( <> ) أصـبـر عـلى الـوقــت ( <> )

ذكر الله ابدأ به بيوت وثيــــــــــــقه= خير من الدنيا ومن كل منطــــــــوق
يوم ان ذكر الله افضل طــريـــــــقه = يوثق به المعنى على خير مـــوثـوق
والبحر ما ظنيت يرحم غريــــــــقه = والباب ما ينّتصّ لو ما به حلــــــوق
والنحل لو ما أخذ الغذاء من رحيقه = تـصـبـح مــواريد الـعسل ما لها ذوق
وغيري بنى له قصر وسط الحديقه = ويلقى مطاليبٍ على غيره تفــــــــوق
وأنا شكيت من الحياة المحيــــقه = وأصبر وغيري دايم الدوم مـمحــوق
لكن ما أتسمع من تزايد شــهــيـــقه = هذاك معروفٍ له الطاق مـطـبــــوق
وأنا أدري أن أهل النفوس الحميـقه = مثل اللباس اللي من الخلف مشقــوق
وأجلس مع نفسي وأجدها عـريـقه = من اصل طيب ما وجد عندنا البــوق
ولا ندور على الأمور الزهيــــــقه = وأبغى رفيق يعرف الحق وصـــــدوق
ان قال علمٍ ما يقوله بـضـيــــــــقه = ويعطي صدوق القول ما فيه مـلـفـوق
ان مالت الدنيا أخذني بـفـريــــــقه = وان قلت له سرّي يحطّه بـصـنــدوق
سوالفه فيها معاني عـمـيـــــــــــقه = واللي سمعها من العرب لازم يفــوق
والبوم بوم ينعرف من نـعـيـــــــقه = والحُر عالي في السماء فوق وسبوق
وانا كرهت اهل الطرب والـمسيقه = اما مجال الشعر انا فيه مــعــشـــوق
الابواب عند الناس يمكن غـليــــقه = لكن عـنـد الله مـا فـيـه مـغـلــــــــوق
وانا لقيت النفس دايم رقيـــــــــــقه = لكنها غمات وان شاء الله تـــــــروق
وختامها اصلي بحق وحــقـيـــــقه = عد السحاب وعد ما لاحت بــــــروق
على نبيّ الله خير الــخــلـــــــــيقه = وآخر رسولٍ حق للمسلم حــقــــــوق