ولحدٍ مـن الدنيـا عظامـه سلومـي

قصيدة للشاعر بركات الشريف

نومك طرب وأنا بنومـي هواجيـس=ما ساهـرك بالليـل كثـر الهمومـي
أسهر ليا نامـت عيـون الهداريـس=وبالليل أراعـي ساهـرات النجومـي
قالوا جهلت وقلت جهـلٍ بـلا قيـس=الجاهل اللـي مـا يعـرف اليمومـي
أشـوف عـدلات الليالـي مقابيـس=ولحدٍ مـن الدنيـا عظامـه سلومـي
تضحك وتخفي لك خفـى الهناديـس=تفطـر لهـا يـومٍ ويـومٍ تصومـي
إعمل وتلقى وإفهـم العلـم بالقيـس=دنيـاك لـو زانـت تراهـا نقومـي
والعز فـوق معسكـرات السواديـس=ليا قصدت اللـي بالأشيـاء رحومـي
قـبٍ تنـازى بالنشامـا كـراديـس=والطيـر فـي روجاتهنـه يحـومـي
ليا توافق مشـور السـوء وإبليـس=تبـر منـه وعـز ربـي يـدومـي
بالليل أصالـي حاميـات المحاميـس=والصبـح ألاوي كـل قبـاً قحومـي
أربع سنين ودمـع عينـي أماريـس=والعين تسهـر كـن فيهـا هزومـي
وليا ركبـت معالجـات المضاريـس=يبرد علـى قلبـي لهيـب السمومـي
إن جن بنا مثـل النعـام الأماريـس=لا خف عجلٍ مـع رقـاق الحزومـي
أستلحق اللـي يطلبـون النواميـس=اللي من الأقصين وأدنـى اللحومـي
وإن جن بالميـدان مثـل الدواويـس=وطار الغطا عـن قانيـات الرقومـي
عـرجٍ بأهلهـن كنهـن القرانيـس=على الطريـح مصوبـراتٍ كظومـي
وليا سمك عـج الرمـك بالملابيـس=المسعـد اللـي حـظ ربعـه يقومـي
صوابنـا بالميـل عمـقٍ ليـا قيـس=وطريحنـا فـي مثبـره مـا يقومـي
ولا خير في كثر الحكـي والتماليـس=هرجٍ بلا فعـل يجـي بـه وهومـي
لومي على اللـي ينقلـون العبابيـس=وأهل الفرنج وكـل رامـي لحومـي
من لا يديس الرأ من قبل مـا ديـس=عليـه داسـوه العيـال القـرومـي
ومن لا يقلط شذرة السيف والكيـس=يبـدي عليـه مـن الليالـي ثلومـي
والقصر ما يصلح على غير تأسيـس=ومـن لا تعلـم مـا تفيـد العلومـي
ومن لا خذا الدنيـا بميـزٍ وتقييـس=مثـل الـذي يصبـح بليـلٍ يعومـي
كـلّ القلـم مـن كتبنـا للقراطيـس=وإركابنا مـن كثـر الأقـران تومـي
للشيخ من يعطي الفقارى المفاليـس=يبـدّل السـاعـه بـعـزٍ يقـومـي
والحـر لا دبـت عليـه النواميـس=يشهـر وعـن دار المذلـة يشومـي
وليا إكترب من بعض الأشياء نسانيس=إعـزم ولابـد الفـرج بالعـزومـي
باب الفرج يلبّسك نظيـف الملابيـس=ينجيـك بأيـام الكـرب والزحومـي
أوجس بقلبـي مثـل دق النحاحيـس=الله يلـوم اللـي لحـالـي يلـومـي
يجلى صدى قلبي ضبيـح المهاريـس=لا قـام شـراب القهـاوي يعـومـي
ودلالٍ فـوق النـار دايـم مجاليـس=إكرامهـن حـقٍ عليـنـا لـزومـي
من صنعة الصبة وخمس التخاميـس=بريـةٍ يعمـل بهـا كــل يـومـي
وبهارهـن هيـلٍ بليـا حواسـيـس=كيـفٍ يعـدى للنشامـا القـرومـي
عـدّه لحمـاي العيـاد المـراويـس=وألا الحصان اللـي بقينـه يهومـي
حتى يزيـن لنـا المثـل والتوانيـس=والكيف طاب لمـن يفـك القحومـي
وصلاة ربي عـد رمـل الطعاميـس =على شفيـع الخلـق يـوم اللمومـي

إعمل وتلقى وإفهـم العلـم بالقيـس
دنيـاك لـو زانـت تراهـا نقومـي


الله يعطيك العافيه د مرعي على هالقصيده الرائعه

تقبل مروري,,,,

إختيار رائع اخوي مرعي
لاعدمناك والله ولا ماتثرينا به من ابداعات
سلمت ودمت وصح الله لسان قايلها

احترامي وتقديري

اخووك

الغالي والتربوي : د / مرعي الحمراني ..

الله يعطيك العافية ..
أشكرك على هذا الحضور الرائع .. وهذا النقل الجميل ..

ننتظر منك المزيد والجديد والفريد والمفيد ..
والله لا يحرمنا من إبداعاتك وروائعك وتواجدك وتواصلك ونصائحك ودعائك ..


دمت بخير .. وفي خير ..

أشكركم جميعاً
وسعيد جداً بتواجد هذه النخبة من الكتّاب
بهذا الموضوع المتواضع
ولكم التقدير.