ومن غاص غبّات البحر جاب درّا

قصيدة للإمام تركي بن عبد الله بن سعود

طار الكرى عن موق عيني وفّرا=وفّزيت من نومي طرالي طـواري
وابديت من جاش الحشا ما تـدرّا=واسهرت من حولي بكثر الهذاري
خـط ٍ لفانـي زاد قلبـي بحـرّا=من شاكي ٍ ضيم النيا والعـزاري
سر يا قلم واكتب على مـا تـورا=أزكى سلام ٍ لابن عمي مشـاري
شيخ ٍ على درب الشجاعة مضرّا=من لابةٍ يـوم الملاقـا ضـواري
يا ما سهرنا حكمنـا مـا يطـرّا=واليوم دنيا ضاع فيهـا افتكـاري
أشكي لمن يبكي له الجـود طـرّا=ضرّاب هامات العدا مـا يـداري
يا حيف يا خطو الشجاع المضـرّا=في مصر مملوك ٍ لحمر العتـاري
من الزاد غاد ٍ له سنـام ٍ وسـرا=من الذل شبعان ٍ من العز عـاري
وش عاد لو تلبس حرير ٍ يجـرّا=ومتّوج ٍ تاج الذهـب بالـزراري
دنياك يابن العـم هـاذي مغـرّا=ولا خير في دنيا حلاهـا مـراري
تسقيك حلو ٍ ثـم تسقيـك مُـرا=ولذّاتها بيـن البرايـا عـواري
إكفخ بجنحـان السعـد لا تـدرّا=العمر مـا ياقـاه كثـر المـداري
ما في يد المخلوق نفـع ٍ وضـرا=ما قدّر الباري على العبد جـاري
واسلم وسلم لي على مـن تـورّا=واذكر لهم حالي وما كان جـاري
إن سايلوا عنـيّ فحالـي تسـرّا=قبقب شراع العز لو كنـت داري
يوم ان كل ٍ مـن عشيـره تبـرّا=حطيت الاجرب لي عشيرٍ مبـاري
رميت عني برقـع الـذل بـرّا= .ولا خير فيمن لا يدوس المحاري
نعم الصديق ليا سطـا ثـم جـرّا=يودع مناعيـر النشامـا حبـاري
ونزلتها غصـب ٍبخيـرٍ وشـرّا=وجمعت شمل ٍ بالقرايـا وقـاري
وحصّنت نجد ٍ عقب ماهي تطـرّا=مصيونة ٍ عن حر لفح الـذواري
والشرع فيها قد مشى واستقـرا=ويقرا بنا درس الضحى كل قاري
زال الهوى والغي عنهـا وفـرّا=ويقضي بنا القاضي بليا مصاري
وان سلت عمن قال لي لا تـزرّا=نجد ٍ غدت باب ٍ بليـا سـواري
ومن أمن الجاني على مـا تحـرا=وتازا حريمه بالقرايـا وجـاري
واجهدت في طلب العلا لين قـرّا=وطاب الكرى مع لابسات الخزاري
ومن غاص غبّات البحر جاب درّا=ويحمد مصابيح السرى كل ساري
وانا احمد اللي جاب لي ما تحـرا=واذهب غبار الذل عني وطـاري
والعمـر مـا يـزداد مثقـال ذرا=عمر الفتى والرزق في كف باري
وصلاة ربي عد مـا خـط بالـرا=على النبي ما طاف بالبيت عاري

الله يطيك العافية د/ ابو محمد

الدكتور الشاعر/مرعي الحمراني

صح لسانك منبع جزله يروي الضامي لها ..

يعطيك العافيه


******************************



والعمـر مـا يـزداد مثقـال ذرا
عمر الفتى والرزق في كف باري


****************************

الشاعر الدكتور مرعي الحمراني :: الله يعطيك العافيه في هذا النقل الموفق


وانا احمد اللي جاب لي ما تحـرا

واذهب غبار الذل عنـي وطـاري

والعمـر مـا يـزداد مثقـال ذرا

عمر الفتى والرزق في كف باري

وصلاة ربي عد مـا خـط بالـرا

على النبي ما طاف بالبيت عـاري

الكرام النبلاء
الصاحب الوفي
فارس بني عمرو
بن ظافر
التقدير لكم جميعاً وأتمنى لكم دوام التوفيق.

شكراً يادكتُر وهذا من طيبك
لاخلا ولاعدم ولاعدمناك ايها الكريم

احترامي وتقديري لشخصك

اخووك

قصيده قمة قمة قمة

للمعلوميه هي في شريط كاسيت أسمه ( وسم )

ملحنه بشكل جميل جداً جداً


أستاذي مرعي اشكرك ع نقلك والله إني كنت ابحث عنها

بيض الله وجهك ولاهنت

يعطيك العافية دكتور تقبل تحياتي

أشكركم جميعاً
وأتمنى لكم دوام التوفيق.