بعض روائع الشاعرالمهندس ناصرالأحمري

خدمةموجود))





ولّى زمان البدو محفيـن السبـوت
ماعـاد ظـنّـي الأوّلات مفـوّلـه
عمار ياسـوق الدداسـن والفـروت
نص الخليقـه مـن سببـك معوّلـه
مشمش وتوت وماهنا مشمش وتوت
وأمّـا تريـلات الشعيـر متـوّلـه
أشوى مادام إن الخساره في البشوت
الموت لا جَتْـك البخـوت محوّلـه
تقيّد البـل فـي خيـوط العنكبـوت
والذيب تصبح هَوّ هَوْ هَوْ هَـوّ لـه
نرجع على موضوعنا ثبّت وشـوت
كتابتـه عنـدي وقـاريـه أوّلــه
الموج دون الحوت والحيتان قـوت
والحوت منه أهـل البحـر متهوّلـه
والعنبره ماخوذةٍ مـن بطـن حـوت
وفي نفس عاشقها لها شـوق وّولـه
فرصه ما بين تفـوت والاّ ماتفـوت
والليـل فـي تاليـه ماهـو بأوّلـه
روس الجبال ولا تهاتيـه الخبـوت
يمكن سبب موت القطامـي شوّلـه
ماعد سمعت لشلّة التهريـج صـوت
وأطرفهم أصغـر مايشوفـه هوّلـه
ياما تجمّعنـا علـى صكّـة بلـوت
ويامـا تجوّلنـا مــع المتجـوّلـه
واليوم أنا مّليت وأخترت السكـوت
كلٍّ ولـه مـوّال لا أشفـى موّلـه
كرت الوناسه لَحْق مجموعة كروت
هرجـة نقـا عنّـي مهـي بمقوّلـه
من أخترع موجود جعلـه مايمـوت
والله يوفّـق مـن دعمْـه ومـوّلـه
لو رسْمها عشرين طاسة عنـزروت
عنها إشتراكـي مافصلـت محوّلـه
رقمي عقاب وخدمة الموجود نـوت
والسالفـه بيـن الثنـيـن مطـوّلـه
موجود في الدمام وإلاّ حضرمـوت
كـلّ إتصالاتـي علـيـه محـوّلـه
أرتحت ممّن يمضغ الهرج ويلـوت
ومـن عالـمٍ هـرّاجـةٍ متسـوّلـه
وأبعدت عن الإزعاج ميتين ألف فوت
عن من قصر هرجه وعن من طوّله
ها وإسلمو ونهايـة العلـم مْحتـوت
قالـه نظـامـيٍّ نظـامـه خـوّلـه
هرجة عرب وأنـا مركّبهـا بيـوت
أوّل الأخيره ثلـث تالـي الأوّلـه

