الحمد لله على سلامة العضو المميز .. بعد الوعد ..

احبابي
بداية ادعو الله سبحانه وتعالى ان يجزاكم خير الجزاء وان لا يريكم بأس
ووالله لقد كان لكلماتكم بالغ الاثر في نفسي وفي جسدي المريض
ولا انسى ان اشكر اخي الحب الحب على هذه البادرة التي تنظم الى ركب فضائل هذا
الرجل الشهم الذي يأبى الا ان يكون سابق وسباق للخير وفعله

وعن حالتي انا ولله الحمد في حال افضل من ذي قبل
فقد دامت معاناتي مع الالام حوالي سنتين ذقت خلالها الامرين
وقد زرت خلالها الكثير والكثير من العيادات والمستشيفات وبلعت كميات تكفي لبناء هرم من الادوية
و في كل مرة يكون التشخيص هو ذاته الذي سبق وان اخبرت به من الطبيب السابق
الى ان كان الفرج على يد احد الاطباء السعوديون الذي استطاع بفضل من الله التوصل الى التشخيص الصحيح ومن جلسة واحدة, واتضح انها حصوة في المرارة ادت الى التهابات ومغص مراري مزمن.

بعدها تقرر اجراء عملية اخراج المرارة بحصوتها وقد كان ذلك يوم الثلاثاء الماضي وقد تمت العملية بنجاح ولله الحمد

واسمحو لي في الاسطر القادمة ان اتكلم عن بعض الامور المتعلقة بالموضوع وبعيدا عن الفصحى

قبل العملية قال لي الكثير من الاصحاب ان العملية سهلة وما عليك واليوم الثاني تقوم زي الحصان وان المنظار بس فتحة بسيطة في البطن وما تحس بشي, انا اخذت الموضوع على هذا الاساس وقلت دام الامور كذا ما فيه مشكلة ادخل اليوم وبكرة اطلع حتى اني قلت للزملاء نهاية دوام يوم الاثنين: يالله نراكم يوم السبت ان شاء الله, على بالي ان الموضوع بهالبساطة, والله ويوم جيت يوم الثلاثاء الا الموضوع ما هو اللي على البال والا شكل الشغله من جد والعالم مشتطين تحاليل ودم وكلام كثير, وذاك الليل قالوا بعد الساعة 12 توقف عن الاكل والشرب وحطوا في كفي ابره الله لا يوريكم شفت فيها لحالها العذاب, المهم نمت نومه ما هي اللي على البال وفي الصباح جو لي وقالوا فصخ كل ملابسك والبس ذا ( اللبس الاخضر ), وعلى مضض نفذت الامر ولبست الاخضر, بعد شوي جوني مجموعه ضربوني ابره وركبوني على سرير ودفوني لغرفة العمليات, وكان اخر عهدي انهم حطوا كمام على فمي وقالوا تنفس وعليها ما صحيت الا انا اصيح اقول لهم بطني بطني واعطوني ابره ما ادري اش هي الين ربنا يسر وبديت اصحى واعرف الناس من حولي
جيت ابغى اتحرك ابغى اقوم ابغى اسوي اي شي الا والله مثل السكاكين في بطني وطلع انهم مسوين خمس فتحات في اماكن مختلفة من البطن, صحيح انها فتحات صغيرة لكن اعوذ بالله الام عجيبة
وبيني وبينكم وهذا عيب فيني انا ماني من النوع الصبور او اللي يقدر يتحمل الالم وفي نفس الوقت اخاف من الابر وهذا اللي صعب الامر عليه.

على كل حال ادوشتكم بسالفتي لكن حبيت اعطيكم السيرة كاملة وانا الحمد لله كما قلت لكم في حال افضل وفي استراحة مرضية لمدة 3 اسابيع طلعت يوم السبت ولا زلت معكم وسأبقى ان شاء الله ولو ان الجلسة امام الشاشة متعبة لكن علشانكم تهون

وعسى الله لا يوريكم مكروه وان يشفي مرضانا ومرضاكم ومرضى المسلمين جميعا انه سميع مجيب

اخوكم
ابو مها