ديوان الشاعر محمد بن لقفص حكيم الشعر

اعتذر ثم اعتذر ثم اعتذر
ا عتذر ثم اعتذر ثم اعتذر
كان جاء مني كلام(ن) زعلك
لو تكرم يا لغلاء غض النظر
لا تقلي يا ولد وش دخلك
الخطأ موجود في طبع البشر
واعتقد هذا الخبر ما يجهلك
كان في من قدرك ما تعتبر
يا خسارة كيف ظنك يخذلك
عن صديقك ليه وليت الدبر
وأنت في قلبه رفيع(ن) منزلك
اغفر الزلة ويسلم من غفر
والتغاضي عن سواك يجملك
يا صديقي لا ضرار ولا ضرر
وأنتبه لا تستمع من عذلك
لا تطيع النفس وأقوال البشر
والغضب لو تتبعه ما طوّلك
ون عصيت الرأي فالصد استمر
بس رأيك يا لغلا لا يخذلك
مثل ما قالوا عسى دربك خضر
واصل المشوار والله أمهلك
خذ من التاريخ يا لغالي عبر
واحتفظ فيها بداخل منزلك


أعرفه

يسألوني عن دروب الحب وأقول اعذرونــي
أعرفه لكن مـا طبيت في غبة بحــــــــــــــــوره
بس حسب اللي سمعت إنه قريب للجنونـــي
واقرب أمثاله خبر قيس الملوح في سطــــوره
قصة مشهوره تاريخها عبر السنــــــــونــي
تثبت إنه من هواء ليلى قد أختلت شعـــــــوره
واشتهر مجنون ليلى بالجنون وباللحـــونـي
واصبح أسمه في دواوين العرب للي يـــــزوره
سيرة العشاق تشرح حالهم لا تحرجــــونـــي
وانصح اللي جاهل فالحب لا يعلن عـبـــــــــــوره
يا علي كثرت هروج الناس من حولي ودونـي
يسألوني عن خبر شي نهايته الخطــــــــورة
قالوا إن الحب يسكن داخل القلب الحنونــي
وأنت قلبك مرهف واكيد له فالـــــحـــب دوره
قلت تكفون اتركوني يا مخاليق اتركوني
سر بن لقفص عميق وما حد(ن) ياصل جــذوره
لو بغيت أشرح لكم عن سيرتي ما تفهموني
بس خلوا سيرة اللي حط صوت بدون صـــورة
لو بغيت أشرح ظروفي كل ربعي حاربونـــي
بس ماله داعي أحكي ماضي ولت عصــــــــــوره
عن تفاهات أسئلتكم لو سمحتوا تنقذوني
ريحوني من سواليف الهواء وانسوا شــــروره