(( جزل المعااااااااااااااني صوتية ))

بسم الله الرحمن الرحيم

أسعد الله أوقاتكم بكل خير للتواصل في هذا المنتدى الراااااااااائع
قصيده صوتيه آمل أن تحوز على رضاكم بعنوان (( جزل المعاني ))


http://up.9q9q.net/up/index.php?f=tRqYZw01w


أخوكم

الشاعر / الحميدي بن سعد السبيعي

الاخوة الاعزاء توضيح بسيط لتنزيل الملف لكي تستمع للمقطع
كامل الطريقة كالتالي أتبع الخطوات التالية .................

1- الضغط على الرابط وأنتظر حتى يفتح الموقع..

2- ثم أضغط هنا »» اضغط هنا لتنزيل الملف ««

3- يجيك بعد ذلك كلمة (( فتح ... حفظ ... إلغاء الأمر ))

4- أضغط على كلمة حفظ لأنه لن يشتغل معك قبل الحفظ

وأعرف أين حفظته... بعد ذلك يشتغل معك المقطع ,,,,

هلا وغلا بالشاعر القدير الحميدي السبيعي
الحقيقه ما فتح معي الملف ولكن اعتقد انك تقصد هذه القصيده التي كانت رد على احد الشعراء
ولا اقول الا صح لسانك وانت شاعر متفوق ليس بشهادتي بل بمقدرتك الشعريه وشهادة الشعراء

هلا مرحبا بالشاعـر اللـي بـدع لأمثـال=بدع من جزيـل القـول عـذب التماثيلـي
يصـوغ المثائـل هاجسـه دائـم ٍ شغـال=أهجوسـه تصافـق كنهـا شاطـئ النيلـي
أهجوسه ليا منـه تهيّـض كمـا الزلـزال=تصف القوافـي لـه علـى كـل تشكيلـي
تصف القوافي قدم عينـه علـى الأطـلال=ولا ينظـم إلا مـن خـيـار الاقاويـلـي
نظمها مثل نظم الذهـب داخـل السلسـال=نقاهـا نقـاوة مـا عليهـا مـدا خيـلـي
خبيـر ٍ بنظـم الشعـر للقافـيـة فـتـال=أليـا جـاك قافـه يعجبـك فيـه تذليلـي
يذلل قوافي الشعر حتـى تجيـك إجـزال=بيوتـه جزيلـة مـا دخلهـا هـوا زيلـي
على العد يا رد بالثقـة والحبـال أطـوال=ولا يـروي إلا مـن قــراح ٍ مناهيـلـي
هلا بـه عـدد نـو ٍ تزبّـر وفيـه أخيـال=مزونـه تركـز غـادي ٍ لــه تثاعيـلـي
على المملكة يا خـذ ليالـي وهـو همـال=يعـم الوطـن كلـه أقنوفـه همـا ليـلـي
وترجع ديار ٍ مسنيه عقـب وقـت أمحـال=وتشوف الخزامى عقب وقـت المماحيلـي
تشوف الخزامـى كاثـره والبـدوا نـزال=علـى مـد ربـي قـدم عينـك نوازيلـي
على مد مـن مـده يغانـي فقيـر الحـال=كريـم ٍ رحيـم ٍ رحمـة تعـدل الميـلـي
وهلا يا لرديني يا لوفي يا عريـب الخـال=هلا من هجوس ٍ صادقـة توفـي الكيلـي
هلا بك عدد من في رضا الله قطع لأميـال=توجّـه لبيـت الله يـسـوق الرواحيـلـي
أكرر لك الترحيب مـن هاجـس ٍ يجتـال=أهجوسـي بعـد خطـك لفتنـي مقابيلـي
لفت يا لردينـي مقبلـه ضاميـه وأعجـال=تسابـق علـى معنـاك وتصخّـر القيلـي
عقب ما قريت الخط طوّحت أنـا الدسمـال=وناديت هـا جـوس ٍ سريـع المواصيلـي
زهمته وقال أبشر على مـا تبـي فالحـال=تفضـل وهـاك الـرد وأغلـى مواويلـي
تفضل وهـاك الـرد للـي حـداه الـلال=حدتـه المسافـة وأتعبتـه المحـا ويـلـي
حدته المسافـة كـل يـوم ٍ وهـو رحـال=يبي شوف من شوفه يشافـي المعـا ليلـي
وعسى رأي أبن بلعوس يحقق لـك الآمـال=ويـد لـك علـى حـل ٍ يجيلـه مفاعيلـي
أنا أقول دام الترف صافي معك مـا مـال=فـلا تستمـع لهـل القلـوب المغـا ليلـي
ولا تعرض الشكوى علـى واحـدٍ دجـال=تـرى النـاس فيهـم مكثريـن الدهاويلـي
أخبـاث النوايـا وألسنتهـم قــراح أزلال=ولا غبت عنهـم كثـروا الحـط والشيلـي
أضعاف النفوس أهل الردى ترثت الأنـذال=يدلـك عليهـم يـا لرديـنـي دواليـلـي
وفا لناس نـاس ٍ تعطـي الـرأي للعقّـال=تقول الصحيـح ولا عـن الحـق تبديلـي
رجال ٍ تشيل الحمـل لـو الحمـول أثقـال=ولا تشتكـي يـا لقـرم شيـل الثواقيـلـي
على الصدق والإخلاص لهم دائـم ٍ منـوال=ولا تختلف عـن منهـج الطيـب وتميلـي
وترى العشق يا فالح على أهل الهوى غربال=وأنـا قبلكـم ذقـت العـنـا والغرابيـلـي
وقبلي من أهل العشق كم واحـدٍ قـد قـال=تعـذّب وراء طـرده بلـيّـا محاصيـلـي
وترى الحل عند الله وهو الواحـد الحـلال=ولا غير ربـي مـن يحـل العـرا قيلـي
وعليك الصبر لأن الصبر فيه وسعـة بـال=وتوجّه لربك كل مـا جـاء آخـر الليلـي
عليك التوجه بالدعـاء وأفضـل الأعمـال=ولابـد مـا يأتـي مـن الـرب تسهيلـي
وعسى الله يلم الشمل لو كان وقتـه طـال=وتعيش بسعـادة عقـب شـوف البهاذيلـي
وهذا جوابي يا ابـن عمـي علـى لأمثـال=بعد ما وصلنّـي نظمكـم جـاك تسجيلـي
وكل ٍ حسب عرفه ونهجـه نظـم لأقـوال=وأنا لي مع أهل العـرف منهـج وتحليلـي
أحب البيـوت الوافيـة والرجـال أشكـال=وأحب الرفيق القـرم وأغليـه بـا لحيلـي
وأنا من غلاك أرخص لك الحال قبل المال=وأقف في لزومك لو بحـد المصـا قيلـي
وختم الكـلام بذكـر مـن نـزّل الأنفـال=عظيـم الجـلال منـزّل الحـق تنزيـلـي

