**@@ مــيــت وأنـا حـــي@@**

بيني وبينك عرفت الموت ... تحب والحظ متجني
تبي الصدق حبها منحوت ... واصبحت منها وهي مني
افرش لها القلب بالياقوت ... واقول يادلي إتمني
صدري قصور ومدن وبيوت ... وهي المليك اللي يحكمني
ياويل ويلي عليها صوت ... تحكي تقل كنها تغني
وسكوتها غير كل سكوت ... كل شي فيها يكلمني
قد شفت شمس زرعوها توت ... بشفاتها التوت متثني
ياحلوها والقلم مبهوت ... وش يكتب بوصفها عني
هي دنيتي والهوى والقوت ... وان غبت عن وجهها كني
متغرب وغربتي تابوت ... ميت وانا حي مستني
قولوا لها لو يفوت الفوت ... هو ينفع الصوت متعني
وقولوا لها والله إلا موت ... لو خاب في حبها ظني