الشيخ وراعي الحسيل

بسم الله الرحمن الرحيم


السلام عليكم ورحمة الله

يحكى أن هناك رجل أراد أن يشتري (حسيل) من أحد الأسواق البعيدة عن قريته
المهم الرجال توكل على الله وودع أهله وراح السوق لشراء الحسيل ، وبالفعل لقي المواصفات اللي يدور عليها في الحسيل .
خوينا ربط الحسيل في حزامه وتوكل على الله راجع لبيته وطالت عليه الطريق فقرر أن يمر على أخته المتزوجه في أحد القرى الواقعة في طريق عودته .
الرجال دخل القرية وكان بيت أخته في وسط القرية وكان أول بيت في طرف القرية هو بيت شيخ القرية ويوم شافه الشيخ وهو قريب من البيت قرر أن يعزمه طبعا الشيخ معجب بالحسيل ( يعني الترحيب للحسيل).
المهم إنه أعترض الرجال في الطريق وقال غداك عندي وحتم عليه فوافق دون أن يخبره عن وجهته ،
تقهووا واللي عليهم بالخير وكل منهم يجر سالفه وفجأة الضيف طالع من الشباك وشاف الحسيل معلق والسكاكين شغاله
طبعا حسيل الضيف المسكين.
الرجال كاد أن يغمى عليه ولكن تماسك وقال لازم أستخدم الحيلة حتى آخذ حقي من الشيخ الغدّار ، المهم الرجال فكر فكر ثم فكر قال في نفسه لقيتها فقال للشيخ ماشاء الله عليك ياشيخ سيد الشباب مو باين عليك انك كبير كنك في الثلاثين وقام يمدح فيه لين وداه فوق وقام أقترح عليه انه يتزوج الثانية ، الشيخ ماصدق سمع علوم الزواج قال طيب من فين على يديك حسنة تقدر تساعدني ، قال له الضيف ( راعي الحسيل) عندي العلم اللي يسرك عندي العروس اللي تتمناها ، قال الشيخ وينها قال أجيبها لو تبغى الليلة بس أبغى منك مساعدة بسيطة ، قال الشيخ أبشر بسعدك إيش تبغى
قال أنا عندي مرض ووصفني الطبيب بذيل الحسيل اللي شفت معي وأنا أبغى أوديه لمن يذبحه ويعطيني ذيله ولكن ماأعرف أحد في ديرتكم وإذا كان تساعدني في ذبحه وقص ذنبه فهذه أكبر خدمه تقدمها لي والعروس أبشر بها الليله.

