مجموعه من قصائد الشاعر العذب فهد المساعد

هذي مجموعه من قصائد الشاعر فهد المساعد اتمنى اكون وفقت في اختيارها

اتركم مع هذه القصائد ولكم ودي:





كبوة جواد


صعب لامنّك فشلـت .. وصعـب لامنـك لقيـت
إن من يكـره نجاحـك .. يـدري إنـك مانجحـت

أمس ضقت .. ورحت أقلّب ذكرياتي .. وأنتهيـت
عند صورة طفل صوته مثل صوتـي لاانجرحـت

وش مثـل لا والله إلا هـذا أنـا يــوم ابتـديـت
أنطق حـروف ٍ تلعثـم فـي لسانـي لا أنمدحـت

هـذا انـا يـوم الحيـاه فنظرتـي عشريـن بيـت
ومسجدين .. ومدرسه من طين كم فيها اصطبحـت

هذا أنا وأصبحت اتمتم : " هذا انا " حتى بغيـت..
.. أختنق .. بس القدر عيّا على موتي .. وطحت

وصاح صوت الطفل فيني : " أنت من وين ارتميت"
قلت أنا المستقبل اللي فيـه كـم همـت وطمحـت

أمس كنت أبيـك تكبـر .. بـس والله لـو دريـت
أني اللي عشت لأجلـه مـتّ عنـدك وأسترحـت

لو دريت إن الزمان يجـرّ رجلـي .. مـا عديـت
ولو دريت إن البحـور بـلا موانـي .. ماسبحـت

كان دربك لي طويـل .. وكـل ماشفتـك هويـت
قلت لك : كبوة جواد .. وما كبيـت إلا وجمحـت

ليـه تسمعنـي وتمشـي ؟! آه ليتـك مـا مشيـت
و آه ليتك مـن كثـر عثـرات الأيـام أنتصحـت

ضاعت احلامي .. وظلّ الحزن فيني .. وأهتديـت
للطريق اللـي يودينـي علـى دمعـي .. ورحـت

يالحزن .. ليتـك مثـل دمعـي وتنـزل لا رقيـت
بس أعرفك .. لو مسحت الدمع تبقى ما انمسحت !

كان حلمي .. في وجـود إنسـان يبكـي لا بكيـت
وصار حلمي .. في وجود إنسان يفرح لا فرحـت

كنت أشوف الناس مثلي كل مـا جعـت وضميـت
مادريت إن الأوادم نـاس فـوق .. ونـاس تحـت

آه يـاأول ذكرياتـي خذنـي فحضـنـك نسـيـت
لأسألك عن وجه ابوي اللي معـه يامـا سرحـت

خذني فحضنك أبغفـى .. يـاه مبطـي ماغفيـت
وإن لمحت دموع عيني .. سـو نفسـك مالمحـت

خذني فحضنك .. وبعثر في جروحي وإن قضيـت
هزّ لي كتفي .. وقل لي : عيب تبكي لو سمحـت

إضحك .. وعلّم زماني من أنا .. ومن وين جيـت
طقّ باب الحزن .. واصرخ فـيّ لامنـي فتحـت

و ضمّني يمّك .. وكمّـل ضحكتـك لامـن بكيـت
ودي أذكر كيف كانت ضحكتـي لامـن فرحـت !








حكاية المينا


اضمن لي ان البحـر مـا فيـه حوريّـه
وأضمن لك انـه يكـون حكايـة المينـا
اللّـه يرحـم جـدارٍ كـان لــه فـيّـه
وكانـت تسمّـي علينـا كـل مـا جينـا
نرمـي تعبنـا عليهـا كــل عصـريّـه
نتبـع قـدرنـا .. وتتبعـنـا خطاويـنـا
انا .. وذاك .. وهذاك .. وكانـت بنيّـه..
.. تطّلّ مـن جرحهـا .. وتبشّـرّه فينـا
كل ما استلان الزمان احدٍ.. بكـت هيّـه
وكل ما استهان المكـان احـدٍ.. تباكينـا
وفي يوم كـان الدفـا صـوت الشماليـه
نادت : "حبيبـي".. وجينـا نرفـع ايدينـا
خلّـت يديهـم وجتنـي وانكسـر فـيّـه
صوت ..وصدى صوت : "تكفى لا تخلينا"
رجعـت الـمّ الشتـات وضاعـت يديّـه
كل مـا جمعتـه تبعثّـر تحـت اسامينـا
ورحنـا نعـدّي .. وكـلٍ عبرتـه حيّـه
حتـى الزوايـا بكتـنـا يــوم عدّيـنـا
انـا وذاك وهـذاك.. وكـانـت بنـيّـه
وقبـل نتفـارق كتبـت اللـي يعزيـنـا:
"اضمن لي ان البحر مـا فيـه حوريّـه
واضمن لك انـه يظـل حكايـة المينـا"






العيش والملح


هذا انـت خنـت العيـش والملـح يامـن..
..تسـب نـاسٍ خانـوا الملـح والعيـش..!!