	الاخ صالح آل سلمان سلمه الله ورعاه... القصيدة التي نشرت ليست القصيدة التي بالمقطع حفظك الله وسوف أنشرهاااا هنا.. آمل حذف القصيدة التي نشرت حتى أنزلها هنا سواء إن شاء الله لكي لايأخذ الشاعر الذي أرسلي القصيدة في خااااطره لاهنت وبيض الله وجهك

قـال الـذي لا صـاغ قافـه وغـنّـا=حضّر عليه مـن الهواجيـس تسعيـن
تسعين هـا جـوس ٍ عليـه أحضرنّـا=كل ٍ يقول القـاف حاضـر وذا الحيـن
واختـرت منهـا كـل جـزل ٍ يـدنّـا=جـزل المعانـي لـي عليهـا قوانيـن
شاعـر ولـي فالشعـر منهـج وفنّـا=لـي منهـج ٍ واضـح بكـل المياديـن
أتـعـب وراء الـجـزلات واجيبهـنّـا=وأحسب أحساب اللي على الهرج ضارين
ومـن ألا حسـب للهرج منّـا ومـنّـا=ها ذاك في عيون الريا جيـل مسكيـن
لو كان لـه مـن يمدحـه فـي زمنّـا=أخبول ٍ تصفق له على الزين والشيـن
ويـا للـي بيوتـك هابطـه لا تعـنّـا=خلـك مـع اللـي يعشقـون الكراتيـن
شـاهـد كراتـيـنـك ولا تمتـحـنّّـا=وأعرف تـرى للشعـر عـدة موازيـن
لا صـار تجهلهـا فحـن مـا جِهلنّـا=حنّا هـل الجـزلات يـا رايـب العيـن

الحميدي السبيعي ..
مشاركتك جزلة وأنت جزل ..
أبيض وجه والله يعطيك العافية .. ونتمنى تواصلك فأنت ممن نكن لهم التقدير والإحترام ..
لك التقدير ..

تعيش يا من بالجزيلات هنا ... هنا قلوبٍ تنتعش بالبساتين
يا زين ما نقراء وما قد سمعنا ... ممن يثمن كل كلمة بتثمين
جزل المعاني إسمٍ على مسمى.... الله يصح لسان مثلك ملايين



صح لسانك .. وسلمة اناملك وصوتك

الحقيقة قصيدجة رائعة بروعة صاحبها

المشاركة الأصلية كتبت بواسطة ابو ريان

الحميدي السبيعي ..
مشاركتك جزلة وأنت جزل ..
أبيض وجه والله يعطيك العافية .. ونتمنى تواصلك فأنت ممن نكن لهم التقدير والإحترام ..
لك التقدير ..

الاخ الغالي ابو ريان ماعليك زود طال عمرك
ولاهنت على مرورك العطر وأبشر باللي يرضيك

المشاركة الأصلية كتبت بواسطة أبو عابد

تعيش يا من بالجزيلات هنا ... هنا قلوبٍ تنتعش بالبساتين
يا زين ما نقراء وما قد سمعنا ... ممن يثمن كل كلمة بتثمين
جزل المعاني إسمٍ على مسمى.... الله يصح لسان مثلك ملايين



صح لسانك .. وسلمة اناملك وصوتك

الحقيقة قصيدجة رائعة بروعة صاحبها

الاخ الغالي أبو عابد صح لسانك على هذه الابيات الثلاثة
التي تسوى ثلاثين بيت ولاهنت على مرورك العطر وتقبل
صادق مودتي وتحياتي وتقديري لشخصك الكريم