الشاعر المرحوم (ابراهيم القبيلي)أحد عمالقة الشعر بنطاع

قصيده للشاعر ابراهيم القبيلي رحمه الله
مساكم الله بالخير



وإليكم هذه الإبيات


وأرجو أن تنال رضاكم




يابو محمد طروق الغي ناسيها
من شارلك تمتحني قلت أشواره


ذكرتني حاجةً ماني بناسيها
والقلب لا دق طبلة صاح مزماره


حتى الدراويش في لازمك أخاويها
لبست لي جبةً وأشيل مطاره


والهجن لزمً أدنيها وأعنيها
تمشي بيانً وتعطي شرط وبشاره


ومواترً في جميع البلد أساعيها
بين السماء والتراب أركب بطياره


وطيت خدً سماري الهجن تحفيها
النير والمستوى وطويق وأدياره


وأجنبت يم اليمن لا سال واديها
دار اليمام البياضي جتكم أخباره


وأرمال يبرين أدوج في مضاميها
وعمان جيته وشفت وجيه سحاره


ناسً تبيع الحلاوي في صيانيها
سماكةً ياعضيدي هم وبحاره


وأشملت إبي هجر والديرة وأهاليها
حضرً و بدوً وحدارة وظهاره


وبشايت الله ماجيك ألا بطاريها
الحي لزمً يجيك الحي بخباره


والبرق شرفت في عاليها مباديها
وطيت خشم العدان ودجت في أبحاره


وقصورها قمت أدوج في مبانيها
وبطيخها اللي يبون الربح بثماره


دخلت لي ديرةً ما عرف أهاليها
من الصفاة الكبيرة وأبو دواره


لقيت ناسً تقلب لي لغاويها
شواف بدوً وحطابة وحماره


دخلت لا بايعً سلعة ولا أشريها
ظهرت عجلً وباروح لهل واره


جتني عجوزً تهرجني وحاكيها
حدباء ذلول لقايد الزين سباره


قالت لي أقعد وأبين لك مواريها
لا صرت جاهلً بها لأهل الهوى شاره


ترها هنوفً تحني لك مواطيها
تاطا بسروالها والزري كوراره


وترها هنوفً مقادمها شعق فيها
برقً حقوقً وهي للوبل نثاره


وترها هنوفً جديد اللبس يزهيها
تلبس أمكفت ومرً تلبس الخاره


واللي أمعنيك خابرها وكاميها
عند أجربه داله ضيعك بأفكاره


من خلقته ما تعدا بيت واليها
دايم يعمر سبيله من جمر ناره


في أكهيف وأنعير ومليجة مشاتيها
ودرعان والنوط والعدوه وفواره


ولا أستقبلوا وصلوا أسديره مناهيها
وأن أجنبوا وصلوا المدرع وصراره


خمس القرايا لحوايجها تقضيها
ألها معارف وهي للبلد زواره


لقيتها ياحمد يوم أنت مغديها
تدق ودً جنوبي من القاره

والله لولا الحياء لا قوم وأدعيها
لا هي بحصه ولا هي بأسمها ساره

للشاعر :إبراهيم القبيلي


ودمتم بحفظ الرحمن

الله يعطيك العافية على هذا الا ختيار


من خلقته ما تعدا بيت واليها
دايم يعمر سبيله من جمر ناره


في أكهيف وأنعير ومليجة مشاتيها
ودرعان والنوط والعدوه وفواره


ولا أستقبلوا وصلوا أسديره مناهيها
وأن أجنبوا وصلوا المدرع وصراره


خمس القرايا لحوايجها تقضيها
ألها معارف وهي للبلد زواره


لقيتها ياحمد يوم أنت مغديها
تدق ودً جنوبي من القاره

والله لولا الحياء لا قوم وأدعيها
لا هي بحصه ولا هي بأسمها ساره