للبنات فقط ((اتحدى واحدة منكم تسويها؟))

بسم الله الرحمن الرحيم

الحقيقة هذا الموضوع للبنات فقط في يوم الخميس تم زواج الشاب خالد من فتاه أحلامه ...
وعزم خالد الأهل والأصدقاء وبعد خروجه من قصر الأفراح وهو في الطريق أتصل عليه بعض أصدقائه الذين وصلوا متأخرين حيث كانوا قادمين من مكان بعيد فقالوا أننا ذهبنا إلى القصر ولم نجدك فحلف عليهم أن يعشيهم وقال للعروس سوف اذهب احضر عشاء وقدم بلحم وطلب من العروس الطبخ وقام بإعداد وليمه لأصدقائه وبعد ما ذهبوا توجه إلى عروسه وإعطائها خمسين ألف ريال وقال قبل الزواج تحدوني أصدقائي أني أخليك تطبخين والخمسين ألف تستاهلينها لأنك جملتيني وبيضتي وجهي يأخت الرجال
في النهاية أرجوا الأجوبة من البنات فقط ...


ماذا لو حصل لإحداكن هذا الموقف هل ستفعل مثلها ؟

ما عليش على لقافتي ..

تعرف حب الفضول ..

تقبل مروري,,,هههههههههههههههاااااااااي

لي راي مارح يعجب احد علشان كذا اخليه عندي
واشكر صاحب الموضوع على التحدي

يعطيك العافيه

ضروري نشوف ردك يا ذات الشان وفي الأخير يبقى رأيك بس قولي ...
هالروايه سمعت فيها من منذ مبطي ... وتعددت الروايات في السرد وفي النهاية أن البنت طبخت وكسب التحدي الزوج وسلمه للزوجه ...
إن صحت الروايه فأقول أنها تستحق الزوجه أكثر من الخمسين ألف ...

الكاتب لك التقدير ...

والله مايدعبه لاهو ولا زملاه
في عهد من عروس وزيد اقعد اطبخ له
بس لو يقولي انه تحدي على 50 الف اكيد بوافق
يصلمو عالقصه المغبره

المشاركة الأصلية كتبت بواسطة غلا.....ي

ضروري نشوف ردك يا ذات الشان وفي الأخير يبقى رأيك بس قولي ...
هالروايه سمعت فيها من منذ مبطي ... وتعددت الروايات في السرد وفي النهاية أن البنت طبخت وكسب التحدي الزوج وسلمه للزوجه ...
إن صحت الروايه فأقول أنها تستحق الزوجه أكثر من الخمسين ألف ...

الكاتب لك التقدير ...

غلا..ي
القصه على قولك قريتها اكثر من مره ومن اول ماقريتها وانا كارهه الزوجه اكثر من زوجها
السبب ان اي زوجه ترضى تاخذ ثمن على اخطاء زوجها في حقها بتبقى على ذا الحال واردى الين يجي يوم ويتزوج عليها ويرضيها بغرفة نوم وشوية ذهب وعشرةالاف ويركنها على الرف
لما يروح يتراهن مع اصحابه قبل الزواج على ان زوجته تكون نشميه والا لا هذا يدل على ان مالها قيمه في نظره اكثر من كونها طباخه وخدامه بمسمى زوجه
يعني لو فشلته وقالت والله ما (تدعبه ) على قولة نووسه الا هو مراكضه بين المطاعم يجيب لهم عشا
وبعدها اش رح يسوي لها رح يوديها بيت اهلها مثلا ؟
والا رح يقلل هذا من قدرها عنده وعند اصحابه ؟

هذي الزوجه لو هي صاحيه من الصبح اليوم الثاني تلبس مريله وتلف شعرها بمنديل وتقعد في المطبخ وتسمي نفسها شاندرا وتصير شغاله لان هذا اللي يدور عليه

نطبخ مانقول لا ونفتح المجالس ونبتسم من الاذن للاذن ونقدم لضيوفه كل مايبيض الوجه لكن ماهو من ليلة العرس هي باليالله تقدر تمشي قدامه خل كمان تروح تبدع في المطبخ وتمد السفره علشان يبان قدام اصحابه انه ديك البرابر وانه ذابح لها (بس) من اول ليله وموريها العين الحمرا
العروس من حقها شهر تدلع فيه بالطول والعرض وبعدها لكل حادث حديث


رأيي الخاص واللي مايعجبه لايعلق
.
.

بصراحه............. لو انا مكانها:
يمكن انفجر!!!!
يمكن تطق كبدي!!!!!!!!
يمكن انتحر!!!!!!!!!!!
والعن الساعه الي تزوجت هالمتخلف فيها!!!!!!!
والله لو يعطيني مليون ماأضيع احلى واسعد يوم من ايام عمري اليوم الي احس نفسي فيه ملكت العالم عند ملكي لمن احبه............
اما هالزوج بصراحه انا اعتبره همجي وبايخ واصحابه ابيخ منه (يضيع يوم من ايام عمره ماراح ينعاد ولا يتكرر>>> ولو تكرر ماراح يكون مثل اول مره عشان تحدي سخيف؟؟؟؟؟؟؟
بس لو فرضنا وصارلي هالموقف الله لايقولها يارب.......... في نفس الوقت ماراح اناقشه في اي شي ........ بس مستحيل اطبخ يجيب لاصدقاء العازه ذولي من برا.......ولا يتصرف هو وياهم........
واذا ذلفو ........ راح اتفاهم معاه وعلى حسب رده راح يكون تصرفي.........

