][][§¤°^°¤§][][ لقمة العيش صعبة ][][§¤°^°¤§][][

قالوا علامك تزور حي البديعه كل يوم ....... قلت السبب صاحبي الله حسيبي عليه.........!





قدر الله علي في يوم من الأيام ومدري وش خلاني ابز قدام أمي واقولها والله من زمان ماجلسنا هالجلسه مع بعض .. يامال جمعا الجنّه .!!
واثناء تجاذبنا اطراف الحديث انا وماما "غزيّل" الله يطولي بعمرها .!! قالت عندي فكره .. وطلع فوق راسها لمبه زي اللي في الماسنجر بلس أو على قولة شرشبيل .. الرسول .!! <<< اجل هذا قصد ابو نورة يوم يقول رسولي قوم بلغلي إيشاره .!!!
وقامت تناظر زاوية المجلس .. وتتمعن وعينها اليسار بدة تلف لحالها .!! انا بصراحة خفت عليها بغيت انفظها بس قلت خلني بشوف وش يصير؟!!

واقعد اناظر فوق راسها واشوف اللمبه ولساني حالي يقول " ألحين بتقول ماودك بس تاخذ بنت خالتك وانا امك؟! ولا بتقولي ورا ماتدور لك وظيفة بدال تبطحك في هالبيت وخياسك بفراشك !!
اللتفتت علي وقالت اي والله وانا امك ماودك تدور لك شغلة بس لو في محلات هالخظرة ولا تبيع جح ولا اي شي بدال جلستك صاير"ن" كأنك جيفة مغير تبطح على غير سنع .!! وقامت تصفق بيديها وبين كل كلمة وكلمة صفقة .!! مابقى الا شوي ويدخلون الطقاقات ويقولون
" يامرحبااااا بالمقبليييييين " طمبق طمبق طمبق طمبق !!

قمت ومن شدة تأثري بكلام امي نزلت راسي وصديت وجهي يم الجدار مخفي دموعي ونخاريري وانا اقولها "خير إن شاءالله " .!!


طلعت من البيت على الونيت مدري وين بروحله بشوف لي شارع مظلم اقعد ابتسي فيه .!! ولا براحة ؟ ... وانا في طريقي وقفني واحد وقالي بغيتك بخدمة يالحبيب قلت اطلب عزّك .!! قال انا توني شاري تلفزيون ولا اقدر اشيله بسيارتي وابيك تشيله مع في الصندوق ونودية للبيت .!
قلت تم مشينا والله ونحمل التلفزيون ونودية لبيته وندخله لين المجلس وانا طالع والقاه معلق " خمسمية ريال " على دريشة الونيت وكاتب عليها كثر الله خيرك .!! يا اخي المسلم والله يوفقك ويرزقك من حيث لاتعلم وان بغيت اي شي لايردك الا لسانك وحاط رقم جواله !!

تلفت يمين ؟؟ وتلفت يسار!!! ارجع اللعن امه الحين؟ يحسبني كداد هو ووجهه ؟! وتطلع اللمبه اللي فوق راسي وتصكني مع جبهتي وقالت ياخي صدق انت لوووح .!! الحين رزق جايك من السماء وقاعد تتمشيخ انت ووجهك اشتغل يامال الغنيمة زي الاوادم والناس .!!

قلت بس مابدهاش مالك الا الكدادة ياولد الونيت وموجود صح ان صندوقه مصدي والطبلون مغبر والتنده كلها نغاف !! بس مهيب مشكلة يلقى من يحتاجة زي راعي هالتلفزيون !! وأطلع على راس الشارع والقالي مصري قلت عاوز مشوار ياحق .!! قال البطحاء بريالين قلت ظف وجهك بس امتبك مشوار من السويدي للبطحاء بريالين ؟!! قال انئلع انت وشماغك يالسعودي !! قلت ياولد طالما اني الحين كاش .!! ومعي خمسين ريال .!!
ورا ما اوسع صدري بس والدنيا فانية واسوي زي ابو الهشاهيش يمكن القالي واحد كاش ثاني ويعبج بالكرايزما حقتي ويصير صديقي ويصرف علي .!!
ولا اطيح لي بحدا هالوزراء <<< وزراء بونيت ياللحجي؟؟

قلت اركب ياحق دحنا شباب السويدي اقدع ناس ومسوين مسابقة بالتعاون مع التفزيون السعودي وبنوديك للمشوار اللي تبية وبنعطيك فلوس
كاش ونيت " مش حتئدر تبربش عينيك "


أول ماركب معي المصري ويقعد يدعي .!! ويتكلم عن السياسه وربونا يخلي ابو متعب .!! واهدي سلامي لخالتي في فرنسا .!! قلت اسمع انت يا مصري
مهوب كذا مايصير لازم تصير اتكيت .!! وتناظر المراية اللي فوق راح ولزق خشته بالسقف وقعد يناظر ويغمز .!! قلت ياولله السبهه ذا وش يبي .!
قلت مشوارك وين بس قال البطحاء عاوز اشتري شوية حقات للمحيل .! قلت يالله بس هذانا وصلنا للبطحاء انزل .!! قال الله ؟؟!! الزاي وصلنا
فين الفلوس فين الشئة دنا حدربك بالروصاص .!! قلت انزل بس لا اجلدك انت وريحة هالصنان اللي شقت خشمي اللهابوك لو تفصخ فنيلتك نزل طاح معها درزن خمير .!! اخس عليك ياوحش اخرس وانزلة وانحاش .!!

