المركــاز

الله يوفقكم
كنا في فترة الدراسة الثانوية في الرياض ساكنين بعزبة انا ومعي من الرجال الطيبين شرواكم ستة رجال وكنا مقسمين العزبة كل يوم على اثنين من الصباح حتى الليل .
في الصباح يقوم واحد يجهز الحليب والشاهي والثاني يروح يجيب الخبز وعلى فكره في ذيك الايام لايوجد تميس في الرياض .
كان معي خوي يساعدني في كل شيء لكن العشاء ما يحضر معنا على شأن اغسل المواعين وحدي .
المهم مالكم بالطويلة البيت اللي نحن فيه لاكهرباء ولا ماء .
ومن كثرة ما يكرر الغياب عن العشاء قررت ان اجمع المواعين على فراشه والحفها شرشفه وفعلا حصل ذلك ولما سمعناه جاء طفينا الاتريك وتلحفنا ورقدنا نريد نشوف ردة فعله .
دخل الرجال ويتلمس الطريق ليصل لفراشه وساعة وصله وحاول يسحب الشرشف الى القدور والصحون والفناجيل بين ارجوله .
وعاد تصوروا الصدمه له والضحك منا .
قمنا وولعنا الاتريك وقلنا لاهنت اولا صلح لنا شاهي ونشربه فيما تغسل المواعين ولا عاد تعيدها .
قال توبة حرام ماعاد اعيدها بعد هذه القرشعة بغيت اختلف .
راح غسل المواعين وردها مكانها وقلبناها سمرة وضحك وشاهي الى ان صلينا الفجر وافطرنا ورحنا للدراسة .