كل المعاني السامية قد تجلت=باعظم بطولة قادها الصقر شيهان
عبدالعزيز بهمةٍ قد تعلت=صمّم على حلمه وحققه مالان
دخل رياض العز من بعد ملّت=فراق سادتها وهو حيل عطشان
واقبل لها خاطب وهي له تحلت=يدفع لها مهر ٍ تغلى بالاثمان
مهره لها جد ٍ وروح ٍ تملت=عزم ٍ وتصميم ٍ ومجهودْ وإيمان
ورحبت بالشيخ حب ٍ وهلت=وصارت لذاك الصقرمربع وميطان
وعاشت بظله وافية ما تخلت=تحفظ له المعروف لو طالت ازمان
نفسه عزيزة ما حصل يوم كلّت=ايلين وحدها بتوفيق رحمان
وصارت بلادْ موحدة واستقلت=عن كل ضيمْ وعاشت بعزْ وامان
وشفنا السعادة والمسرات حلت=وصرنا بفضل الله في وضع الاخوان
من عقب تشتيتٍ وحربٍ تصلت=وظلم ٍ وتشريد ٍ وقتل ٍ وعدوان
عشنا الحضارة والجهالات ولّت=والنهضة العظمى على كل ميدان
مصانع ٍ قامت وفيها استظلت=بيض السحاب اللي لها فوق عـُـلوان
والجامعات بكل الارجا تعلت=منها تخرج كل عالم وفهمان
والا المدارس يوم بالنور شلت=الناس من جهل ٍتأصّل بالابدان
وعندنا القوات بالنصر خلّت=المعتدي يرجع ذليل ٍ وخسران
يافخرنا يوم المطاليق سلّت=سيوفها اللي حطمت كل شيطان
بالمملكه كل المخاليق صلّت=حمد ٍ لمن قيّض لنا ذاك الانسان
عبد العزيز اللي له الكود ذلّت=ايلين وصّل حدها حد نجران

تحية طيبة
يشرفني المرور من هنا لأسطر اعجابي بهذه الكلمات

صح لسانك والله يعطيك الف عافيه

والقصيدة تستحق التثبيت