...........عندمايكون الشاعرفارس الرهان ولسان القبيلةوووووووووووو؟؟؟؟

اروع ماسمعت في قصايد الصلح واعجبتني


ياسبيع ياهل الثلاث الي بها تعرفـون
واهل البخوت الكبار الـي تسمابهـا


واهل البشوت الوساع الي لها تلبسون
اللي تجمل وتذري مـن تـذرا بهـا

ياسبيع يالي على صم الرمك تحتمون
البل بشلف يفض الـراس مضرابهـا

ياسبيع يلي على وقت العسر تكرمون
ياللي على المصراعين تفتح ابوابهـا

ياسبيع يالي بتاريخ العـرب تذكـرون
تحكي التواريـخ عنكـم ونتحاكابهـا

ياسبيع لاكثرت الـردات ماتهزمـون
لاصاحت المحصنات وشقة اجيابهـا

ياسبيع ياهل الرماح الي تفض المتون
اهل عزوة ماتخجـل مـن تعزوابهـا

ياسبيع ياللي على سلم شرف تصعدون
العود يرقـا بهـا والغمـر يرقابهـا

ياسبيع ياهل الفخر من حقكم تفخرون
ولولا صـدوق العبـارة مانطقنابهـا

والله لولا اكتساب المدح ماتمدحـون
الاقول بعد الفعول امـوت واحيابهـا

عليكم البيـض ننشرهـا وتستاهلـون
والبيض لسبيـع حاضرهـا وغيابهـا

ياللي بنيتوا خيـام العفـو تستقبلـون
جتكم قبايل بنو قحطـان واصحابهـا

قبايـل يطلبـون الله ثـم يطلـبـون
ذبيحة ربطت فـي حـوش قصابهـا

بجاه ربي وبجاه الرسل والمسلمـون
نطلب رجـال تقـدر جـاه طلابهـا

عفوا عساكم نهار البعـث تستبعثـون
في زمرة الانبياء والرسل واصحابها

ياسبيع جينا لكم نمشي علـى ماتبـون
بعـد بلتنـا الـبـلاوي وابتلينابـهـا

حنا اللحم وانتم السكين والكون كـون
كانـت وبانـت وحنـا مادرينابـهـا

من غدر الايام لانسلـم ولاتسلمـون
بقعا تلـف وتـدور وتفتـل اشنابهـا

وحنا عن الغيب لانعلـم ولاتعلمـون
والدهر فسـر احـلام ماحلمنـا بهـا

واليوم جينا وبكرة جعلكـم ماتجـون
تشكون من نزعة الشيطان واسبابهـا

والنفس احانت وادانتها كبار الديـون
وابليـس لشـر وداهـا ولا جابهـا

تخضع تحت سيف الله حديد السنـون
امــا تعشابـهـا والا تغـدابـهـا

تسامحوا واعتقوها جعلكـم تعتقـون
في ساعة كل نفس تعـرف احسابهـا

وصلوا على اللي بنور هدايته تهتدون
نبينا اللي فتـح مكـة وصلـى بهـا

اللي رفع راية الاسـلام للمسلمـون
واهدم وهدم بيوت الشرك واحزابهـا


الشاعر//سيف كليفيخ القحطاني

الغالبي

يعطيك العافيه

قصيدة بالفعل رائعه ومعبرة

لك التقدير

حنا اللحم وانتم السكين والكون كـون
كانـت وبانـت وحنـا مادرينابـهـا

ليس مستغرب على قحطان

الغالبي
قصيده رائعه بيض الله وجهك

روعه والله وبيض الله وجهك انت والشاعر

بارك الله فيك يا الغالي


تخضع تحت سيف الله حديد السنـون
امــا تعشابـهـا والا تغـدابـهـا

تسامحوا واعتقوها جعلكـم تعتقـون
في ساعة كل نفس تعـرف احسابهـا

وصلوا على اللي بنور هدايته تهتدون
نبينا اللي فتـح مكـة وصلـى بهـا

اللي رفع راية الاسـلام للمسلمـون
واهدم وهدم بيوت الشرك واحزابهـا

الغالبي.

الله يعطيك الف عافية .
قصيدة جميلة ورائعة.
اشكرك على حسن الإختيار.
تقبل تحياتي.