لازم اشوفلي واحد"ن" مخفه وينلعب عليها لو العب انا وياه قمار يا اسرقه يا ياسرقني .!! اجل قاعد"ن" ادور بجنوب الرياض وش بلاقي؟!
اكيد ياحونشيه ياخوال .!!
وادز مع الدايري وافرق مع مخرج 16 ... واشوف لي ذاك العسكري اللي على صافقتن خشتة الشمس ومن قوة التعفيط بالوجه ماتدري هو مغمض ولا مغمص .!!
وقفت عنده وقلت له تبي توصيله قال ايه ابي قسم النسيم .!! قلت حياك الله ارحبووووو يارجال .!! طمر العسكري واخترش وطلع السلاح ومسك بيدة الثانية جنبية وقعد يصايح " أرحبووووو أرحبووووووو " وقعد ينتفض .!! بسم الله وش فيه ذا.!!!؟

يا ابو الشباب انا من التفلزيون السعودي وبسوي معك مسابقة وبوديك للمشوار اللي تبيه وبعطيك فلوس .!! الكلام هذا كله وحنا واقفين .!
قعد يخزني بطرف عين ؟! ويسحب شنبة ..! وقال ايييييييه انت من التلفزيون اجل .. قلت ايه ومعنا خمسمية ريال جائزة شفها واومي فيها قدامه غدية يصلح ..!
ولا يهجد أقل شي .!! قل تبا حشيش؟؟! قلت وشو ؟؟؟؟؟؟ قال تبا نص ربع ولا حق راسك ؟! قلت انزل الله يلعن امك يابدوي هذي اخرتها راكب معي
بياع يالحنس انقلع .!! يوم شافني متحمس شك بالوظع قال شكلة مباحث ولا ولد شيوخ ويموه علي .!! قال بكل فخر وهو رافعن خشمة وشايل ذنبة من المرتبة ونازل .. علااااا هوووونك يابنااااااخي والله لاجيبك لاجيبك .!!

واردها بنمرة وانحاش ...!!!!



((القصة ذي للبالغين فقط ))
777777
واديور مع المخرج قلت الله ابوها ديرة وش هالحالة مافيها الصاحي؟!! الاول مصري سبهه والثاني بياع؟!! خطر تطلع لي فيفي عبدة ولا سيد زيان مع الحظ !!
وارجع مع الدايري وفرق من عند كبري عتيقة والقالي اربع بنات ..!! وفي رواية انهم مهم بنات ولاكن بنات مسترجلات .!! وقفت عندهم قلت وين تبون .!! قالو نبي حلة العبيد بنشتري طبول ..! ماااااشالله الاخوات طقاقات .!! زبدت علي وحدة منهم كبيرة ومن قوة السواد ماتقدر حتى تشوف عيونها .!! قالت طقااااقه في عينك يابدوي انا المطربة اشواق ماتسمع للحفلات حقتي ؟!! قلت والله للاسف يامطربة اخر وحده من خواتي متزوجة
سكاتي ومشغليين الاستريو بالسطح سماعة وحده وكادرج بعد مهوب سيدي ..!!

قلت امشي الله يقرفك ولد قليل الادب <<< عصّبت الخالة .!! .... خلاص طيب طيب ... حنا من التلفزيون السعودي ياخالة وبنسوي مسابقة
والجائزة اننا نوديك لمشوارك ببلاش بس محناب معطينك " الخمسمية " لان فلوسك واجد شكلك هماك مطربة ؟!!

قالت يبويااا امشي الله يقرفك قرفتنا على هالصباح انا ما ادري مصبحة بوجة مرزوقة اليوم ولا مين .!! قلت خلاص بنعطيك " خمسمية " حقت ثلاث اغاني ؟!!
ماحسيت الا بشي ينغزني من تحت .!!! شي"ن" حااااد !! والا فيه وحدة منهم زرقا ولابسة عدسات خظر صايرة كأنها فلوكسواجن اكرادي !!
وتقعد تظحك وهي مدنقة راسها ..!! كركركركر والخالة اللي جنبها تقول طلعي مع حلقه والله ان مايحس أبيض .!؟؟!!!!!!

لاشعوريا بديت اقول لا يابرجس تكفى الابطال عيال الاستراحة قم جب الابتوب .!! واختبص ويعرق جسمي وافقد السيطره على السياره والخوال يكركرون واسفط يمين واقول انزلو اللهابوكم جحلط .!!

