ياليتنا من حجنا ما سلمنا

بسم الله الرحمن الرحيم

كان هناك رجل يدعى بصري الوضيحي الشمري شاعر غزل وهزل ..

يوم كبر وتقدم به العمر حس بالندم على شعره ومافيه من غزل ومن أمور

هزلية فحدثته نفسه بالتوبة وعزَم على عليها وقال لولده الكبير:

أنا ودي أتوب وودي أروح أحج عسى الله يغفر لي ويرحمني ..

المهم نوى الحج هو وولده وتوكلوا على الله وسافروا إلى بيت الله الحرام

يوم وصلوا مكة دخلوا الحرم وطافوا وجاء بصري يبي يقبّل الحجر الاسود

وكان عند الحجر زحمة شديدة يوم وصل الحجر كان فيه جنب الحجر امرأة جميلة

وكانت شديدة البياض وفارعة الطول يوم شافها بصري ضاعت علومه ونسي حجه

وبدل ما يقبّل الحجر قبّل البنت ...!!!

البنت زعلت وقالت : كيف تسوي كذا وأنت بالحرم فجاء ولده يبي يلملم الموضوع وقال

تايه تايه يعني ( مهذري ومخرف ) فقال بصري قصيدة يرد عل كلمة ولده

( يمكن الرواية وبعض الابيات تختلف شوي لأن القصة قديمة وتختلف الروايات
بس هذا المشهور وبصري توفي عام 1250هـ )

التايـه اللـي جـاب بصـري يقنّـه
جدد جروح العـود والعـود قاضـي
جينـا نحـب ونطـلـب الله جـنّـه
جنّـة نعيـم ويـوم يابـس لحاضـي
ياليـت كانـت حبتـي فـي معـنّـه
يوم العيون عـن الخوامـل غواضـي
يا من يعاونـي علـى وصـف كنّـه
اشقـح شقـاح ولاهـق بالبيـاضـي
لا ريحـة قشـرا ولا هـي مصنّـه
ريـح النفـل بطمطمـات الفياضـي
ونهودهـا للثـوب الحمـر شولعنّـه
حمـرٍ ثمرهـن واقفـات غضاضـي
والخـد ذبّـاح القـلـوب المـرنّـه
بـرّاق مـزن لاعـج اللـون ياضـي
ياليـت سنـي علـى وقــم سـنّـه
بايـام مـا بينـي وبينـه بغـاضـي
أيـام جلـد الذيـب عنـدي محـنّـه
نصبح وزرق الريش لهـن انتفاضـي
واجـرح قلبـي جـرح واد وطـنّـه
غر المـزون اللـي وطنـه وفاضـي
والبيـض قبلـي محـسـن عذبـنـه
ونمر على وضحى جرى له عراضي
والبـيـض كــم واحــد يبسـنّـه
يبسـة شماشيـل العـذوق النفاضـي
عـزي لمـن غـر الثنـايـا كـونّـه
واركن على كبـده كـوي عراضـي
شوفـي بعينـي والـخـدم يركبـنّـه
بنـت الشيـوخ مخدميـن الفياضـي
على اشقح من زمـل ابوهـا مظنّـه
ركبـت عليـه اتشنطـح باعتراضـي
بمشجـرٍ مـن سـوق هجـر مغنّـه
على خياطة نـاب الارداف راضـي
وين أنت يا مشفـي علـى طردهنّـه
أنا طويت رشـاي واقفيـت قاضـي
أحـدٍ يطيـح بنـار واحــد بجـنّـه
وترى الحضيض اللي له الرب راضي




يوم رجع بصري من الحج سألوه جماعته :

هاه يابصري وشلون حجكم فقال بصري هذه الابيات التي

أصبحت مثلا يضرب إلى وقتنا الحاضر

ياليتنـا مـن حجنـا سالميـنـا

كان الذنوب اللي علينا خفيفـات

رحنا نبي نخفف ذنـوب علينـا

وجينا وعليها كثرها عشر مرات

الله يرحم بصري ويغفر له
واعذرونا على الاطالة وأرجو أن تنال هذه القصة إعجابكم
وسلامتكم،،