سوق الأسهم

إنفجر ياسوق الأسهم وأنت هافـي
أسهمك يالسوق طلقـات وقذايـف
بيّن الله سّرك اللي كـان خافـي
مرجفه ومطبّله والعرض زايـف
فاهـم وفاهـي وكـذابٍ ووافـي
ماأسهل الروحه وياصعب النكايف
بيع وإلقط من تحت بارد ودافـي
محفظة نواف مـن تدبيـر نايـف
صاله وشاشه عليها الكـل لافـي
ترتفع مـن بابهـا كـل الكلايـف
أهل الأسهم كنّهم وقـت التلافـي
عاطلين وسمعو بطاري وظايـف
بعضهم مايدري انّه وصل حافـي
غير هذي البورصه ماهو بشايـف
التداول يجمع سمـان وضعافـي
وأسهمه فيهـا ثقيـلات وخفايـف
أسهم السوق السعودي الإحترافي
من مصايفنا خذت بعض الوصايف
سهم سابك قادهـا دون إختلافـي
مثل ما الطايف عروسٍ للمصايف
بورصتنا جوهـا غايـم وصافـي
أوديتها وين عـن روس النوايـف
المواشي نسّبـت يعنـي عوافـي
والدسم منهـا ونسبتهـا نشايـف!
وأسهم مبـرّد مضاربهـا سنافـي
مايعلّـق مستضيـف إلا بضايـف
والزراعيات زرع ولـه قطافـي
الله الله لايحوف الـزرع حايـف
والجماعي مركب صغار الكوافي
ماهو بكايف ولا مشـراه كايـف
ياسلام الله على سهـم المصافـي
عند ممنوع التجاوز جاك طايـف
ياتداول سامبـا وشفيـك جافـي
ماتنفّـذ لـي لعـلّـك للتـلايـف
دعم سهمي نقطته فيهـا إلتفافـي
لان وسط السوق حرّيفـة لفايـف
هيئتك ياسوقنـا فيهـا إرتجافـي
مادرو باللي يحط الفـور فايـف
سببو سكّر وضغط مـع النكافـي
والشلل كلّي ولاهـو بالنصايـف
ذي سوالفهم مع سـوق التجافـي
قابلوه وجّربـو طعـم الحسايـف
أشغلونـي السهمجيـه يامعافـي
في قنـاه ومنتديـات وصحايـف
فايروس الأسهم عجز عنه المكافي
خدمة مباشر تخلي السوق لايف!
مجتمعنا سهمجي والنـور طافـي
طايفـه متميـزه بيـن الطوايـف
يأمن من اللون الأخضر من يخافي
ويتروّع لو يشوف أحمر شفايـف
هرجهم كله تنافـي فـي تنافـي
ماأدري إش مترادفاتٍ من ردايف
طرف عيني ياهل الشاشات غافي
وخاطري للبورصه كاره وعايـف
الله يبـل النحـر بعـد الجفافـي
قاسم الأرزاق ممّن كـل خايـف
أما أنا برضاي سجّلت إعترافـي
الأسهم ونفسي حشا ماهم ولايـف
بصمة إبهامي على مرسوم قافـي
وصف جدّيات في باب الطرايـف

]((قنبلة موقوته))

عندما تفقد شاعرعزيز على قلبك رجولة وشعر

هجس القصيد يشوتني وآشوتـه
أمّـا حيـاة القـاف والاّ موتـه
يستاقني طاري وأسـوق الثانـي
طـواريٍ مربوطـه ومفلـوتـه
بس الصحيح وقيدنـيّ الهرجـه
والقيدنيّـه مـاهـي بممقـوتـه
عفت القصيد ونظمـه وترميـزه
وحبكـة قوافيّـه ووزن بيوتـه
ملّيت والله من جميـع أغراضـه
وملّيت من صبّه ومـن منحوتـه
غنيّـت حتـى شيّبـت حجّانـي
وأنشر قصيده وأربعٍ مكبوتـه !
ما به بحر ماغصت جوف أعماقه
وأرجع معـي لولـوّه وياقوتـه
ومن امس واليا اليوم واليا بكـره
وأنا أقرح بهرجي بـدون آلوتـه
كتبت عن هـذا وذيـك وهـذي
مابـان منّـي هرجـةٍ مزتوتـه
والله وقاني ما أركـب السابتكـو
والباص ندري وين هـو كبّوتـه
قصيدتي تنهـلّ حامـي حامـي
ماني من أصحاب القلم والنوتـه
أهلْ الزوايا الضيّقـه والحرْجـه
عشّـاق نـورٍ ميزتـه بخفوتـه
سملّـقٍ مـا ينقـطـع تاليـهـم
كـلٍّ معـه شاهيّـه وبسكـوتـه
أطيبهـم الكتكـوت يـوم يغنّـي
ماله مجـال الاّ بـذا الكتكوتـه
وأرداهم اللّـي لا تمثّـل وأنتـج
ماجاب غير أموت فـي البنّوتـه
الفـرق بيـن أطيبهـم وأرداهـم
يمكن في شماغـه وزرّة كوتـه
الحبّ واحد والمشاعـر وحـده
تشاركو العشرين فـي الهلفوتـه
من هي هيا يا محسـن الهزّانـي
وأترك عقاب فلا عرفنـا نوتـه
نزار سـوري والهـوى لبنانـي
ما شبْع من مشمش دمشق وتوته
وأكْل الدمشقي توتـة البيروتـي
توّه وفـي داره وفـي بيروتـه
يعنـي كذيّـا قِسْمـةٍ مقسومـه
لابدّ فـار الحقـل يلقـى قوتـه
ولابـدّ مـن تبويشـة السابتكـو
ومكينتـه تنثـر جميـع زيوتـه
والموت لا بوّش بخـطٍّ موحـش
دداسنه ماهـي تطـوف فروتـه
مانـي بفـي ركّابْتِـه متشمّـت
أنشاتـو وياشينهـا مـن شوتـه
لكن عساهـم فـدوةٍ لـي وفْـدا
اللّي ليـا غنّـا جذبنـي صوتـه
الشاعـر المتميّـز المتـمـرّس
أيّة بحر طبّـه بيصبـح حوتـه
الواعي المدرك زبـون الجزلـه
قصيدتـه (بالكاملـه) منعـوتـه
اللـي ليـا منّـه حبـك قيفانـه
فالنـادره فـيـده ولا بتفـوتـه
اللي انا بأبطي وأنا اقـول اللـي
واللي الأخيره قنبلـه موقوتـه !
اللي جديـده فاقـده مـن مـدّه
من بعده الساحه مهـي مبخوتـه
غاب وغيابه ما عرفـت أسبابـه
وكبود جمهـوره هنـا مفتوتـه
وهـو منيـفٍ شامـخٍ متعـلّـي
لا هو يطيح ولا تطيـح كروتـه
كبيـر وغيابـه كبـيـرٍ مثـلـه
والله يكبّر في الحضور بخوتـه
لأني لو آملّ القصيـد الشعبـي
فالعذر بيّـن والحجـج مثبوتـه
تكفى يا سيف السيف وين عْكاشه
ترى عُكاشه ما يجوز سكوتـه [/siz

