{--{ تذكرني النسمه }--}

أنا والله إني واقعٍ في الهوى يا نــــاس = وقلب الهواوي صعب تدرون عن ســرّه
ودمعة عيوني يوم طاحت على القرطاس = دليل الهوى اللي داخلي زايدٍ حــــرّه
تذكرني النسمه إذا هبهب النســــــاس = بديرة حبيب القلب ذا عالي قــــــدّره
الى من تكلّم ترّبس القلب له تربـــــاس = وتشخصّ عيوني كن في طرفها عبـــّره
عليه اللّباس الزين ماهوب كُلّ لبــــاس = ولا يعشق المكياج والكحل والحمــــّره
ونظرة عيونه تسحر العاقل الحســــّاس = وذيك الشفاة اللي تشابه لها الجمـــّره
وبيض الثنايا كنّها لؤل ولاّ ألــمـــــاس = وطعم العسل في الرّيق ولاّ تقول تمـــّره
فسبحان من ميّز جماله على الأجنــاس = جمالٍ طبيعي والبشر كُلّها بـــــــأمّره
وأنا يوم حبّيته بدأ حبُّه بمقيـــــــــاس = أقيس العلوم اللي بها الحلو والمـــــرّه
محبّه على وضح النقى شامله نومـــاس = وحبٍ بلا نوماس ما أشيد به مـــــــرّه
ومن لا يحبّ ونيّته خير جاه البــــأس = يعيش النّكد حتى يوارى الى قبـــــــّره
وعند الحقيقه من يدينه شربت الكـآس = ومن بعدها وأنا على أمره وفي أســـــّره
إذا غاب عن عيني يراودني الهوجـاس= ولكن لامن جاء وسلم عليه أشــــــّره
أقول ليش تتركني لوحدي وأنا محتاس = أفكر متى ترجع من اليوم الى بكــــّـره
وصدقني إنك لي علاج البدن والــرآس = ولمسة كفوفك تذهب الهم والحســـــّره
وتبقى لي المطلب وحبك متين الساس = وغيرك بقلبي ما يلاقي مغزّ أبـــــــّـره