى المكتب
طيب جيب عربونك بعد المغرب وبزهم راعيها و نشوف وش يقول......وافترقوا على كذا

بعد صلاة المغرب ...كان معيظ محضر فى المكتب و معاه 5000 ريال عربون ....و تفاجئ راعى المكتب وقال ذحين ابزهم راعيها...وبعد فتره جا راعيها وقابل معيظ وقاله انت الى بتشترى قاله ايه انا و هذا عربونى
وكان صاحب الأرض شهرى وانبسط من مرجلة معيظ رغم سنه الصغير ....وقال طيب ب250 وتوكلنا على
الله ...انبسط معيظ وقال عندى طلب ..قال الشهرى وش عندك ..قال ابى اعطيك كامل المبلغ بعد شهر بالظبط
وارجوك لا ترد طلبى ..قاله تم...

خلونى اقولكم شى هنا
يوم من الأيام فى سنه خامسه ابتدائى كان معيظ يتفرج على بباى(فلم الكرتون)...وكان منسدح على ظهره
ورجوله على دولاب التلفزيون يتابع ...دخل ابوه وبكل قسوه ركل رجوله بغى يطيره ..قم شف لك شغله
وساعدنا بلا هذ التسدح انت فاشل انت يخطيك و يرضيك ومن هذا الكلام......طبعاً من ذاك اليوم الى اليوم هذا
وطول السنين ماقد اخذ معيظ من ابوه ريال واحد واعتمد على نفسه...طبعاً خرج من البيت وراح عند جارهم
باسمح واشتغل فى الدكان معاه واعجب بمعيظ وامانته ...طبعاً الحاره حقتهم اغلب الى فيها حضارم وافضل
بمراحل من معيظ واى اسره سعوديه فى ذالك الحى ..تنقل معيظ من محل الى محل و من تاجر الى ثانى
لدرجة فتره من الفترات كان يخرج من المدرسه يشتغل فى شغله الى العصر وبعد العصر مكان ثانى
وبعد المغرب مكان ثالث .....طبعاً فى المدرسه من المتفوقين دائماً
فكان معيظ يساعد اهله و يحط الباقى فى صندوق عند فراشه

......
نعود للأرض..
لما تواعد معيظ مع راعى المكتب ...رجع للصندوق واخذ 5000 ريال وكان فى الصندوق حوالى
36 الف تحويشة سنين
وسوو عقد مبايعه ....ومن وقتها رجع معيظ لخاله الى كان بمثابة الأخ و الصديق و الأب
وقاله على الأرض ووراه العقد...وقاله سلفنى انا عندى 30 وخل الموضوع سوكيتى
واعطاه 70 وكملت معاه 100وراح لباسمح ووراه العقد وقاله باقى 150 عطنى الى تقدر وبردها
لك فى 10سنين واعطاه 50 الف ....وراح لكل التجار الى يشتغل معاهم واخذ من هذا 10 ومن
هذ 20 و من هذا 12 وزى كذا حتى كمل المبلغ 250 الف فى نص المده اسبوعين بس....ورجع
معيظ لمكتب العقار وتواعدو فى المحكمه اليوم الثانى بعد الظهر ...

فى المحكمه طلبوا التابعيه حقة معيظ...وقالهم اية تابعيه ما عندى ايش دخل التابعيه فى الأرض
قالوا لازم ماتتم اى بيعه الا كذا..قالهم طيب...ورجع معيظ لخاله ...الى ساعده فى الأحوال وطلع له
التابعيه فى يوم واحد ....وتواعد مع الشهرى وراعى المكتب اليوم الثانى وراحوا المحكمه ..واخيراً
افرغوا الأرض بسم معيظ.....ونشب راعى المكتب يبغى الدلاله...وبعد جهداً جهيد رضى ب1000
ريال وزيد 500 الأسبوع هذا و 500 الأسبوع الجاى.

طبعاً بعد ما اخذ الصك معيظ كل ما سنحت الفرصه اخذ الفرشه وفرشها فى وسط الأرض..وتربع
فيها ...ارضى ملكى حلالى.

..............

اذا عجبتكم القصه كملتها فى وقت ثانى.....

هههههههههههههههههههههههههههههههههههههههههههههههههه هههههههههههههههههههه

ماانت صاحي ياهووووه ..