كنت احسبك..وش احسبك؟!..كنت ضامن ..
..أنك تداري خاطـري لـو علـى ويـش؟!

ماكنـت اظنـك قاسـي القـلـب لامــن..
ضاقت علي وجيت لك.. قلت لي: ((ليش))؟!

وش ليش؟!.. انا مابـي لـك ايّـة تضامـن
مابـي لـك الاضحـكـةٍ كلـهـا طـيـش

مابـي لـك الا ضحكـةٍ لــو تـزامـن..
.. مع ضيقتي .. طـارت همـوم وخفافيـش

ارقـد بهـا عـن غـدر الايـام ( وامـن)
واحيا بها.. مدري بهـا امـوت واعيـش !

واسـجّ فيهـا عـن هـوى كــل طـامـن
وأروي بهـا عـروقٍ.. عليهـا معاطـيـش

بس انت .. خنت العيـش والملـح يامـن ..
.. تسـب نـاسٍ خانـوا الملـح والعيـش!!





التوبه


تطيح دمعه واسلـم للفضـا موقـي
وارفع يدين الذنوب وتظلم أعماقـي

اشوف قبري يمر بوحشتـه فوقـي
وتصير كل الحياة أضيق من أخلاقي

يانفس طالـت ليالـي غيّنـا فوقـي
كم قلـت يالله وقلتـي تونـا باقـي

يالمزنه اللي تحـن لغيثهـا نوقـي
تعبت أخيلك وأقـول نياقـي نياقـي

تعبت ياما تعبت و ضاعت حقوقـي
ياما ندمت وردمت الذنب فـأوراقي

ياما سكت وتركت البوح لعروقـي
أخاف أسولف وأخيب هقوة الهاقـي

أخاف ابوح ويخون الصمت منطوقي
وأقول شي يحـث النـاس لفراقـي

يالله وأنت الملاذ إن مسني عوقـي
وأنا ذنوبي جهد من راسي لساقـي

يالله تغفر خطـاي وترحـم وتوقـي
عظمي نهار الحساب وتقبل إعتاقـي




نديم الجرح


يانديـم الجـرح واللـي وصتّـك بأرقامهـا
عارف انّك ما تعـرف الا شـذى يشمومهـا

لا تعلمني عـن آخـر مـا حصـل فأيامهـا
من رسالتهـا عرفـت اليـوم كـل علومهـا

أدري إن الوقت شمّـر عـن يديـه وضامهـا
وأدري إن الحظ الأقشر صار مثـل هدومهـا

وأدري إن الهم وقّف فـي طريـق أحلامهـا
لين صار الحزن أثرها .. والشقى مقسومهـا

بس تستاهل .. هي اللي طاوعت مـن لامهـا
وباعت اللي كل ذنبه .. مادخل فـي سومهـا

خلهـا تدفـع ثمـن غلطاتهـا مــا دامـهـا
همّّلت قلبي .. وراحت .. وأسرفت في حومها

يبتعد مع كل خطوه .. صوت وقـع أقدامهـا
وتقرب الضيقه .. وتصحى دمعتي من نومهـا

لين غابت عن عيونـي .. وأنجلـى هندامهـا
ليلةٍ .. تغفى علـى صـدر الظـلام نجومهـا

كنت احس بشـيّ .. والله ماتشيـل عظامهـا
لو تحس بشييّ منه .. يمـر وسـط حلومهـا

كنت احس إن الضلوع العـوج مثـل أيتامهـا
وأشعر إن القلب نبضه منتهـي مـن يومهـا

والحيـاه اللـي تـدور شهورهـا وأعوامهـا
وقّفـت .. واليـوم دور رماحهـا وسهومهـا

ياكثر ما اغرقت نفسي فـي بحـور اوهامهـا
وياكثر ماضعـت بيـن أوهامهـا وهمومهـا

مـا جـداي إلا احلـم انـي واقـفٍ قدامهـا
وأتخيلـهـا تعاتبـنـي .. وأروح ألومـهـا

