عدسة الأعضاء

مطل الفندق # انترلاكن

لوزان.. سويسرا
..

ذاك الليل انا في الديرة و خاطري ضايق قال اخي نايف وش قومك مشتحن قلت ودي نطلع للبر و نرقد هناك و اذا اصبحنا نرجع للبيت
قال الا وش رايك نكلم فهيد و سعود و نصيد من الضبان المقسوم و نتغداء عليها و نرجع
قلت كلم العيال و كلمهم و اتفقنا بعد نقاش جدلي على الوجهه تكون بين المنخلي و المندفن على طريق شرورة اذا فرقت مع سلطانة و انت جاي من الوادي
المهم و نجهز عزبتنا



طبعا ما كثرنا دباب ماء ( دباب جمع دبه )
و نسري في ليلنا خذا المشوار منا ساعة و نصف و نفرش فرشنا على الساعة وحدة في الليل
و احلى حاجة تسولفون في البر و انتم متسدحين
ماش ما صورت صور فطورنا و مراقدنا

بعدها نروح لمكان العمليات الي بيجي فيها شل ابوك و حط ابوك و المشكلة ما صورت الا آخر ضب



في الصورة اعلاه المحدث و هو قابض على الضب بعد ان نقزه من جحره بالماء

المهم على الساعة 10 ضحى قد معنا 10 ضبان
و حنا 4 قلنا بنروح لسلطانة و نستاجر لنا شقة نركب غدانا هناك
و نذبح الضبان و نفوحها في ماء حار ما قدرنا نشلوطها فطبخنا عليها فوح واحد و نظفناها



و في الصورة الجايه شحم الضبان نطلعه عشان نحمس به البصل
شحم الضبان يسمى زهوم



و هذي صورة الكبسة اقسم بالله انها علاج و خصوصا للشيبان الي اذا جا آخر الليل و حصل عجوزه راشة المفرش بغرشة فدور قام يصيح يا ركبي يا ركبي
عكرة ضب كفيله بأن تقوم انت برش الفدور على السرير


عاد الحين عقب الطقاق يالله عطوني نص الدبة ام ريال مرق و عبلتها بلبن
طبعا قبل اعبلها غمستها في ثلج بالترمس
و شربت ذيك العبيله الي علي الحرام انها في النخاع المستطيل

هههههههه ايوه يارويال الحمد لله اني شفت الصور
وانا جوعانه صح لحم الضب لذيذ لكن الشحم والعبيله
كلام ثاني يخليني اصوم شهر ههههههه

احلى جلسه 😍😍😍

جيت اليوم الصباح للديرة من الشرقيه دايركت
على السليل و اطلع للمزارع فيها حركة بيع و شراء
و هذا صورة رشاش محور سبع ابراج نصف دايري
زارعين فيه ذرة و ننتظر الحصاد


و هذا رشاش 4 له سنتين و حنا نحصده كل شهر
برسيم طبعا و البرسيم كل شهر حصده و لكن اذا كمل سنتين نخلي الجماعه يهدون بابلهم فيها







عقبها اروح صوب الرشاش الآخر عبارة عن برسيم ثلاث ارباع دايرة بايعين برسيمه من فضل الله اللبنه 18 ريال و الي خلانا ما نخليه دايري النخل القديم و لا بغينا نقشع النخل




عقبها اروح صوب لاخر برسيم بعد بايعينه بعد اللبنه من 18 ريال




ثم رحت صوب النخل الجديد الي غارسينه قبل 4 سنوات



و هذي صورة لفسايل النخل البنات نقشعها و نغرسها في مكان ثاني و هكذا يتكاثر النخل و في الصورة بعد باقي عذق رطب ما بعد صرمناه



و هذي صورة لفسايل تونا مغرسينها



و بعدها رحت صوب الرشاش الثمانية ابراج برسيم
و باقي عليه اسبوعين و نحصده




بعدها رحت صوب الرشاش الي عقبه عبارة عن ست
ابراج ذرة او قصب او مدري وش تسمونه نفس الي اول صورة بالضبط و عادة ينتج اكثر من 20 الف لبنه نبيع اللبنه بفضل الله و كرمه حاليا في السوق 14 ريال و مدة الزراعة شهرين كامله و تختلف عن البرسيم انها حصده واحده فقط بعكس البرسيم الي كل شهر حصده مدة سنتين






الرد الي عقبه بيكون عن الابل

رحت ابشوف الابل و اصطبح من حليب الناقة الي توها ناتج قبل اسبوع او اسبوعين
و ساعة اقبلت على الابل الا العامل قد سرح بها صوب الرشاش الي هادين فيه الجماعه
و هذي ابلنا الله يطرح فيها البركة قولوا امين


و هذي صورة مكان المخيم و يظهر في الصورة المقلط اما المجلس الكبير ( بيت الشعر الكبير ) نطويه اذا انتهى الشتاء و اذا جاء الشتاء نعود نركزه و الحين متجهزين جايبين رد قلابي كنكري او حصماص صغار زي ما تسمونه سموه



و هذي صورة الخلفة اهي و بكرتها ما نهدها مع الابل نخليها لين تكبر الحوارة بعدين نظهرها مع الابل
يا مال البركة و الزين



حوارتها منسدحه بجنبها
رحت عاد ابي اقوم الحوارة





و هذي عاد للفايدة لكل قبيله او لكل فخذ من اي قبيله وسم خاص بابلهم بما فيهم آلسعود
و هذا وسم فخذنا معروف عند اهل الابل ان هذا الوسم خاص بالقبيله الفلانيه
وسمنا عبارة عن حرف T على جنب و يسمى المبيعيج على جدنا الي بعج الخطه يوم حربنا في الماضي ضد احد القبايل



اما الي في الصورة الثانيه ما يسمى وسم و لكن يسمى الشاهد و يخص عائله معينه و هو يخص ابل ابي و عماني و هو عباره عن مطرق و فوقه رقمه


يعني اذا ضاعت اي ناقه و حصلها واحد بيشوف الوسم و يذكرها للقبيله الفلانيه و اي واحد من القبيله هذي يجيه خبر و يذكر الشاهد بيعرف الناقه هذي لمن

و هذي عاد صورة للتبن ( في وجه العدو )



و ينتج التبن ( في وجه العدو ) اذا حصدنا البر و دخلنا العيش للصوامع نجيب اللبانه و نلبن الحصيده و كان انتاجنا في الموسم الي دخلنا فيه كاخر موسم تستقبل الصوامع العيش من المواطنين
حوالي 800 طن من البر و يمكن تزيد عبارة عن 4 رشاشات كبيره و انتجنا حوالي 36 الف لبنه من التبن و في الصوره اعلاه يبين انا قد بعنا اكثر من النص و تختلف الاسعار اول ما بعنا بعنا من 10 ثم وصل السعر اليوم الى 13 ريال

في النهايه اقسم بالله ان الدوجه في المزارع تسوى شيء واجد

رويال

كل الصور جميلة ما شاء الله تبارك الله الله يزيدكم من فضله .
اما الضبان فالله يديم النعمة جربتها مرة بالخرخير وتوبة . ههههه

ما شاء الله يا رويال الله يطرح لكم البركة
في مالكم وحلالكم

من الشفاء ( بني خالد )

الحمد لله على سلامة رويال الصغير
زلق من السيراميك و لا وقع الا على جبهته على درج الجلسه حقت الصالة مرتفعة درجة وحده
و الحمدلله على قدر ربي و جت سلامات 3 رتب لانه الظاهر ضربت عرق ما وقف دمه ينزف لين رتبوه بثلاث رتب