((((((((((( الـمـرجـلـه عـادتـك ))))))))))

بسم الله الرحمن الرحيم

أخواني أعضاء وزوّار هذا المنتدى الشامخ أطرح بين أيديكم هذه المراسلة التي جرت
بيني وبين الشاعر / دلمخ بن مشعي السبيعي وهي بعنوان ((( الـمـرجـلـه عـادتـك )))
أطرحها هنا للتواصل وأعتذر عن طول الغياب يا صبيان بني عمرو مقر الجود والكرم

مليون مبروك يا دلمخ ومـا شـاء الله=على الذي جيتبه مـع وقـت الآذانـي
جبْته من العاصمة يـا حـي ذا الطلّـه=فكسار ما فيه مثلـه فـي البلـد ثانـي
فكسـار مَـنْ مرّبُـه لابُــد يفطـلّـه=جديد مـن شركتـه والصُنـع يابانـي
تصميـم كُفّـار لا مذهـب ولا مـلّـه=أمصممينـه تـرى عُبّـاد الأوثـانـي
على الطـراز الحديـث ومـن وكيللّـه=وكيله البازعـي مـن وسـط عُمانـي
أنا أشهد أنك على الفكسار كفـو ٍ ألّـه=يليق وتليـق بـه يـا طيـر حورانـي
المرجلـه عادتـك والطـيـب تبـذلّـه=جهدك ومالك ترى مـا هـوب يخفانـي
واليـوم جهـزْ لنـا الفكسـار بنتِـلّـه=صوب الغظي صاحبي مدعوج الأعيانـي
عند الغظي نشرب الفنجـال مـن دلّـه=من دلـة أصويحبـي مانيـب روْيانـي
بالهيـل والزعـفـران أدّاوي العـلّـه=يا زيـن فنجالهـا لا جيـت شفقانـي
الصاحب اللـي تـرى بالحيـل شفقلّـه=شفقٍ لشوفـه لكـن الوقـت مازانـي
وقتي صعيـب عَلـيْ وسيفـه أيسلّـه=في كل يوم يسـل السيـف شامـا نـي
وأزريت أقـاوم همـوم جـات منهلّـه=غداء لها في الحشـا تسعيـن ميدانـي
الصاحب اللـي معاليـق الحشـا تلّـه=تلّت غُروبٍ علـى المحّـال والسانـي
تلـه ولا نيـب داري كيـف بوصلّـه=من دونها يا بن مشعي كـل شيطانـي
أنا أشهد أنـه خليـل لـي وأنـا خِلّـه=لكـن عيّـو عليهـا أطـوال الإيمانـي
عيّـو وقالـوا تـرى منتـب قريبلّـه=ما عاد نبغـا نشوفـك عندنـا عانـي
وحلفت ما مـر بيـت الزيـن وازلّـه=لو كان من دونها با شـوف عُزرانـي
دامـه معـي صـادق والقلـب محتلّـه=صادق ومخلص معي ما هـوب خوّانـي
والموت لازم يجي الرجـال فـي حلّـه=وآجالنـا بِيـد عالـم يـوم الإنسانـي
أنت الخوي والردي مـا نـي خويلّـه=خله علـى موتـره ويـروح حرمانـي
خلـه يـروّح عسـا يمنـاه منشـلّـه=ما هوب ضاري بفعل الطيـب تربانـي
لا جاء لزومك ليهو رايح مـع الشلّـه=ويقول أنـا مواعـد أفـلان وأفلانـي
الـلآش مـا ينفعـك لـوك رفيقـلّـه=ما هوب ينفع عسـاه أفـداك كذبانـي
والا أنت قرمٍ طريق الطيـب تنـد لّـه=ساسك من أهل الوفاء اللي يقظي الشاني
واختامها المسـك والعنبـر مـع فُلّـه=مـن شاعٍـر ينظـم أبيوتـه بِمِيزانـي