يانديم الجـرح .. خلّـك مـن علـوم أيامهـا
مابقى فـي القلـب رغبـه يلتفـت لعلومهـا

والرسالـه ردّهـا للـي زمنـهـا ضامـهـا
وقلها كلمـه .. وتفهمهـا حسـب مفهومهـا

والله أن أقـص كفـي قبـل .. أدق ارقامهـا
والله أن اشيل قلبي .. قبـل أشيـل همومهـا





لاتسافر


قلبي لـه اليـوم .. ثالـث يـوم موجعنـي
وعيني لها اليوم ثالـث .. تجمـع طيوفـك


والبـال كنّـه عـلـى دربــك يوزعـنـي
ولسانـي ماكـنـه الا خـلـق لحـروفـك


لاالنـوم نافـع .. ولا التفكـيـر نافعـنـي
انام واصحى علـى الباقـي مـن وصوفـك


بالله قلي .. شعـوري هـذا وش يعنـي !؟
طمنّـي .. الله يطمـن هـمّـك وخـوفـك


بيني وبينك .. ترى اللي صـدق ضيعنـي ..
.. ان انت في اخر لقا .. شارح لي ظروفك


مدري وش اقول .. لكن تدري .. اسمعنـي
خابـرك وافـي .. و أبيـك تتـم معروفـك


ان كنـت نـاوي تسـافـر .. لاتودّعـنـي
بـس انتبـه .. لا تسافـر قبـل مااشوفـك




الغربه


أيـوالله أن شوفتـه تستاهـل عـنـادي
اللي عشانـه تركـت الـدار والتربـه
مااقـول لـك شوفتـه نستّنـي بـلادي
لكنّـهـا يافـهـد نستّـنـي الغـربـه
وش عاد لو قلت عني ضايع وغـادي ؟
وش أبركه مـن ضيـاعٍ دلّنـي دربـه
تبغاني ارجع ! وأنا ياصعـب معـوادي
مـادام همّـي نسانـي وأنقلـع سربـه
الهم هاللي تشـوف انـه علـيّ بـادي
ياليتك تشوف كيف يصيـر فـي قربـه
الله يحـرم ... عيونـي لّـذة رقــادي
أنّي معه .. مااعرف حزني ولااشعربـه
هرجك فـوادي وأنا ياخوك فـي وادي
الله يخلّـيـك ... حـالـي لاتعّـذربـه
راضي بحالي كذا ... واللي يجي عادي
لعيون منهو ركز فـي قلبـي الحربـه
بصوته , شقاوته , مزحه , طبعه الهادي
يملا عليّ الفضا .. من شرقـه لغربـه
يكفيني أنـه غـدا هـو شربـي وزادي
أو تقدر تقول أنـا اللـي زاده وشربـه
ياخي أذا الحب عيب ! فـشفني آنادي :
سجل ..... أنا من عرف عيبه وجاهربه
وسجّـل هنـا كلمـةٍ تستاهـل عنـادي
بقولها قبـل أسافـر وأتـرك التربـه :
والله ماأقسى من الغربـه عـن بـلادي
الا .. شعوري وانا في بلادي بالغربـه







زمان الدجى


بعـد التعـب عـودّت مثـل أي أنـسـان
بأنسى همومـي .. مثـل ماالنـاس ناسيـن

قعدت أقلّـب فـي الفضـاء كـوم بلـدان
من شاشة لشاشة و لا أدري علـى ويـن !

قلت أنبـش همـوم و كواليـس الأوطـان
و أشـوف هاللاهيـن فـي ويـش لاهيـن

أول قنـاة .. و فلـم عـن قصـة أخـوان
حبّّـوا فتـاة و فرقـت بـيـن الاثنـيـن !

ثاني قناة .. و وجـه .. أو لوحـة ألـوان
من لبسها .. وش لبسهـا ؟ ربـك يعيـن !

