عمرو ابن حجر ابن الهنو بن شنوّه

يالله طلبتك وانت والي التدابير
يا واحدٍ ما تحت قوتْك قوة

يلي خلقت الحوت والداب .. والطير
كتبت رزقه في مساه وغدوّه

تصلح لنا النية وتكتب لنا الخير
والوقت تكفينا شروره وسوه

وتجيرنا من كل نقصٍ وتقصير
وتعزنا عن كل هرجٍ مشوّه

وتدلنا في شاردات التعابير
حتى مقام الشعر يلقى سموه

تو الرجال الي لهم كل تقدير
اهل الفصاحة والخطاب المفوه

من بعدها مني سلامٍ على مطير
الي خذوا من كل مجدٍ علوّه

أهل السطا واهل السيوف البواتير
يوم الرمك يلتف عجه بنوه

يوم المغازي وارداتٍ مصادير
كلٍ بماضيكم يشيد وينوه

وكل الرجال بطيبها لازم آشير
كل القبايل هل فعول وحموة

وانا من احفاد الرجال المشاهير
عمرو ابن حجر ابن الهنو بن شنوّة

جينا نزف التهنية والتباشير
في حفلة اهل الطيب واهل المروة

في حفل عبدالله وريث المناعير
تو القصيد يزين معناه توه

ابوه شيخٍ شامخٍ شيخته غير
له ماقفٍ ما ياقفه غير هوّه

لا ذياب بن غانم ولا سالم الزير
ولا كل من لبْس اللباس المموه

حميّد الي له على الجيل تاثير
في وقفته . في فزته . في هدوه

اقولها من دون زيفٍ وتزوير
في ذمتي ما مثل خوتْه خوّه

وصلاة ربي كل ما غرد الطير
على رسول الله ختم النبوة

اللهم صل وسلم عليه
وسلامتكم
شعر // خالد بن مشرف العمري

صح الله لسانك وبيض الله وجهك ..
قصيدة على أعلى مستوى وفي كل شئ ..
أبدعت فيها وتجمّلت وتجمّلت وزينت موقفك وموقف ربعك فيها ..
واضح إنها من خلال حضورك لإحدى المناسبات ولذلك نلت كل الجميل ..
وفقك الله ولك تقديري ..

صح الله بدنك مديرنا وقائدنا
ابو ريان
والله يجملنا وإياكم
القصيد لا يكتمل جماله إلا بمرورك الغالي يالغالي
دمت بود أيه النقي

بيض الله وجهك يابوعبدالله
وافيه ياطويل العمر وافيه وتشرف
صح لسانك ولاهنت ويستاهل من قيلت فيه

صح لسانك يا شاعرنا خالد بيض الله وجهك ,
وتستأهل قبيلة مطير المدح ويستأهل من مدحت .
انت وافي ولا تمدح الا وافي .

المشاركة الأصلية كتبت بواسطة ابن عياش

بيض الله وجهك يابوعبدالله
وافيه ياطويل العمر وافيه وتشرف
صح لسانك ولاهنت ويستاهل من قيلت فيه

ووجهك ابيض يالغالي وهذا شيء مما لديكم
تشرفت بمرورك العذب وفقك الله

المشاركة الأصلية كتبت بواسطة ابوفهد العمري

صح لسانك يا شاعرنا خالد بيض الله وجهك ,
وتستأهل قبيلة مطير المدح ويستأهل من مدحت .
انت وافي ولا تمدح الا وافي .

صح الله بدنك وتستاهل الطيب يا ابو فهد
شرفتني بمرورك وفقك الله وسدد خطاك

لله دركـ يا خالد ...
قصيدة رائعة ولاهي غريبة منكـ
امتزج المدح بالفخر وحق لكما ذلكـ
صح لسانكـ ملايين