مواقف مضحــكه في رمضــــان ( دعوه للمشاركه )

كل عام وأنتم بخير ..

لكلٍ منا ذكرياته بالطبع عن أول يوم صيام لهُ في الحيااااة ..

فما رأيكم .. لو فتحنا حقائب الذكرى معاً ؟؟

سأبدأ أنا .. واسمحوا لي بالتحدث بالعامية ..

:
:

كنت في سنة ثالث ابتدائي ..
كان عمري 8 سنوات ...
يعني قبل دحين بـ 10 سنين بالضبط

" اشفيكم تضحكون ؟؟؟ شكلكم كذا مو مصدقني من أولها .. لا أحد يضحك بليز "
المهم ..
كنت طبعاً بموت من العطش .. بس أبويا قالي إني لازم أصوم ويخاصمني إذا أفطرت
بس أنا كنت أعطش كثير وما أدري من وين أشرب من غير ما أبويا ولا أحد من اهلي يشوفني
يعني أيامها ما كان في مدرسة عشان أشرب هناك من غير ما يعرف أحد
فكنت كل شوي أقولهم ما تبغوا حاجة من الدكان ؟؟ وأنزل أروح أشتريلهم
وأنا أنزل عشان أشرب من ثلاجة ماي بااااااارد في الشارع
كنت مسوية نفسي نشمية وكانت أمي تستغرب خخخخخخخخ
بس أعتقد أنها كانت عارفة بس إنها تشفق عليا وتسكت
لحد ما مر نص رمضان كذا ومحد كان يدري عني ..
إلى أن شافني أخويا الله واكبر عليه وراح فتن عليا وطبعاً أبويا حبيبي وقتها كان بصحته ههههههه
وعينكم ما تشوف إلا النور ..
والله ما أنسى الضربة اللي أخذتها منه ذاك اليوم
بس ضربة علمتني ما عاد أفطر أبداً في نهار رمضان ..
وعلمتني كيف إني أحب رمضان وأحب صيامه ..
يمكن التزمت بالصيام لأني كنت خايفة من الضرب مرة ثانية
بس بعد كذا التزمت بوقت الصوم لأني انا صرت أحب رمضان والله

وهذي ذكرياتي أنا في أول رمضان لي في حياتي أصومه ...

ياللا دوركم انتوا دحين ..

أتمنى تشاركوني بذكرياتكم

أنتظركم ..