انا ماغــرني طولي ولا حـتى نســب جدي= بري مـن تهمـة المغرور والتهمه من أحـبابي
انا مـثل البشـر عـادي بقـايا انسـان منهدي=لبست الحزن مـن صغـري وهمـي زين ثيابي
شـربت اللي بعد محد(ن) شرب قبلي ولا بعدي=مرارة وقـت من كاس السـنين وطاب مشرابي
أكـلت أكبر مـصايب جـابهت قلبي على كبدي=تعلـمت التـعب وانا صـبي مقبل على أتـعابي
يقـول الله فـي آيـاته العظـمى كـفر عـبدي=وانا اللي أغفـر اذنـوبه الـى تاب وطرق بابي
وانا وقـت الصـغر مافـارقت سـجادتي يدي=الـين اليـوم وانـا عـابد(ن)ربـي وطـلابي
غنـاي وراس مالي طايع(ن) ربي على وعدي=ولامره شـعرت الا مثل ناســـي وأصحابي
عرفت ان الزمن والوقت واحبابي سوا..ضدي=انا في نظـرة الجـاهل خفـي والناس تغتابي
لقـيت اللـي أحبه واذرف الدمـعه على خدي=علـشانه ومـن شانه تركـت الاهـل واقرابي
مـناي انسـى سنين الهم وانسى بالهوى جهدي=ومـاقد شـاب له راسي قدر في صفحة كتابي
بذلـت الروح والغايه على قدري وعلى عهدي=ولاحـاولت ابعد عـن هوى روحي بالاسبابي
أحـبه حـب واهديله تعب روحي..جنى ودي=اسافرلـه وقلبي عـالق بروحـه الى غـابي
منـسيني زمـان المـر ماقلت الزمـن ردي=فرحـت بفـرحته لـيّه وغنـيت وتغنى بي
وقـال انـي مـعه مغرور بافعالي ومن قدي=صُـدمت وشـبّت الدنـيا بقلـبي نـار شبابي
سمـع هـرج العـذول ولافهم قولي ولاقصدي=وصـار العـاذل الصـادق وانـا لاقـلت كذابي
تـرى الانـسان آخر دنيته حفره من اللحدي=ولاينغر الا مـن نسـى قـبره مـــن ترابي
دخـيلك لاترجـعني زمـان قد مضى بعدي=انا تكفيني اسباب(ن) جناها حضرة اجنابي