اجل ملكي حلالي ههههههههههههههههههههههههههههههههههههه

بالله كمل ولاتقعد تسحب فينا ههههههههههههههه

السفير اهلين وسهلين

ذكرتني بواحدن كوذيه دخل محل ماركه خونفشاريه نسيت مذاهي
المهم اخذ خمس كابات وعاد وده يحاسب بس باقي يبغا يختار واحده منها والواحده بذاك الحساب
فقال كوذيه الا وراه بنتين ينتظرون دورهم فاستحى منهم وده ييود انه في حياتي فحاسب على الخمسه وباقي حرها في قلبه الى ذلحين

اهلين ريااااااانة العووود

كثير الى يفغرون ..بس معيظ فغرته غيرت حياته للأبد
تابعى القصه ...بس قل حيلى ذلحين.

نكمل شويه لعيون السفير و ريانه العود و المستمعين

وصلنا فين......
قلنا الرجال صار يحضر فى الأرض ...ومعاه الصك يبغى يحطه فعيون الى يقول تلت التلاته كم.....وكل فتره يمر عليه
راعى شاص يتلفت عليه ويمشى .....وفى يوم من الأيام صاده معيظ ....وش عندك هنا هاااه....قال يا ابنى انت ايش
عندك هنا ...كل ما امر القاك هكذا

قاله انا صاحب الأرض وهذا صكى وانا حر....وكان راعى الشاص شايب يمنى اسمه على عزيز..قاله اى خدمه يبنى
قاله معيظ لا
واستمر يمر على عزيز ...ويسلم ...ويروح ..من بعيد لا بعيد...ومره جا عم عزيز وقا اسمع يا معيظ ليش ما تشتها
(تشد العماره)..قاله ياعم ماعندى ولا هلله ....قاله اسمع يا وليط(وليـــد) انا مقاول و قد أمرت نص الحاره الى باتشوف
توكل على الله وانا اشتها لك ...وكل ما جا معك زلط (فلوس) نكمل واذا شحت نوقف وهكذا و بصبر عليك .......
عدل جلسته معيظ ....وقال شتها يالله شتها من بكره ....قاله يبنى لازم نسوى خرايط ولا معك تشاهزه(جاهزه)
قال معيظ ..اية خرايط .....قام عم عزيز و شرح له من الألف للياء ..ومن بكره ركب معيظ مع على عزيز و راح به مكتب
هندسى يعرفه وسوو الخرايط ب 6000 ريال كانت متوفره مع معيظ ....وكان عم عزيز يعدل و يزيد و ينقص حتى
وافق على رسمها النهائى ...ومعيظ عضو شرف فى الموضوع لا ناقه و لا جمل (طبعاً الخرايط هذى بعدين بنا معيظ بها 7 عماير قولوا ما شاء الله).

...وبدا ابو يمن فى الأرض يحفر...



بريـــــــــــــــك لو سمحتو هاف ابريك هاف اكتكات

خلصت الحكايه؟

القصه مازالت مستمره ...نكمل


بدا عم عزيز فى الحفر و البنا ...شويه شويه و معيظ يعطيه شهر وثلاثه لا و قبل الحج تسلف معيظ 50 من خاله
و 50 من با قادر وزاد عليها تحويشة ذيك السنه واعطاها عم عزيز بعد صلاة الفجر وبغى يطير فرحه....
المهم تفاجأ معيظ فى نفس اليوم قبل العصر...بعم عزيز داق بلأحرام ومحمل الشاص زيود ...يشتو يحجو!!

وقف عم عزيز عند المحل الى شغال فيه معيظ ..وقدام الزباين وامام دهشة الغاضبه ...حلف بأعلى صوت
انا نفسى احج ووالله ما اخونك وهذى رقبتى وامام الكل انى اذا رجعت اشتها من كيسى حتى اخلصها عظم
واشهدو يا جماعه...
ما كان من معيظ الا انه وافق....وفعلاً رجع من الحج وبدا بهمه وعزم قد ما قدر....ما جاء الحج الثانى الا
و العماره كامله عظم .......فى الوقت هذا خلص معيظ الثانويه وكان جهده فى العمل مضاعف...