أنبسط الشيخ وأنحلت جميع مشاكله بعدما كان محرج من الضيف لأن الأولاد سنعوا الحسيل ، المهم الرجال زهم الأولاد وقال جيبو الذنب من العصعوص وأعطى الضيف الذنب .
شكره الضيف على حسن الضيافة وعلى المساعدة في ذبح الحسيل وقال الليله الموعد جهز حالك وانا بروح أجيب العروس والمغرب إن شاء الله وحن هنا .
الرجال راح وأخذ معه الذيل (ذنب الحسيل) في حثله وقام يحبك الخطه للإنتقام من الشيخ فراح لأخته في نفس القريه وعلمها بالعلم وقال أبغى تلبسين أحسن ما عندك ونروح عند الشيخ على أساس انك العروس ، وصل الرجال هو وإياها حول المغرب وحصلوا كل شي جاهز وقابل بينهم وقبل بها الرجال زوجه وبعد ما كتب الكتاب قال أخوها راعي الذيل ترى ياشيخ فيها عيب بسيط ما أحب أروح من عندك قبل ما أقول لك عليه قال وش هو قال قد تزوجت قبلك أثنين وكلما دخل عليها واحد تصيح فيطلقها ما بيغون صوتها ولا فيها عيب غير ما سمعت قال الشيخ بسيط خلها تصيح ماهي مشكله، قال أجل توكلنا عل الله بس زكّن على أهلك وأولادك إذا سمعوا الصوت لاينزعجون ، قال بزكّن عليهم وبروح أنا وإياها في الغرفة اللي في طرف الحوش ، قال خلاص بأوديها لك الغرفه وأنا بأمشي قال مع السلامه .
الرجال ودّاها الغرفة وطلّعها مع الشباك وقال روحي بيتك وقعد محلها لين جاه الرجال مبسوط ودخل الغرفه وقفل الباب
مساء الخير ياعروس
هلا الله لايمسيك بالخير
أفا أنت
إيه أنا ....راعي الحسيل
وين العروس
هنا ،،،،،، وأخرج الذيل من حثله خذ يالغدار
والله لايوريكم الرجال يصيح والأهل ممنوعين من الفزعة ،،،،،،والذيل يشتغل حتى أغمي عليه.
الرجال بعدها رجع بات عند أخته وبعد كم يوم الرجال حس إنه باقي يبغى يزيد الشيخ بالذيل المطوي في حثله بإستمرار فقام الرجال وتنكر في لباس طبيب ( مداوي ) ولف حول بيت الشيخ ، شافوه أولاد الشيخ
:::ياشيبة الرحمن وش عندك
:::أنا طبيب عندكم مريض أوشي أداويه
:::أي والله الوالد مريض ماندري وش فيه
:::خلوني أكشف عليه
:::بشر يامطوع
:::لا ،،، أبوكم حالته بسيطة وعلاجه عندي بس أبغى منكم تأخذون عيالكم وتروحون الى الجبل الفلاني وتعودون وبإذن الله ما يفتح لكم الباب غيره وبعدها أعطوني اللي تبغون
:::بسيطة توكلنا على الله ،،،، يالله مشينا
الله لايوريكم والرجال يطلع الذيل ,,,,, ومن فين توحي وضرب , وضرب الين أغمي على الشيخ مرة ثانيه
ورجعوا الأولاد وشافوا المنظر ياشين المنظر .
الأولاد أستلموا الشايب بالسمن والعسل حتى تعافى وسألتوه وش السالفه ؟
قال القصة من أوها وقال لهم هذا الرجال لازم أوقفه عند حدّه فكّروا معي .
حبكوا الخطه وقرروا يمثلوا إن أبوهم مات ويقيموا العزاء وينادوا القريه قبل الدفن من أجل طلب السموحة من الجميع وقالوا أكيد راعي الحسيل راح يحضر وبيطلب بدل للحسيل اللي ذبحوه.
راعي الحسيل كان متأكد أن الرجال حي وأن المسألة فيها إنّ ، المهم الرجال راح للعزاء وأخذ معه واحد سريع وقال له لو قالوا في العزاء أحد يطالب أبونا بشيء فقل أنا وقل الرجال عزمني وغدر بي وذبح حسيلي ، فإن حاولوا يمسكونك فأهرب .
:::: الإبن الأكبر ،، ياجماعه الدنيا ماتدوم لأحد والنفس أمارة بالسوء من كان له عند الوالد مظلمه نبغى يسامحه أو يخبرنا ونعطيه حقه
:::: المرافق مع راعي الحسيل ,, أنا جيته ضيف وغدر بي وذبح حسيلي وأبغى حقي
::: الأولد جميعا ,, أنت ... أمسك ..حدّه ,,, ورّع ..ورّع ... أزّمه
::: وين هو طلع ,,, هيا الحقوه ,,,, الحقوه يايماعه


ياخاتمة الشر ,,,, الجماعة كلهم يطردون الرجال والشيخ في الكفن وما عاد معه في اليرين إلا (راعي الذنب)

طاخ ....آآآآه طاخ آآآآه وأعطاه بالذنب وهو في داخل الكفن حتي أغمي عليه.


وسلامتكم .,,


أرجو أن تنال إعجابكم

هههههههههههههه ككككككككككككككككككككك

والله قصة جميله ياصبي حرفه فعلاً ذكرتني بالحسيل 0

الله يكفينا شر هذا الشيخ الماكر ولا يجعلنا نطب فيه ولافي أشكاله 000000تقبل تحياتي ومزيد من القصص 0000



محبكم/ السليماني -

زودها صاحب الحسيل
صح الشيخ يستاهل لكن دفع الثمن غاليا
وصاحب الحسيل اخذها حلا
واذكر قصه في تنومه
شباب سرقوا حسيل وراحوا يبيعونه عند الجزار و لسوء الحظ كان صاحب محل الملحمة هو صاحب الحسيل فقال للشباب انتظروا باروح اجيب الفلوس وراح للشرطة وجاب دورية وفي التحقيق قالوا ان الحسيل لقيوه يرعى بعيد فهو( لقطة)