أنا بعدك سحاب أبيض أضم الريح بأحضاني

على ذكر المواجع والسفر والحل والترحال=طويت اخر ورق عندي بقا من دفتر احزاني
طويته وانجرح خاطر وقلبي بالمواجع سال=ودريت ان الظلام اللي تحت كف السهر جاني
وجلست اجمع مسافاتي واغـني للسفر موال=على صفحه من الماضي بها حلمي وعنواني
بها كم سافرت عيني ليالي والظلام اهوال=ولها كم سافرت روحي وانا بالليل وحداني
حبيبي ليلة البارح مشيت من الغرام اميال=وراك وفـلـّت الذكرى شعرها لين غطاني
وجلست امشط ظفايرها على كتف الظلام وطال=تخـّيل من شعرها كل خصله لي وطن ثاني
حبيبي كل ماشوفك تجي بالذاكره تختال=نهر من كوثر الذكرى يجي من فايض أشجاني
أروح لسدرة الموعد وأجيب لجيدها سلسال=واخاف انك تجي قبلي وترحل قبل تلقاني
تخيّل يوم عانقني خيالك خاطري وش قال=تخيّـل قبل أسولف لك نشدّني عنك وجداني
نشدني لين خلاني مدينه هزها زلزال=تخيّــــل ماهدى حتى لقاك بوسط شرياني
هنا...كانت نواظرنا سوالف في كلام اطفال=وهنا كانت عصافيرك على دربي تحراني
وهنا شف باقي أثارك على رمل الوعد مازال=وهنا..شف دمعةٍ طاحت من عيونك على شاني
حبيبي لا تنشّدني عن أوضاعي وكيف الحال=أنا بعدك سحاب أبيض أضم الريح بأحضاني
غلاك بدلّة الذكرى بهار وهاجسي فنجال=تقهواه الجروح اللي بها ذكراك تنعاني
تسافربي وأحسب أني وصلت أخر وطن بالبال=وأثرني ماوصلت ألا بداية درب حرماني
وتبقى سيرة الذكرىقصيده تكتب الترحال=سوالف للعيون اللي صداها دمعة الساني