ثالث قناة .. و رقص .. واضواء .. وألحان
أجسـاد معروضـة مـن يـديـن ليـديـن

رابع قنـاة .. وشـاب مـن بيـن نسـوان
يشرح لهـن بإمعـان عـن موضـة ألفيـن

خامـس قنـاة .. و مـن صبايـا لفـنـان
لا والله إلا زغــردي يــا فلسـطـيـن

سادس .. وسابع .. كلهـا حملـة أعـلان
ثامن .. و تاسع .. مثـل باقـي العناويـن

عاشـر قنـاة .. ومنظـر يهـزّ الأبــدان
من شوفته ضاقـت علـى دمعـي العيـن

قبلـه وأنـا تحـت الغمـا بيـن جـدران
حول الحطب وأقسى علـى البـرد ويليـن

بعده وأنـا تحـت السمـاء فـوق طوفـان
وأحـس فـي صـدري سـواة البراكيـن

منظـر طفـل دينـه نسـخ كـل الأديـان
مسلـم يعـرف الله قبـل ينطـق السـيـن

منظـر طفـل مسلـم مـشـرّد ومنـهـان
بيـن المطـر والبـرد والجـوع والطيـن

عاري وخايف .. لأن كـم طفـل عريـان
فـي مثـل عمـره واندفـن قبـل يوميـن

جايـع ومـن كثـر القنـاعـة والايـمـان
يسكـت ويقـرا الحمـد ويـقـول آمـيـن

صوته عتاب .. ورعشـة ايدينـه احـزان
و نظـرة عيونـه مثـل طعـن السكاكيـن

في قلب مـن لـه قلـب مفعـم بالايمـان
وفي عين من له في زمـان الدجـى عيـن

يـا الله ياللـي عنـدك الـنـاس سـيّـان
تّجّار .. وضعوف .. وعبيد .. وسلاطيـن

حنّـا عبيـدك .. وأنـت ياعالـي الشـأن
أدرى بخبـث و غطـرسـات الملاعـيـن

يـارب تدحـر كـيـد عُـبّـاد الاوثــان
و تعـزّ نـاسٍ همّهـا نـصـرة الـديـن





غمازتين وسله

أشتاق / لك
وأوقف على مطلع شعر قلته خبال وراق / لك
وأدوّرك
أنا أذكر أني قلت / لك
الشعر هذا مايليق ..
وجاوبت ِ : لكن لاق / لك

* * *

شيطانه أنتي
ماتحبي من بناتي الا بنتي اللي أنتي فيها بنتي
كم صار لك يابنتي
ماعاد بيّنتي
مدري ليه ! ..
يا أنتي كنتي منتي انتي يوم شفتك !
والا شفتك ..
يوم انتي منتي كنتي أنتي !

* * *

يا اجمل من عيون خل ٍ ينتظر خله
بغمازتين وسله
فيها سحاب وعيد
وطيور مبتله

* * *

آه لو تجي ..
تسقيني الحب الغزير
وأخذها بيديها وأطير ..
مدري لوين !؟
لكن أطير ..
ومتى ماينهكنا الهوى
أذوب وتذوب .. وتمرنا أسراب الغيوم
وأصير أنا غيمه
وتصير هي غيمه
وأسيل أنا فـ وادي
وتسيل في وادي
وأقول للمفرق :
محدٍ سأل عني أو مر من حولك
ويقول لي المفرق :
أسمع سراب أصوات فيها من هطولك
وأظنها كانت
لـ أهل ٍ ينادولك
وأصيح به : تكفى
يامفرق الوادي
أنا هنا مليت
مادلني أصحاب
ولا دلّني غادي
قبل انطفي وأجف
(خذني على بلادي)






المدينه والغريب


جا يشـوف الحـال كيفـه بعـد ماهـزه حنينـه
وقبل يسألني سألتـه : كيـف حالـك يالحبيـب ؟

قال : انا كنـي غريـب ضيـع دروب المدينـه
قلت : انا كنـي مدينـة تنتظـر رجعـة غريـب

قال : اجل وش فيك تكره سيرة الحـب وسنينـه
قلت : أجل وش لون ما اكره سيرته دامك تغيـب

انت لا من غبت حتى مرايتـك صـارت حزينـه
كيف ما تبغاني أحزن وانت لي حظ ونصيـب !؟

الهدايـا و الرسـايـل و المكاتـيـب الثميـنـه
والليالي و القمر و الريـح و الكـون الرحيـب

كل ما تبعد .. تجيب الشعـر ليـه مـن يدينـه
و تقعد جروحـي تـودي فالطواريـق و تجيـب

يا بعـد كـل القصيـد و نـزوة حـداه و انينـه
لا ذكرتك لاح بيت .. و طاح ورد .. و فاح طيب

و ان نسيتك ما نساني صوتك المبحـوح لينـه..
.. ياخذ لجرحي بثـاره مـن خطايـاك و يطيـب

و بعد هذا جـاي ترمـي ذنبـك بوجـه المدينـه
مـا دريـت ان المدينـه كلهـا شمعـة غريـب






