ديوان الشاعر محمد بن لقفص حكيم الشعر

عطني غلا

عطني غلا عطني وفاء عطني إحساس
وأعطيك يا لغالي حلالي وروحي
يا سلوة الخاطر ويا معدن المآس
يا غاية المطلوب بلسم جروحي
بوح المشاعر بالمجاريح حساس
والواعي اللي بالمخاليق يوحي
دام الوفاء موجود لا تقطع اليأس
واحذر بسرك للمعادي تبوحي
احذر تقول إن الوفاء وضعه أنحاس
لا زال عندي في تمام الوضوحي
مشاعر الشاعر على حد لمواس
والبوح بالمضمون ما هو شحوحي
حد الوفاء فائق على كل مقياس
وأنا الوفاء طبعي وغاية طموحي
مشيّت فكري في سهولك ولطعاس
وأعاملك حسب العوّج والسموحي
الطيب بين الناس عز (ن) ونوماس
والغدر خلا دم قلبي يفوحي
واللي يحب الخير لا يظلم الناس
لو كان روحه من وفاها تروحي


بعد الغلاء

بعد الغلاء والوفاء والحب والعشرة
طيحت ذيك المراتب يا بعد حالي
الصاحب اللي وفاء لك في جميع أمره
ما كان فعلك معه يطري على البالي
بكرة تندم وتكوي قلبك الحسرة
فيما فعلته معي يا سمح لقبالي
قد قلت يا لحبيب أربعمائة مرة
اصبر وخل امرنا وامرك على الوالي
طاوعت بي كل من شجع على الفكرة
وهمشت جهدي وحطمت أكبر أمالي
غلطان يا صاحبي تحكم على النظرة
من دون تركيز يجعل خاطرك سالي
حطيت في قلبي المشتاق لك جمرة
وخليتني بين تعذيب(ن) وغربالي
ما دام من صارحك بالحب ذا قدره
عز الله إنك شريت ارخيص بالغالي
اللي يبيع الوفاء بالله وش عذره
ما غير تفريح عذاله وعذالي
واللي بصدقه جعل لك بيت في صدره
يحميك لو كنت عائش با لخلا الخالي
لكنها حكمة المعبود والدبرة
مالي سوى الصبر لو شليت لثقالي
والحمد لله على خيره . على شره
مؤمن بما ربي المعبود هيا لي