مستشفى آلمنتدى...

بسم الله الرحمن الرحيم

الأخت / هيام الورد ..

ألف شكر ع الطرح الجميل والله يعطيك العافيه ولا عدمناك تواجدك الجميل و أطروحاتك الأجمل ...


الأخت / بسمة الكون ..

مشكوره على دعوتي إللي تشرفت فيها .. والله يعطيك الصحه والعافيه ..
توكلنا على الله :

س1/ هل سبق ان سويت عمليه ؟ اذكرها ؟

مو عمليه كبيره .. لكن خياطه في ساعدي الأيمن .. و9 غرز ..

والسبب : كنت ألعب على زنك وأنا صغير وأزحلق من عليه .. ومن الفغاره إللي وهبني الله إياها .. زحلقت المره الأخيره في حياتي ويدي على طرف الزنك الحاد .. وأنقطعت يدي يمكن 15 سم .. لدرجة إني شفت الشحم الأبيض إلا إذا إني واهم فالله المستعان ولا تلوموني ..

س2/ موقف محرج او مضحك او محزن حصل لك داخل المستشفى أذكره لنا .؟!

موقفين في نفس الحدث .. في ثالث ثانوي صار علي حادث وجه لوجه مع واحد من أخوياي الله يسامحه ويحفظه وينا ما كان .. وتسبب الحادث في فقد الوعي وما عاد قدرت أتنفس ولا أدري وين أنا ..

الأول : لما نقلوني ع التنويم وبديت أصحصح .. كنت مغمض عيوني وفجأه جتني بوسه ماشيه مليون ..

فتحت عيوني لقيت جدي أبو أمي هو إللي باسني .. بكيت وبكى .. وأخوالي وبعض الأقارب عند رأسي ..

الثاني : لما فتحوا الزياره اليوم الثانيه .. توقعت أهلي بس إللي بيجون ..

تفاجأت إن أهلي ما يقدرون يجون .. والسبب أن الجماعه كلهم تجمعوا بعد صلاة العصر وجوا عندي يزوروني .. ولا طلع بعضهم إلا عشاء .. فكان لذا الموقفين تأثير كبير في نفسي ذاك الوقت ..

س3/ تحب تروح للمستشفى أول ماتتعب أو تجلس تتحمل .؟!

أتحمل إلين أطيح على وجهي .. وبعدها أدور واحد يودنيني المستشفى .. وهذا مو زين .. مفروض أول ما نحس بالتعب نروح المستشفى ..

س4/ متى آخر مره مرضت ؟ وش نوع المرض.؟؟!!

قبل شهر ونصف .. حراره إنفلونزا على وجع ضرس على قلة حيل .. حلوها .. ولك الحمد يا رب ..

س5 / متى آخر مره رحت للمستشفى ؟!

الجواب فوق .. لكن قبل يومين رحت زياره لواحد من الزملاء سوى عمليه ..

س6/ ماهي فصيلة دمك؟ وهل سبق وان تبرعت بدمك ؟ ولماذا ؟

o + ...

بالنسبه للتبرع .. حاولت أتبرع قبل فتره قالوا ما تقدر وقالوا لأنك من النوع إللي يغمى عليه بسرعه ..

وسألني هل تعاني من آلام في الصدر والرأس .. قلت أيوه .. قال طيب أُغمي عليك قريب صح .. قلت أيوه ...

قال أقلب وجهك .. ولا تتبرع عشانك صحتك .. وشف لنفسك .. قلت شكرا والشرهه علي مو عليكم ...

س7/ تتمني تسوي عملية تجميل .؟! ولأي عضو من جسمك .؟!

لا ... راضي عن نفسي تمام الرضا ...

س8/ علاقتك مع دكتور الاسنان ..؟؟

أحبه كثير .. إلا الله لا يبارك في بعضهم أما بعضهم فما يقصر ..

س9/ هل تمنيت يوم أن تصبح دكتور ؟ اي تخصص ؟!

نعم .. تخصص قلب ..

والسبب : لما تعب أبوي قبل فتره وسوى عملية القلب المفتوح و زراعة الصمامات كنت معه مرافق طوال شهر كامل وشفت الموت بسبب تعب أبوي ومرضه ووصوله بعض الأحيان لدرجة الموت ..

تمنيت إني دكتور قلب عشان أساعده لو أعطيه قلبي ما يغلى عليه ...

س10/ كلمه لكل مريض .!

الله يشافي كل مريض ويعافيه ويكتب الأجر والعافيه لكل من أبتلاه ربي بمرض أو غيره ..

وما يحب ربي أحد إلا ويبتليه ...





لكم مني كل الود ..


صقر صدريد ..


لي عوده لإختيار الضيف القادم ..