سجين القوافي

ليت صوتك..

ليت الهاتف الى جاب صوتك ماتجيه قطوع
ليتك ماتفارقني ولا تطرى توادعني


ابيك تسلي الخافق واسلي قلبي المفجوع
بعد فرقاك يوم ان الليالي منك تقطعني


لو انك شفتني بعدك وانا عيني تهل دموع
لو انك شفتني يوم الفراق الصعب يفجعني


ترا حالي عقب فرقاك حال التايه الموجوع
غريب في ديارك والدواء ماعاد ينفعني


ولا ينفعني الا الشوف ولا صوتك المسموع
بعد ماضاقت الدنيا بوجهي لا تلوعني


ابسمعك صوتي وانت كلمني بكل اسبوع
امانه كل راس اسبوع صوتك لا يقاطعني


تشوف الارض لا جاها الحيا واستبشرت برجوع
تراني مثلها صوتك على الدنيا يرجعني


تجي مثل الحيا وسط الصحاري والحيا متبوع
يبل القاع وانت تبل ريقي بس تمنعني


وترا مافيه عيب اني عشقتك والهوى مشروع
لو اني خابر انك منت حولي بس تسمعني


انا لا غاب صوتك صرت من كل البشر مقطوع
ما اشوف الا انت مخلوق على الدنيا يمتعني


متاعي في حياتي والرجا في شوفتك ممنوع
وعسى ربي يمتعني بصبر مايضيعني


احبك والمحبه تختلف مابين نوع و نوع
وحبك النوع الشديد الى يروعني


احبك بالمشاعر والمسامع والضما والجوع
وبكل احساس صادق بالمحبه فيك يجمعني


صعيب من صعوبة حبة الانسان راس الكوع
وانا ياما نهيت القلب عنك ولا يطاوعني


وتغيب وتتبعك دقات قلبي مابين غصب وطوع
وانا مابين قرب وبعد وين الله موزعني


واكيد انك بعيد ولا يبيله بحث بالموضوع
ولكن القلب لامنه سمع صوتك يشجعني


يشجعني على التفكير فيك ويجري الينبوع
مثل مجرى العروق بدمها والشوق يدفعني