يا شعراء ... شاركونا

الله على وقتٍ مضى وقت لجداد
وقت الحميه والرجال الوفيه

وقتٍ مضى مافيه مالٍ ولازاد
وقتٍ يعرف الرجل منهو خويه

وقتٍ به البدوان رحل وشداد
يازين ذاك الوقت وقت الحميه

وقتٍ به العربان تعرف بلجواد
تكرم ضيوفٍ باللقاء والقفيه

وأن سيروا على الجار دله وبراد
قلوبهم بيضاء ولاهي رديه

واذا انتخى فيهم طريد وشراد
برقابهم يجلون عنه الاذيه

رجّـالهم يوم الوغى سيف جلاد
وفي الرخا مثل الورود الشذيه

واذا لفاه الضيف للنار وقاد
واذا سطى العيال فناره لظيه

قوم ن عزاز النفس وكرام وانداد
ويزينهم طيب النفوس الزكيه

للي خلقهم خاضعين وعبّـاد
ما يقربون من الردى والخطيه

في الليل تلقاهم ركوع ن وسجاد
وفي الضحى ما بين ذكر وعطيه

إيمانهم بالله في العسر يزداد
ولأميرهم تلقاهم أوفى رعية

وحق القرابه مايبي حجز ميعاد
وأخر زعلهم بين صبح وعشيه

اذا افرحوا فرحوا جماعات وافراد
واذا حزن شخص صاحو سويه

ياملٍ قلبٍ من عنا الوقت وقاد
من ماتشوف العين ياصاحبية

كم لي وعيني ماهتنت نوم ورقاد
اتذكر ايام الجدود الأبيه

واليوم صرنا بين جافي وجحاد
راحوا هل الناموس واهل الحميه

راحوا هل الخوة وجونا هل الزاد
اما عطيته شي منت بخويه

يا كثرهم لا جيت في جال الاعداد
واللي يحبونك تراهم شويه

ويا زين بسمتهم مع ايام الاعياد
ووقت الشدايد ما تشاف الثنيه

لا واعذابي من شباب امة الضاد
راحت سلوم اجدادهم دون جيه

لا يفرحونك في معاداة الاوغاد
ولا يفرحونك لا دعت كل هيّـه

شف حالنا من بعد غزه وبغداد
وشجاعنا يقتل نهار الضحيه

وشبابنا مابين آه وتنهاد
ضاعت حياته بين هند وسميه

وعدونا يختار فينا ويصطاد
وحنا نصفق له .. نبي نصير زيه