e

((درعه وقزاز))



إليا أستوت يا هاجسي فأعطها القـاز
حتى ولو تاتـي علـى غيـر شفّـي
ما الله بجابرني علـى حـلّ الألغـاز
لغز الردى بيـن الخبـل والمصفّـي
الوقـت نجّحنـي بتقديـر ممـتـاز
يا أقلامي إرتفعي ويـا أوراق جفّـي
تروزنـي بقعـا وعيّيـت لا أنـراز
راسي ويا بقعا عـن الـروز كفّـي
وقتـي تحدّانـي وجابَـه ولا فــاز
ما فاز فيهـا الاّ الرفيـق المقفّـي !
والغاية اللي دونهـا نجـد وحجـاز
رفّـي لهـا ياعينـي اليـوم رفّـي
ضياعهـا خيبـه وتحقيقهـا إنجـاز
وأنا أدري إن عكس الظهور التخفّـي
وأدري إن في دربي حواجز وبأجتاز
وأن طالت الطرقـه فعزمـي يوفّـي
بأمشي ولـو كـان آتعكّـز بمعكـاز
الموت مـا ظـنّ الخطـاوي تكفّـي
هذا سوالٍ معتـذر عنـه بـن بـاز
الغيب بأمر الله عـن النـاس خِفّـي
حكمه إلهيّـه لهـا شـرح وإيجـاز
فأمّا اركدي يا نفـس والاّ إستخفّـي
الطرق راكـد لكـن الوضـع نقّـاز
واللّي مولّـع نـور واللـي مطفّـي
وهـذاك فـوّالٍ وهــذاك خـبّـاز
ياسيـور سيـري لا دهنتـك ولفّـي
ما كلّ صوره تنحفظ وسـط بـرواز
خفّـي علـيّ ياسـود الأيـام خفّـي
غنيّت يالبصره وش أحوال الأهـواز
والصوت صوتي بس ما شال صفّي !
فما دامها مـا بيـن درعـه وقـزّاز
مسحت دهن العود من فوق كفّـي

وهنا مجرم الشعر واسطورة الرمزيه///ناصر الأحمري


((((راعي الكنود))))