صالات المطار




قبل اسافر كنت جالـس فـي زمـان الأنتظـار
ارتشف هم المكـان .. و كـل همـي حاجتيـن

كنت خايف من يباس .. و كنت خايف من خضار
كنت اخاف انك تجين و كنت خايف مـا تجيـن

لين شفتك مـن ورا بيبـان صـالات المطـار
مقبله من كثر شوقك .. كنت اشوفـك تركضيـن

مرةٍٍ ركضـك يميـن و نظـرة عيونـك يسـار
و مرةٍٍ ركضك يسار و نظـرة عيونـك يميـن

تايهة .. ما كنـك الا ضحكـةٍ وسـط انكسـار
ساكتـه .. ماكنـك الا دمعـةٍ فيهـا حنـيـن

خايفة .. وجلة .. حزينة .. يعني كنتي بأختصار
تشرحين لكل جاهل معنـى كلمـة ( عاشقيـن )

بعدهـا جيتـك ولـدّت عينـك و دار الحـوار
من كفوفـي دمعتيـن و مـن كفوفـك دمعتيـن

كنت اصد و كنتي انتي ثايـره مثـل الشـرار
ماعلى لتغة لسانك غير كلمة ( وين ؟ ويـن ؟ )

واذكر اني رحت قبل ابدي لـك ايّـة اعتـذار
رحت حتى قبل اطيّب خاطـرك فـي كلمتيـن

لكن انتي عارفتني زين واللـي صـار صـار
سامحينـي واذكرينـي قـدّ ماانتـي تقـدريـن

اذكريني لاانتهت للشمـس رحلـه مـع نهـار
واذكرينـي لاصحـى للصبـح ورد الياسمـيـن

واذكريني لا لمحتـي فـي ليالـي البـرد نـار
واذكريني لا سمعتي للمطـر صـوت ٍ حزيـن

اذكرينـي واذكرينـي واذكرينـي .. بأختصـار
..اذكري فهد المساعـد قـدّ ماانتـي تقدريـن !






صلاه وعناقيد


عدّى عمر .. ياليت الأعمـار تنعـاد
وأرجع بـلا شيـب وبليـا تجاعيـد

أرجع وأضم أبوي وأقـول: لا عـاد
تموت وتتركنـي مثـل ليلـة العيـد

يوم اسألوا عنـك الصبايـا والأولاد
وقلت:أمي تقول انـه مسافـر بعيـد

بكيـت ليلتهـا وناديت..مـا فــاد
وظليت أصوت لك .. وأناديك وأعيد

عوّد يا بوي وجب لي ثيـاب جـداد
يا كثر ما تنسى يـا بـوي المواعيـد

بكيتـك لحالـي وأنـا كنـت معتـاد
تكف دمعي بـإيد وتضمنـي بـإيـد

كم كنت محتاجك تجي كنّـك رقـاد
تمطر من كفوفـك صـلاة وعناقيـد

احتجت لك طفلٍ كسر قلب الأعيـاد
واحتجت لك طيش وشباب وتناهيـد

واحتجت لك شاعر له أحباب وأضداد
واحتجت لك رجال يخشـى المناقيـد

احتجت لك .. واحتاج لك ظل وسناد
العمر ينقص واحتياجـي لـك يزيـد






الطفل والمحارم
كــــان في وسط المدينه...
طفلٍ أكبر من سنــــينه..

والده مات بحنــــانه..
ولاقعد يندب زمانه...

صادق هموم الشوارع ..
يمسح الدمـــع ويصارع ..
طفل لكن كان بارع ..
مات ابوه وجا مكانه ...

يمسح أطراف القوايل عن جبينه ..
يبعد الشمس ويطاردها بيدينه..


طفل أحزانه معالم..
طيب وسمح ومسالم..

يمشي ويطوح بصوته ..
يبغى قـــوت أمه وقوته ..


المحارم....المحارم....المحارم ..
المحارم....المحارم....المحارم ..


ولا أقبل الليل ..ورحل وجه النهار ..
راح لامه مثل الأطفال الصغار ..

وأرتمى في ...حظنها ..
أرتمى في....جفنها ..
أرتمى في....حزنها..


وقامت امه تبكي لضيعة سنينه ..
وصـــــاح...يمه
ليه يــاعمري حزينه؟ ..
دمعتك يالغاليه والله ثمينه ..