وهذا رد الشاعر دلمخ بن مشعي السبيعي

أهلاً هـلا يالحميـدي والشعـر كلـه=أعداد ما هل مـزن الصيـف ودانـي
يا من حميد السجايـا عنـده أجبلـه=زيّنت خيل القصيد بسـرج وعنانـي
أفز للطيّب اللـي مثلـك أرضًـا لـه=وارخص على شانه الغالي ليا جانـي
والله لو آطا برجلينـي علـى الملـه=وأغضب على شانك الأ قصين والداني
يا لازمك لو يطول الـدرب لا صلـه=حشمه وخدمه وما جـوبٍ وعرفانـي
يمناي ما ني مضريهـا علـى الذلـه=سلم على عصر أبوي وعصر جدانـي
أركب على الباب الأيمن والردي خلـه=ما هو خويّي ولا أفرح به ليـا جانـي
لا أحترّت الشمس قام يـدور الظلـه=وليـا بـدا لازمـي قفـا وخـلانـي
نبي نسيّر ومحبـو بـك نـدور لـه=ما عندنا فـي كـلام فـلان وفلانـي
والعود الأشهب لعل المـوت يشتلـه=نرضيه بالحال كـان العـود طمعانـي
ما عندنا في الثمـن كثـره ولا قلـه=مـادام عـذره يـدوّر زود الأثمانـي
وان كـا نهـا بالعنـاد نـرد للسلـه=الحمـد لله مـا حنـا بــذ لا نــي
أمـا لقينـاه حـول البيـت والحلـه=وألا لقينـاه فـي الميعـاد ولهـانـي
وليا فرش لك لطيف الروح من زلـه=في ساعة راح فيهـا الهـم نسيانـي
تصبـح شرايينـك اليبـاس مبتـلـه=وترْوي ضماك القديم بستر واحساني
يا زين حذف الحطب في فيّة الصلـه=والروض فيه النبات أشكال والوانـي
وخوة خـويٍ ليـا خـا ويتـه يدلـه=يضحك حجاجه ويبعد عنك الأحزانـي
يا ما حـلا صبّـت الفنجـال لا زلـه=يجلى عمس خاطرك لا صرت عمساني
والله أنْ مسيرك تحت نو ٍ مرفـاً لـه=في مرقـم كـل روضٍ فيـه مليانـي
آلا انّه أطيـب مـن المقعـاد بالفلـه=لو كـان جدرانهـا لؤلـؤ ومرجانـي
هذي طـراة الفتـا مـادام بـاق ٍلـه=عمـر يعيشـه وعافيـةٍ بالأبـدانـي
سج القدم في فيافي الأرض أحسن له=من مقعد بيـن نسـوانٍ وور عانـي
وعرائس الشعر من غنا لهن جن لـه=يعزف على ذوقهنه عـذب الالحانـي
اترك دقـا قـه وادوّر واتعـب لجِلـه=ما نركب الموج غير أنـدوّر الدانـي
أن طاع ولا فنـا مـا نيـب ربٍ لـه=هذا اجتهادي وهـذي قُـدرة لسانـي
واسوق عذري عن التقصير والخلـه=الكامل الله وطبـع النـاس نقصانـي
وصلاة ربي على الهادي رسـول الله=ما لاح برق ٍوهلـت غُـر الامزانـي

أولاً الله يحييك يالحميدي السبيعي تحية المطر
وثانياً أحيي فيك شاعريتك الجميله
الله يعطيك العافيه على هذه القصيد الرائعه ورد جميل من صاحبك دلمخ السبيعي

والله يحييك

الحميدي
مجرد تواجدك بيننا شرف
وتبقى كل احاسيسك ومشاعرك لها ذائقه
صح لسانك انت ودلمخ ولاهنتو والله

اصدق الود لكم ولاعدمناكم

اخوووك

المشاركة الأصلية كتبت بواسطة رابي الجنوب

أولاً الله يحييك يالحميدي السبيعي تحية المطر
وثانياً أحيي فيك شاعريتك الجميله
الله يعطيك العافيه على هذه القصيد الرائعه ورد جميل من صاحبك دلمخ السبيعي

والله يحييك

رابي الجنوب الله يبقيك وصح بدنك ولاهنت
على مرورك العطر وتقبل تحياتي وتقديري

المشاركة الأصلية كتبت بواسطة المسكت

الحميدي
مجرد تواجدك بيننا شرف
وتبقى كل احاسيسك ومشاعرك لها ذائقه
صح لسانك انت ودلمخ ولاهنتو والله

اصدق الود لكم ولاعدمناكم

اخوووك

الاخ الغالي المسكت الشرف لي طال عمرك . صح
بدنك ولاهنت على كلامك الجزل ومرورك العطر