راعي الكنْـود ينادينـي وينشـد عـن حـدودي
قلت في قمّة جبل وأراسلـك مـن بطـن وادي
قال فيبـر قلـت توجيهـي وموجاتـه شهـودي
كبسةٍ من ريشتـه تحـرق محطـات الـروادي
لكن إطلع خمْسه وعْشرين وإهـرج بالركـودي
تاخـذ علومـي وتعطينـي علومـك يالكـدادي
قال مابـه علـم مـن بيتـي لشيبانـي لـذودي
دام ستـر الله علـى مـن يتقيـه مـن العبـادي
قلت له شرحك سرى وأستار وسهود ومهـودي
ماعليّ خـلاف فـي درب الهدايـه والرشـادي
لكن صروف الزمـن خلتنـي أسيـر مْحـدودي
ثلّمت كل السيوف اللـي معـي كانـت حـدادي
الله أكبر كلمّـا بيّنـت فـي الموقـف صمـودي
وقفةٍ جنـب الصديـق ووقفـةٍ ضـد المعـادي
الزمـان يبيّـح أموالـي ولا بـيّـح ســدودي
والله إني ما انثنـي برعايـة الله عـن مـرادي
بكرتـي يابكرتـي والاّ قـعـودي ياقـعـودي
وصلّونـي ديـرةٍ مـن دونهـا وقّـف جـوادي
ماكبا لكن وقف والعـود فـي عيـن الحسـودي
صابته عين الحسود وهو مـن خيـولٍ عـوادي
الوكاد إنّي على أيّـة حـال بأرقـى للسنـودي
أحتزم وأطلـع سنـود نهايـة العلـم الوكـادي
ماعليّ من الحسـود وماعلـيّ مـن الحقـودي
كلمّـا زادو الأذى لقّيتهـم صـبـر المـهـادي
واحد صخّن شهر وأنطق صـدره مـن بـرودي
أحترق كيف أحتـرق والجـو كاسيـه البـرادي
يحسب إنه بعدها عـوّد معـه راس الشـرودي
مادرى إنه في المجي عادي وفي الروحات عادي
أنصلخ من عالـم إكليـل الحداثـه والـورودي
وأندمج في عالـم الكـوره وتشجيـع النـوادي
صاح وصياح السهارى منه يصحـون الرقـودي
بس حلق أكبـر مصيّـح تقفلـه علبـة زبـادي
والهروج الزايـده ماهيـب بمنتوجـي وفـودي
ياجليل الملـك جنّـب خطوتـي درب الفسـادي
يالكدادي والكلام يطـول عـن بيـضٍ وسـودي
قال سولف يالجنوبي عن بياض وعـن سـوادي
قلت له هأسمع وجودي ياهجوس الشعر جـودي
بالجزايـل شـرّد القيفـان يامـدوّر جــدادي
لأوّله من الأوّلات فيـا وجـودي يـا وجـودي
ياوجودي ياوجودي لا طرى طـاري الجهـادي
وياجودي يوم أشوف القدس في حكـم اليهـودي
ويـوم بغـداد العـراق تصيـر للكفـار نـادي
العلـوم مصلّحـه والحبـل ملـوي ومْعقـودي
نجتهد فـي المخطيـات وننثنـي دون المقـادي
السوالف في السياسه في حـدود وفـي قيـودي
دونهـا لوحـة تمهّـل قبـل ممنـوع التمـادي
لكن إشرايك في دْيانا وقصتها مع المملوح دودي
والشبح ليه أنقلب واللـي يسوقـه ويـن غـادي
وأعطني رايك بروتانا الطـرب جـارة ملـودي
شرّبت نجم الخليج القـاز مـن طاسـة هنـادي
والجماهيـر القيـام أضعـاف ذولاك القعـودي
وحكّ خدك ياجـواد وجـرّ صوتـك ياعبـادي
استريحـي ياجنـوده وأستـعـدي ياجـنـودي
إستعـدي وإستريحـي لـون ذا الليلـه رمـادي
والاّ وش رايـك بصفقـات اللعيبـه والعقـودي
بيـع تحـت المكرفـون وياهلالـي وإتحـادي
يالكدادي مابقـى الاّ قصّـة السـوق السعـودي
قبل قولـة يابـلادي واصلـي عاشـت بـلادي
أسهم السـوق السعـودي لا نظـام ولا بنـودي
يمشي السهم الصغير اليا مشى السهـم القيـادي
جيتـه بكـلّ النقـود وردّ لـي ربـع النقـودي
ياحسافـه يالتعـب والـزرع دكّـوه الجـرادي
يالكدادي مابقى الاّ عفاك وأشكر لـي جهـودي
جبت لك كل العلـوم بحـد عرفـي وإجتهـادي
يالكدادي كان تسمعنـي أجـب يبـن الفهـودي
وخمسه عشرين فـوق وماسمعـت الاّ الـدوادي
يالكـدادي جعـل يـومٍ زعّلـك ماعـد يعـودي
يالكـدادي يالكـدادي لا حيـاة لـمـن تـنـادي
كنّي أدعي ميّتٍ في القبر مـن بيـن اللحـودي
والكدادي مات في ظنّي وفي حسـب إعتقـادي
وقبل ما أسكّر جهازي صاح جعلـك ماتـزودي
قلت جعلك ماتفيد إش فيـك ماأوحيـت المنـادي
قال مازانت علومك في نزول وفـي صعـودي
قلت يا جمّال خـلاّك الزمـان الصلـف حـادي