تحسبين أني حزين؟ ..
لا..وراسك ما ألين ..
من لقى هذا الحنين ..
ينسى حزنه..
ينسى همه...
ينسى حتى العمر كله..
دامــــك أنتي تحترينه..


وفي صباح من صباحات الضياع ..
الحزن قدر يقول له الوداع ..


نـــــــــادت أمه...ماسمع ..
صـــــاحت أمه...مانفع ..
طـــــاحت أمه...مارجع ..


الصغير اللي ملى الدنيا صراع...
مـــــــات ....من كثر الوجع











يبه


يبه وانا بعد اثنعش عـام حسيـت
اني قـدرت اقـول شـيٍ كتمتـه

ابطى قصيدي ماانكتب فيك وابطيت
اجر صوتي وارجع اجر صمتـه

ماودي اكتب بيت واندم على بيـت
ماهوب شعر الشعر كاني زهمتـه

الشعر كانه ماانحنى ليّّ .. ماجيت
ان ماعـزم مرثيتـك ماعزمـتـه

ان ماكتبته باازرق الدمع وابكيـت
كل الجـروح المبطيـه مارحمتـه

يبه وانا من بعدك ابـو التناهيـت
مامـر طعـمٍ للحـزن مانهمـتـه

يبه ( يبه ) كلمه وانا كل مااوحيت
كلمة ( يبه ) صديت والوقت لمته

يبه ( يبه ) كلمه وانا كـم تمنيـت
اهدم بها وابني بها اللـي هدمتـه

يبه وانا لاضقت رحت وتهجيـت
ركون بيـتٍ ضـم حلـمٍ حلمتـه

يومك تعلمنـي الامـن تحاكيـت
درس الحياه اللي كبرت وفهمتـه

هنـاك كانـت دلتـك لاتقهويـت
وهناك كان يساق طيـبٍ حشمتـه

وهناك ايه اذكرني هنـاك خليـت
طفلٍ مـلا بالدمـع دربٍ رسمتـه

هناك جاني علمـك انـك توفيـت
وهناك خاويت الشقـا واحتزمتـه

واليوم قلت اليوم يومـي ومديـت
كف القصيد وطاح شعر ونظمتـه

لكن بعد صمت اثنعش عام حسيت
اني عجزت اقول شـيٍ كتمتـه !!







دفتر اوجاعي


اكتب واسلّي خاطـري بـ(الكتابـه)
كود التهي في نظم الابيـات وانسـاه
واثر القصايـد منـه قامـت تشابـه
من وين اقلّب دفتـر اوجاعـي القـاه
هـذي قصيـده قلتهـا فـي عتـابـه
وهـذي قصيـده قلتهـا يـوم فرقـاه
وذيك القصيـده قالهـا مـن عذابـه
يكتب قصيدٍ منكسـر بـس مااحـلاه
ويقول: (( جابه كان تقـدر تجابـه))
واقول شعرك لعن ابـو مـن تحـداه
ويروح يضحك ما اقتنع في الاجابـه
ويقول: (( شعرك زين بطّل محاباه))
واقول: ((طبعا زيـن لأنـك زهابـه
لاصرت روح البيت وش لون تبغاه))؟
واليـوم ذاك الوقـت جمّـع شبابـه
واقفي ولاادري صاحبي ويـن وداه؟
رضيـت مــدري ذل ولا مهـابـه
ابعـد واهـلّ الدمـع لأيـام ذكـراه
الشعـر والليـل وبيـاض السحابـه
والضحك والحظ الـردي والمعانـاه
كلّـش يذكرنـي بـوقـتٍ غـدابـه
ياوين أبرمي هالجسـد فيـه وانسـاه

اختيار موفق .

يعطيك العافيه.

تقبلي مروري,,,,


بلا حـــــــــــــدود.

المشاركة الأصلية كتبت بواسطة بلا حدود

اختيار موفق .

يعطيك العافيه.

تقبلي مروري,,,,


بلا حـــــــــــــدود.

الله يعافيك بلاحدود

وتسلم على مرورك

تحياتي لكـ

اختيار موفق .
ونقل رائع
يعطيك العافية

المشاركة الأصلية كتبت بواسطة بعد نظر

اختيار موفق .
ونقل رائع
يعطيك العافية

الله يعافيك اخوي بعد نظر

وتسلم على مروك

تحياتي

يعطيك الف عافيه
وفهد المساعد بلاشك من الشعراء النادرين في أدائهم وصدق مشاعرهم

دامت لك السعاده

اخووك