الميـك أبــ ممنوع..!!

المشاركة الأصلية كتبت بواسطة ذات الشان

بداية الزواج قسمه ونصيب
بعدها
اذا تقدم رجل لعائله وخطب بنتهم يخلي الامور تسير على مايبغون اهل البنت
يعني لو جا واحد وخطب لايقعد يتشرط بنتكم لاتحط مكياج ولا تتزين ولا ولا ولا
ياخي انت جاي تشتري سياره والا عماره ؟والاتتزوج
البنت تبغى تظهر بمظهر جميل ولاهو مزيف
بتطلع متزينه اكيد زينه خفيفه يعني كحل شوية روج ماسكارا والشعر معتنيه فيه ولا بسه زين
اما انها تطلع لها كنها كانت تغسل الحوش ليه ؟
طيب نجي عنده هو
قبل الشوفه وش سوا بعمره ؟
حلق ؟ ! اكيد
نظف البشره من الشوائب ؟
طبيعي

لبس غتره جديده وثوب جديد وعقال كمان جديد وكبك وساعه و(كب ) على نفسه قارورة عطر ولبس حتى (الله يكرمكم ) نعال جديد
وممكن يستلف سيارة صاجبه لو سيارته اي كلام

اش معنى هو يتزين ؟
والا اللي سواه ماهو زينه ؟
والا الزينه بس مكياج ؟








نجي للجد
المفروض البنت تطلع له محتشمه وهو وياها يشوفون بعض لسبب كما قال الرسول عليه الصلاة والسلام (احرى ان يؤدم بينهما) يعني ماهي معاينة بضاعه هي تعارف اوتآلف يعني اذ شافها وارتاح لها وارتاحت له خلاص بيروح اي عذروب
حتى ولو كانت شينه والا فيها اي عيب وهو كمان نفس الشي


سمعت عن واحد خطبوا له اهله الين زهقوا وكل ما شاف وحده قال فيها شي مو زين
ومره مع يأس من اهله قالوا له عن وحده وكانت يعني مو ذاك الشي بس قالوا علشان يبرون ذمتهم منه وتكون اخر محاوله
يوم شافها و تدخل مزاجه بقووه وطلع من عندهم وهو خلاص معتبرها زوجته من كثر ما اعجبته ويوم شافته امه وهو مبسوط حسبته بيتريق على مزاجهم مثل العاده الا هو قال وين كانت ذا الصاروخ من زمان ؟

فالخلاصه ان المزاج احيانا يكون احول ويمشي الحال بدون زينه زياده


طولت
بس موضوعك حلو وانا اخذت راحتي وقلت اللي ودي



دمت في خير

الله يحيييك يا ذات الشأن وأنا أشهد في كل مره إنك صاحبة شأن
البنت ما أختلفنا إنها ما تتزين << إذا على كحل ما فيه مشاكل << عماريه ويحبون الكحل
وأما الروج والماسكارا حق العيون إن كان ماخاب الظن فأنا أشوف إنه يكون أيضاً بعيد والشعر بالعكس
ماراح يتشرط ويقول لا تقرب شعرها واللبس لها الحريه فيه << لكن كلها كوم والميك أب اللي هو موضوعنا كوم ثاني
فأتمنى ما تفهم البنت إن الطلب بعدم وضع المكياج من شأن إنه يفرض طلبه أو يسوي فيها ..!!

لكن نرجع ونقول إنه شي يعتبر من حقه عشان ما ينغش في البنت
وفي نفس الوقت يكون مقتنع في البنت بوضعها العام اللي خلقها ربي عليه لأنه راح يكون في يوم
من الأيام زوج لها إذا الله كتب لهم النصيب وبيقوم من النوم وهي على وضعها الطبيعي وبيكون في البيت
ويمكن يكون مالها نفس تسوي هالمكياج أو تتضبط وبتكون بوضعها الطبيعي يعني راح يكون فيه قناعه
من يوم النظره بالمنظر العام والطبيعي لها ...

لكن لو كان العكس أتوقع راح يكون فيه أختلاف وممكن توصل الأمور لحال لا يحبه الكثير من النساء
لأنه ما تعود مثلاً تظهر بالمظهر الطبيعي من يوم تزوجها وهي وفجأه يلاقيها << شي ثاني

أما عاد تطلع له كأنها كانت تغسل الحوش << فلا والله ما يصير أبد أبد

بالنسبه لنا يارجال من الطبيعي جداً أن يحلق الشعر إن كانت لحيه ولا سكسوكه ولا شنب ولا شعر رأس ولا غيره
والشوائب تزال بالتنظيف بالبخار أو غيره << لكن ما نروح نلطخ في ذا المكايييييج وعاد يطلع الواحد كأنه سياره
توها مسمكره وكثرو عليها المعجون وما أنكر بوجود رعيان المكياج من الرجال <<< لكن هذولا حالات خاصه

وصدقيني لو البنت تطلب من اللي يخطبها إنه يكون بشكله الطبيعي بدون ما يحلق راح يوافق << عني أنا موافق أهم شي القناعه بوجود هذا الزوج اللي راح تبني معه حياتها ومستقبلها ..

بعدين يالغاليه أنت الحين دخلتي الزينه في اللبس والمظهر العام في موضوعنا
وهذا من حقه إنه يتعطر ويلبس ويكشخ والبنت نفس الشي من حقهاا ..!!

والحشمه مطلوبه ووجود البنت مع خطيبها في النظره الشرعيه مع بعضهم هذا قليل مانجد من يوافق لهم بالبقاء مع بعضهم ولو دقائق تعرفين عندنا عرب متشددين شوي وما تفارق الأم بنتها << لكن أرجع أقول في كل رد

الميك أب هو الدمار الشامل في جميع الأحوال والطامه الكبرى إذا جاتك وحده سوت مكياج وهي ما تعرف تضبطه
تطلع << عالم آخر من التراث

في النهايه المزاج الأحول يمشي الحال << والله إنك صادقه

الله يوفق الجميع وتواجدك اللي طولتي فيه هو الأحلى الله يسعدك دوم ويحفظك لعيالك ..!!

أشكرك من الأعماق على مشاركتك الصارمه والصريحه ..!!