معشوقتي عمرها75

المهندس /الشاعرناصرالأحمري



رسالة الشعر من ضمن الرسالات &&اللي أوصّل بها خيـر المضاميـن
وأنا زبون الشـوارد والجزيـلات &&طرقت كل البحور يسـار ويميـن

قريحتي حاضره في كل الأوقـات&& بالكم والكيف ماهـي بيـت بيتيـن
حكمه ومدح ْوهجا وحزن ومسرات &&ولا تطرّقـت لأشـواق المحبيـن
ماني بشاعر غزل وقت الغزل فات &&هـذا وأنـا مـا تعديـت الثلاثيـن

واليوم حان الغزل بأحلى العبارات&& في من تعلت على كـل المزاييـن
معشوقتي بإختصار أحلى الجميلات &&وأميرة الفاتنـات وشيخـة الزيـن

أم الوفـا والمكـارم والجمـالات &&وأم العطا والسخا في العسر واللين
من قال كم عمرها قلت إسمع الآت&& معشوقتي عمرها خمسه وسبعيـن

خمسه وسبعين عام من النجاحـات &&خمسه وسبعين عام وشفتها ألحيـن
تكبر ويكبر حلاهـا والطموحـات&& تكبر معاها وتكثر والهـدف ويـن

في قمة المجد مافيهـا إحتمـالات&& كرسي الصداره لها من دون تخمين
هذي حقيقه عليها شهـود وإثبـات&& وموثقـه بالـدلايـل والبراهـيـن

بكفوف الأبطال وخشوم الريـالات &&ودعم الملوك المياميـن السلاطيـن
وتوجيه وإرشاد وإخلاص القيادات &&ومبدا السلامه وتطبيـق القوانيـن

وكسر الحواجز وتذليل الصعوبات &&والبحث والمعرفه ظاهر وتضميـن
وحب التميز وعسف المستحيـلات &&والسعي دايم لترجيـح الموازيـن

وروح التحدي وعمق وبعد نظرات&& ومسابق الوقت من فكـره لتدشيـن
ورجال قـد التحـدي والمهمـات&& تكاتفـو والعوايـق فالهـا شـيـن

مما سبق مـن قوانيـن وسياسـات &&معشوقتي شدت أنظـار الملاييـن
وتناقلتهـا قـنـوات وإذاعــات &&عنـد القريبيـن منهـا والبعيديـن

أرامكـو فـي جميـع الإتجاهـات&& فازت وفي كل محفل دولي تبيـن
من أخر الغرب وحدود الولايـات&& وتشهد لها لندن ورومـا وبرليـن

ويشهد لها ماورى كل المحيطـات &&حتى آخر الشرق واليابان والصين
تقود كل الدول في النفـط بالـذات &&وأمتاز عنوانهـا فـوق العناويـن

مصافي النفط وآبـار ومضخـات &&وحقول وإنتاج متواصل وتخزيـن
ومصانع الغاز وخطوط ومحطـات &&من البحر للبحـر ثـروه وتعديـن

كم سجلت من براءآت إختراعـات&& وكم خرجت من كفاءات وطموحين
من واحد وتسعه وزوج الثلاثـات&& لثامن أعوامها مـن بعـد الألفيـن

وأرامكو تعتلـي روس المنصـات &&وترتيبها رقم واحـد ماهـو إثنيـن
واليوم حق علينا جمـوع وأشتـات&& نفخر بها ونحتفل قاصيـن وأدنيـن

ذكرى وتاريخ وأرقـام وعلامـات&& أشيا عزيزه على قلوب العزيزيـن
ماسيّة الذكريـات الفارقـه جـات&& وحنـا لهـا جاهزيـن ومستعديـن

من حقنا لو لهـا نقيـم إحتفـالات&& وفي بضعة إيام نقرى سيرة سنيـن
ونرفع لها في سما الأمجاد رايـات&& ونكتب بماء الذهب من بين قوسيـن

(أرامكو) وأترك البـاق فراغـات&& وإسم المسمّاه في شرح المسميـن
مغزاه تحقيق غايـه وإنتصـارات&& ومعنـاه متسيـدة كـل الميـاديـن