اشكر لك طرحك الجدييييييييييييد مره .................. تقبل مروري (صعود المستحيل)

يعطيكم العافية

مع احترامي للاخوات الا ان ارائهم عكس ما كنت اتوقع

وما قامت به العروس اشهد لله انها بنت رجال واصيلة

وهذا دليل انها جملت زوجها في يوم زواجها فكيف في باقي عمرها

هذه الزوجة التي ينشد بها الظهر ...

وش الفايدة اذا اخذت زوجه وصرت اعشي ضيفاني من المطاعم ,,,,

لنفرض انه لم يكن هناك تحدي وتفاجأ الزوج وزوجته بالضيوف يطردهم

ولا يضيفهم ؟؟؟

اما الخمسين الف فهي تستاهل واكيد لو انا في مكان الزوج رايح امتعها بشهرين

عسل ما تحلم فيهم اي عروسه وبلوشي مقبل كبسه ,,,,

يعني بأختصار ردود البنات ما اعجبتني ( ما عاد احد بيجي يخطب)

اخاف اقول انها دليل على انهم ...... بلاش ما ودي يزعلون مني ,,,,,,,,,,

ويبقى الامر في النهاية وجهات نظر

ولكم تحيتي

انا اشهد بالله انها بنت رجال وانها تبيض الوجه ويامراة زي كذا ماافرط فيها طول العمر

اما من ناحيه الردود فوالله غريبه مررررررررررررررة

اتفق مع الاخ سد الوادي

اشكر لك ابو باسل الجمعي هذه المشاركه ..دمت في خير..

الله يعطيكم العافيه جميع شي و احد ارغب في قوله هل المعارضين في كلامهم صادقين

سدالوادي: الصدق حبه ربي

بصراحه أعتقد أنه تصرفها سليم % بالمائه

السبب أنها طالما أنها تزوجته لابد أن تقوم بواجبها تجاه هذا البيت يمكن أنا ماأدري وش اتصرف وقتها لكن مما تربيت عليه أعتبره واجب لأنه خلاص اصبحت تنتمي لزوجها

ووجب عليها أن تعلي من شأنه مهما كان التوقيت ومهما كان الظرف...وجب عليها الطاعه لأنه برأي لن ينسى لها هذا المعروف وستبقى زوجه مقدسه لديه

يكفي أنها أكرمته وتنازلت عن وقت هي أحوج أن تكون تعيد حساباتها أو ترتب أفكارها لأنها مقبله على حياه جديده يكفي أنها تحدت أشياء كثيره وفعلت فعلتها

أشكرك أخي وهذه وجهة نظر


تقبل فائق التقدير

السلام عليكم ورحمة الله

مع احترامي الشديد لرجال المنتدى الرجال وليس هم المقصودين



هذه القصة قديمة ويمكن قد حصلت يوم كان الرجال رجال

يوم كان الرجل يهاب من اول يوم وتسمع كلمته

اما الان إذا كان الرجل من اول يوم زواجه ما يقدر يقول لا

للمصورة الاجنبية اللي اتفقت معها زوجته او اهلها تقوده وتتحكم

في وقفته وقعدته وحركاته المخجلة مع عروسه

او اللي يدخل على النساء مع زوجته وهي بلباسها

الشبه عاري تقوده لتتباهى به امام صديقاتها

او اللي يسمع الشاعر الغريب يتغزل في زوجته وهو مبسوط

ومصدقه

مثل هذا يجرؤ يقول عندي ضيوف سوي عشا ؟

لا احد يقول هذا ماله علاقة

ماميزنا بين صاحب القصة العريس وعرسان اليوم الا بتلك المواقف

فالله لا يطلعنا على الغيب

انا بقلك رأيي لو انا مكانها وحصل هالشي صحيح بتضايق لاني بعتبرهم ضيوف ثقال دم وقليلين ذوق ( لان مافيه احد عنده ذوق يتضيف عند معاريس بأول ليلة ) لكن بقول الشكوى لله ابتلاء وهو وش ذنبه مسيكين و بقول ابشر ياولد العم ولا يهمك وبسوي الي طلبه مني وانا ادعي عليهم هههه

لكن ... وما ادراك ما لكن .. اذا عرفت بسالفة التحدي البايخة بعدها وجابلي الخمسين تي تقولون عز الله ما يمنعه مني واحد لاني بعتبرها مهزلة مال امها داعي ولاهو وقتها ولاني لعبة يراهن بي ويضيع فرحتي لمجرد كسب تحدي سخيف ليثبت لهم انه سبع زمانه على حساب مشاعري وفرحتي

ابوباسل الجمعي
نشكرك على موضوعك الجميل
وعزالله انها نعم الزوجه وتستاهل الخمسين الف وزود
الى بيضة وجه زوجها قدام زملاه يوم العرس
وطبخت في البيت واكرمت ضيفانه والله يبغالها عزيمه
خاصه بها تفرح قلبها بعد التعب الي جاها من العزيمه
وتراهم نادرات اللي كذا
والله لوكان غيرها ماتكون سوت له ولالقمة واحده وقالت
الله لايبارك فيهم مالقيو الا يوم زواجي يجون فيه والله مااسوي لهم شي
تبغى تعشيهم رح عشهم برى
ولك كل التقدير