ديوان الشاعر محمد بن لقفص حكيم الشعر

أنا أبخص بحالي

لا تعتذر عني وأنا أبخص بحالي
الحر يفهم وش هدف عذر غيره

أنا ترى عقلي بعز الكمالي
أشير راع الشور قبل استشيره

تحسبني أفدغ يا ضعيف الخصالي
الحر يا مهبول خصمه ضميره

لا يخدعك ضحكي وطرح السؤالي
ترى مواصيل ابن لقفص عسيرة

شكلك جويهل في صفات الرجالي
وشكل المعاني فيك لسا صغيرة

غرك جماهير بصوتك تلالي
وأنا أعرفك تمشي بنفس حقيرة

والمشكلة تظهر بثوب الجمالي
غطاك ثوبك يا خبيث السريرة

والله لو تظهر خباث الفعالي
فيما اعتقد ما يعترف بك عشيرة

لا لا تقول إنك كريم السبالي
وأنا أعرف الجمال واعرف بعيره

أنا أعرف إنك ما تساوي ريالي
فعائلك خلت يدينك قصيرة

مثلك ورب البيت قتله حلالي
يا من رمى معروف غيره ببيره

تخسى وتقطع يا كذوب المقالي
يا من تردى في جمايل عشيره

يدري بك العربان شرق وشمالي
صارت علومك عار في كل ديرة

خلاص عن لجواد شد الرحالي
وابعد ولا تبقى في أرض الجزيرة

خائن ولا لك في وطنا مجالي
شرواك تصلح فالبلاد الشريرة

واقطع عن أوطان الوفاء لتصالي
واقلع وجعلك ما تشوف الستيرة

فرقاك عن هذا الوطن راس مالي
ومصاحبة شرواك عيب و عيرة