المختلــــــــــــــــــــــــــــــــس

البارحـة مانمـت متصـدّع الـراس=مصفـطٍ كوعـي مـخـده لـراسـي
متملمـل مابيـن هــم وهـوجـاس=تصافـق أفكـاري بحـزة هجاسـي
على صفيـح ساخـنٍ يشعـل اليـاس=مات الرجاء من حر وجـدي وياسـي
أنفث على يسراي إذا صـال خنـاس=مـن شـر شيطـان يثيـر الخناسـي
حسيت فيني مثـل طاعـون عمـواس=أرقـت فـي ليـل طويـل المراسـي
أسمع عواة الذيب في روس الاطعـاس=وأمسيت أجاوب صوت ذيب الطعاسي
شرق بـي الطـاروق والفكرمنحـاس=وهمومي القشـرى تهيّـض نحاسـي
همٍ يبحّربـي علـى مـوج وسـواس=وهـمٍ يودينـي لـشـط المـراسـي
سرح بي شعـورٍ بـلا دم وإحسـاس=وشرود ذهنـي متلـف لـي حواسـي
حولـي معاميـل ونـار وقـرطـاس=وساح القلم من يوم حمـي الوطاسـي
شبيت ضو الشعر فـي جـال كـراس=وتلعب بي الأفكـار لعـب الكراسـي
كني أنـا والليـل والشعـر حـراس=لا أرتاح لي بـال وطـال إحتراسـي
تلبسـت بـي خيبـة الظـن لـبـاس=والعقـل صابـه رعشـة والتباسـي
غدت ضلوع الصـدر قفـل وتربـاس=علـى طعـونٍ عفستنـي عفـاسـي
حنيم صدري مثـل نحـل بمغـراس=يبني الخلايا والعسـل مـن غراسـي
ضامي واشوف الماء يلالي في الكاس=ملح أجاج ويخـدع الشـوف كاسـي
متوشح ثـوب الأسـى درع ولبـاس=يـارب صبرنـي وجمّـل لبـاسـي
الصبر جمريحـرق الرجـل لأنـداس=ومن هو يـداوي كيّـة فـي مداسـي
أنا أشهـد أن الغـدر مافيـه نومـاس=يلبسك ثـوب العـرى وأنـت كاسـي
يصيّرك بيـن البشـر مثـل جسـاس=مقتـول حـيّ دون حـرب ودواسـي
ياوجد حالـي وجـد بـن بمحمـاس=في يـد غشيـم وجاهـل بالحماسـي
عليك ياعود الرطب عـذب الأنفـاس=ياطلع نخل متعلـي علـى المساسـي
عنقودك اللـي يتلفـه هـب نسنـاس=مايشـرب الا صافـي غيـر آســي
رعبوبـة ومرهوفـة القـدّ مـيـاس=ليونـة أطـراف كساهـا الميـاسـي
كثبان طيب وعـود يشبـه لريمـاس=مصبوب صـب كاللجيـن بسلاسـي
يانور شمس منبلج عقـب الاغـلاس=لامـن دلـج ليلـك يزيـد إنغلاسـي
نورك الى من جيت من بيـن جـلاس=مثل القمـر بيـن النجـوم الكناسـي
شوفك يخلّ العقل فـي كـل قرنـاس=وش عاد أنا اللي أختل من القاع ساسي
غمستنـي فـي لـذة الحـب غمـاس=لا قلت كافـي زدت فـي الإنغماسـي
يبست غصوني ياهوي البـال يبّـاس=وطاح الورق مـن كثرقـوة يباسـي
وذبلت رموش تسهـر الليـل نعـاس=وأجريت دمـع فـي عيـون نعاسـي
لامن نويت أحـدّ بالسيـف والفـاس=ثلمـت بعيونـك سيوفـي وفـاسـي
قطعت حيلي مثل ما قطـع الآمـواس=واللي رجيتـه منـك خلـك مواسـي
يامختلس نبـض المساكيـن خـلاس=أرفـق بقلبـي دام نـاوي أختلاسـي
أعلنت لك مـن أول العـام الإفـلاس=ماعاد عنـدي شـي عقـب أفتلاسـي
تعـال ونّـس لهفـة الـروح ونـاس=يا ما حـلا اللمّـه وزيـن الوناسـي
رمسني بطيب الحكـي حيـل رمـاس=وطبطب علـى قلـب لـواه الإياسـي
فالطبع يغلب على التطبع والإحسـاس=مايـزول ثابـت كالجبـال الرواسـي
وطبعي أحبك والهوى ناس عن نـاس=ياللي غدى لـي كـل أهلـي وناسـي
أصابعك ماهي سوى طـول وقيـاس=والنـاس ماهـي بالمناظـر تقاسـي
ناهيك عن العشره مع بعض الاجناس=كالعلم يوجـد بـه طبـاق وجناسـي
فيهم نحـاس وبعضهـم كنـه المـاس=ومحـدٍ يواسـي الماسهـا بالنحاسـي
تبقـى لعينـي دايـم الـدوم نبـراس=مابور فـي العشـره ولانـي بناسـي
لابـاس ياسيـد المخاليـق لابــاس=قدرك على عيني ولـو قلـت قاسـي
تدري لويش البارح إتصـدع الـراس=مانمت لأنك طيـف ساكـن براسـي