آحبها حب ما جا فـي الروايـا ت &&وأرخص لمعشوقتي غالي المثامين
عشقي لها سرمدي مالـه نهايـات&& يمشي غلاها مع الدم في الشرايين

نظمت لعيونهـا مجموعـة أبيـات&& ومشاعري مـا تكفّيهـا الدواويـن
يارب يسر لهـا كـل العسيـرات&& وأستر عليها من شرور المعاديـن

وصخر لها من يشيلـون الثقيـلات&& وإحفظ لها الدار والحكـام والديـن
آحبها وأرفـع كفوفـي بدعـوات&& وقالو محبينها مـن بعـدي آميـن

وهذي من اروع قصايد الرمزيه والعزف على وترالدبلماسيه على نهج الغزل والمعني في بطن الشاعر


يا عبير أحمد لو إنك ضيم راسـي
ضيم راسي منك ما أثّر في القريحه

حسنك الطاغي يليّـن كـل قاسـي
يابعد روضه وداريـن ومليحـه !

بآتغزل فيـك بالشعـر الحماسـي
والحماسـه كـل شـيً تستبيحـه

طلتك في الأمسيه جملـة أماسـي
النظر كـذاب والغـرّه صريحـه

ورزة المركـوز رزة دبلمـاسـي
ما يشاف الا كـذا لمحـه وليحـه

وميسة الميّاس مجموعـة مآسـي
ركزتـه هجـده وميّالـه صبيحـه

والهنف واضح لو إن الثوب كاسي
والمصايب كلبوهـا فـي مطيحـه

ياعبير أحمد منعني طيـب ساسـي
عن تدفـاق العبـارات الصحيحـه

ما منعني حارس القصر الرياسـي
لا اتمثنـى مستريـح ومستريحـه

المهم إنك غديتـي شـي أساسـي
كل شـيً فيـك ياويحـه ياْويحـه

يكفي إني لأجلـك أتابـع رواسـي
والاّ شعّار العرب قومـه وطيحـه

منهم اللي حطـم الرقـم القياسـي
يجمع السبع المنايح فـي منيحـه !

ومنهم المشفوح لحّـاس التباسـي
يطبـخ المترديـه فـوق النطيحـه

ومنهم النصاب طـلاّب المكاسـي
يطلب الميّت وهو داخل ضريحـه

ومنهم اللي لا خضار ولا يباسـي
في غزله وفي هجاه وفي مديحـه

وفيهم اللي لا قصد يجلى عماسـي
حبكتـه حكمـه وقافيتـه نصيحـه

مثل بن جدلان متراكـي وراسـي
ما تجي مـدة هواجيسـه شحيحـه

في جبال وفي بحور وفي مراسـي
هاجسه جبّـار ولسانـه فصيحـه

آهتف له من لباسـي فـي لباسـي
قسمـه الجنبيـن ولسـان الذبيحـه

وأنت يالجمهور مامون الكراسـي
برمج الجـوال مامـون الشريحـه

وغن يالتكسـي وياتـون التكاسـي
والوعد عنـد الجميلـه والقبيحـه!

البدايـة لذعـة السلـك النحاسـي
والنهايه صيحةً فـي سـد صيحـه

وأن عبير أحمد حصل فيها إلتماسي
لا تقـول الشاعـر الله لا يبيـحـه

بلغوها تاخـذ المعنـى السياسـي
ويطلع الناتج فلسطين الجريحـه !!

الله يعطيك العافية

موووضوع مميز

الله يعطيك العااافيه

شاعر كبير .....

اعجبتني المفردات التي يستخدمها ....

فاله البيرق ...

ومااقول الا مافيه حيله ..

الاخ/ الغالبي909 بارك الله فيك لقد اتحفتنا بهذه الدرر تسلم ويسلم لنا المهندس /الشاعرناصرالاحمري فلقد لوى اعناق الكلمات وصاغها صياغة شاعر متمكن 000000
لاعدمناك يالغالبي909 ولاعدمنا الشاعرناصر0

صح الله لسانه وعلا شانه

ومشكوور يابعدي على ما أتحفتنا به من دُرر

اخووك

حسن مشكور على روعة مرورك يالغالي

تحياااتي لك

تاهت حروفي مرورك المميز
تحيااتي لك

السفير مرورك يشرفني

تحيااتي لك