قالت الزرقا ننزل ليه ماننزل وانت اللذي ساكن في عيوني .!!! نزلتهم وحطيت رجلي وقعدة اصيح واصيح تمنيت عندي سرير نفرين ومفرش وردي وستارتي فوشي واطفي اللمبات واقعد اصيح زي " روان العاصي " بس للاسف كان راس مالي طراحة مشجّرة في السطح .!! ويظيق صدري قلت خلاص مالي الا شمال الرياض اروح هناك واللي بيركب معي بعطيه الفلوس على طول .!!
واجي من عند المملكة والف يمين واشوف هاك الافواج امم متجمعه .!! انواع الحريم قلت اييييييه هذا الشغل الزين مهوب هالجحلط اللي اخرتها وهذا
جزاي موديهم يظيعون شرفي؟!!

واشوف لي وحده لابسة عباية المفروض ان لونها اسود من من كثر الدناديش صار لونها مموج زي الرهيب 2000 ؟!!
واوقف جنبها وترجب معي اول ماركبت وتفصخ النظارات السيدي وتفك الطرحه .!! وجهها معرق واحس هذاك طايح من كثر العرق .!!
قلت وين تبين ياختي قالت اي مكان ؟؟؟ وجع وين طيب قالت اي شي رح لاي مكان در بالشارع شوي لين يجي اخوي ؟!!!

انا بدهاء وحنكة قلت علينا يامناااحي؟؟!! بدينا بحركات اشنحلي؟!! قلت وشو قلت اسمعي بصراحة انا حبيتك ومعجب فيك وودي تصيرين صديقتي
وخوذي هالخمسمية عربون صداقة ياعمري وهـ انا احبس اموت فييس .!!
طقتها الحميّا وقالت شايفني " طوووط " عندك يا قليل الادب مالت عليك يالقروي يالزلابه انت ومنتداك المخيس كش عليك ياوع وتفتح الباب وتنزل!!

يوم نزلت عاد وانا اشوف البرمودا والسيقان طالعه ومااش قلبي حان لين الحين مقدر اخليها لحالها قلت لازم انزل اراضيها وتوني موقف وداق ريوس.!!
ويوقف جنبها راعي BMW 760 لؤلؤي داخلي بيك خليجي <<< جمركه !! انا خفت قلت شكله صدق اخوها .!! وينزل ويفتح لها الباب وتركب معه ومشون قدامي .!! وانا واقف واحد يدي على باب الونيت واقول لاااا ..!! خطفها المووقرم ... ويدق ريوس ..!!
قال انت اللي بتعطي هذي خمسمية يالقروي؟؟ قلت لا منيب معطيها شي وش شايفني اكد على عميان ؟! ويطلع " خمسمية " من جيبة ويشقها قدامي
ويدعسها ... ويييييين !! اتحداكم تعرفون؟؟ دعسها بشنطتها .!! وقال استح على وجهك وسم زي الناس .!! ويمشي......

يوم تيقنت انه وصل لاشارة العليا العام وافصخ نعالي واذب شماغي على بالي معصب والحق وراه ... تعال يابن الكلب وامشي خطوتين وارجع خمس
توني قايل يابن الكلب ويجيني كف من راعي جمس دبيب ولد نعمة طالع مع الدريشه وهو ماشي ويقول سم زين ياقروي خمسمية اجل هاه .؟!!!

حسيت من جد ان مالي داعي واني فاشل واني مستحيل الاقي وظيفة تظفني وتعيشني مثل سندريلا .!! << وش دخلها مدري .!!
ركبت موتري وطلعت على طريق الملك فهد قاصد حي السويدي حيث مسقط راسي وصلت البيت دخلت على اذان المغرب والقا امي قاعدة تتقهوها وتفطر " صايمتن الست " قالت تعال تقهو وانا امك .!! وتصب لي فنجال حطيت الفنجال بخشتي بمصمصه من زود الشهوة وشنق برطمي .!!
وجع الفنجال مكسور يمه ؟!! قالت جرحك .!! قلت ايه ؟! قالت حسيت فيه ... ايه يمه " خنقتني العبره " !!

شف وانا امك البني ادم مهوب يتبطح بس ويقول ابي اكل وابي اشرب وابي انام وهو لاشغل ولا مشغله الواحد كبر الحمار ولا في جيبة ريال .!!
ولاهوب اذا بغى يشتغل يدور اللي على كيفة ولا يبي الناس تقوله تكفى تعال اشتغل وبنعطيك فلوس طال عمرك .!!
الشغل مثل الهم على القلب بس وين اللي بيصبر .. ومن صبر ظفر وانا امك .!!

قم وانا امك وادخل العيارين ووسع صدرك

ههههههههههههههههههههههههههههههههههههه


فعلا ألحين أقتنعت إن لقمة العيش صعبة ياخوي بن مغرم


أشكرك من أعممممممممممماق قلبي ولاتحرمنا أخوي من تواجدك



اخوووووووووك العاااااااااااقل

ايذا ذيه ماخلى كلمتن في الارض الا واهبها توي هينه

ههههههههههههههههههههههههه

من جد لقمة العيش صعبه

وهههههههههههههههه يا ريــانه مذا ودك يهب غير الكلااام

...!!

اشكر مروركم يالشيووون