قال يا عم عزيز ....كم يبغالنا حتى نخلصها كامله؟...قال التشطيب يبنى يكلف اكثر من العظم ...بس اشير
عليك واساعدك نشطب الشقتين الى فوق...عشان تتأجر وتنقط لنا....وطبعاً انبسط معيظ مافيه الا كذا...
وبدا عم عزيز فى تشطيبها عشان يخلصها فى ريب و رينب و الشهر ذا ينب...واما معيظ نزل جده من الماقفه
وقدم على الطب وقالو له ...انتهى التقديم ورجع حزين ...وسمع ان القبول مازال مستمر فى الرياض وركب
الطياره لأول مره الى الرياض عشان يلحق ...وللأسف مالقى الا هندسه...توكل على الله و دخلها يدرس و
يشتغل انتهى الترم الأول ورجع لقى الشقتين زى الى يتمنى ...والعماره نظيفه وعليها بيبان حديد فخمه
انبسط مره ...واعطاه عم عزيز المفاتيح ..وقاله متى تيسر لك وفنى ....طبعاً معيظ اعطاه الى حوشه فى الرياض
ووعده انه يوفيه دينه قبل اى احد

ايـــــــه الدنيا باقى فيها خير و الحمدلله

رجع معيظ ليلة رمضان وقال لأبوه ....يبويه ابغاك تروح معى مشوار ونرجع؟...وين!!؟...امش معى وبقلك
نزل معيظ و ابوه الشارع ...وأجر تكس وركبو( مين يركب تكسي ذيك الأيام) ومشو لاعند العماره..وقال لتكسى
لا تروح...ونزل وطلع المفاتيح و فتح الباب ...وذهل ابو معيظ...وصاح عمارة من ذى؟ ... قال معيظ تعال تعال فوق
وبقولك..فتح الشقه الأولى ماشاءالله تبارك الله ...وعاد السؤال منهى له ياولد؟؟ لى يبويه لى عمارتى ..من فين لك
تسلفت جزء وساعدنى خالى و فلان و علان و علان

خرج الأبو مسرع و نزل وراه معيظ و يقفل ...ووصلو البيت ..واول ما دخل السطح اغمى على معيظ

فى آخر الليل فاق معيظ و اخته الى زواجها فى العيد تبكى عند راسه والثنتين الثانيات و امه ...اشبكم اش فيه؟

طبعاً تدارك معيظ الألم ...اول مادخل السطح رنه ابوه بخشبه على راسه ودمان وراسه ملفوف وحاله

قالت اخته الكبيره ايش سويت ابويه يقول انك سودت وجهه و ضيعت سمعتنا..... قالهم معيظ سالفة العماره
واسألوا خالى كمان و عشان تتأكدين روحى شوفى علبة النيدو الى عند ملابسى كل من دينى كتبت اسمه
والمبلغ الى له...ونا رحت ابغى افرحه وصراحه نبغى ننقل من ذا العيشه ونسكن هناك.

راح اخو معيظ وزهم خاله...و جا حكى الحكايه وان معيظ طلب انها تبقى سر و تسحر معاهم
...وطبعاً وهم على السحور قال الأبو خلو معيظ يجى يتسحر!! كان فى طرف السطح ولا يجرء
يدخل من غير اذن ابوه...و الأذن عباره عن عفو شامل مؤقت ينظر فى حال المتهم و يؤخذ
عليه زيادة ادله تثبت مانسب اليه

...........

فى اليوم الثانى بعد ما افطرو اول فطور فى رمضان...

اقول...اكمل بعدين والى يدخل الموضوع اقلها يسلم مو رد السلام واجب!!

راجعت ما كتبت..مليان اخطاء فى الأملاء بعضها للهجه وبعضها خطاء غير مقصود
الى يقراء يعدلها فى مخه
قل حيلى

وصلوا على الحبيب ...

معك معك معك معك

افتكو لحي البو

خخخخخخخخخخخ
استغفرى

وحياكم

هههههههههههههههههههههههههههههههههههههههههههههههههه ههههههههههههههه

قرع مايشين يامعيض
ماعاد ورى رأسه رأسه ذلحين
غير كأنه نسي من البنيه وعاد قلبه بالعقار
ولا هو باااقي يتبحلق في الطاقه في الرايح والجاي خخخخخخخ

الله يستر عليك يامعيض
وصدقني إن فيه الف معيض
لكن تلاقي من يكسر طموحاتهم
ويقلل من هممهم وهذا سبب
تعاسة الكثييييييييرين ..

لي عوده بعودة معيض والأحداث الدراماتيكيه ....

اهلاً بالجميع ...
وحياك ابو مانع..معيظ وليس معيض يسلم عليك ويقول
اعذرونى فى الهوى يهل الملام و السبب نظره وربى قد بلانى بالسهام

........

انا ما احب التعليق و المماطله لكن اهم الشى الرواقه....اروق فى الخامس
واكمل القصه..