يجوز انا صغار اجسام لكنا كبار نفوس

القصيدة التالية للشاعر الدكتور حمد العصيمي . نالت اعجابي واحببت مشاركتك بها اتمنى ان تحوز على استحسانكم وتصل الى مستوى ذائقتكم الشعرية

ورى قضبان زنزانة سجون الواقع الملموس=سجين عيونه لحريته ولسوط جلاده
غريب ِ في ثمود يعيش لا حارس ولا محروس=حكم فيه القدر حكمه وجاب الصخر في واده
لسانه لبّسه حلة ملك واسترخص الملبوس=لو انه قيصر وفرعون ذي الاوتاد واوتاده
نسى درس الحياه وعلمه سجن الحياه دروس=وفي بطن المعاناه اجتمع موته وميلاده
تعلم درس با المجان ما سلم عليه فلوس=وباقي درس واحد ذاخره فا الوقت لا حفاده
أنا ذاك السجين اللي قرا التاريخ با المعكوس=عشان يعيش في عصره ويكتب قصة أجداده
أخذ كلمة جديده من فمي يا حضرة القاموس=وثقف جيل كامل وانسب المجهود لا سياده
على بوابة إيثاكا وحاكم عرشها اوثديوس=وترنيمة جنود العصر الاغريقي وقواده
ركبت حصان طرواده وطاحت تحت سيفي روس=ولولا الحرب خدعه ما ركبت حصان طرواده
نقشت حروف الالياذه عشان عيون هوميروس=وعلقها على صدره صليب وعقد وقلاده
احسب ان الفلك يمشي حسب مفهوم بطليموس=وتحليلات مركز هابل الدولي ومرصاده
واثر غير القمر والشمس موجوده قمر وشموس=وشعب الصابئة للشمس والاقمار عبادة
مهي عاداتي احسبها خطا والكون له ناموس=لكن الكون ناموسه يثور ويخلف العاده
وهذي غلطتي حتى لو اني قد بريت القوس=وقالوا غلطة الشاطر بعشره قلت بزياده
اثر من قشر حظي كل حلم يمرني كابوس؟!=لو اني فوق اريكة من حرير وتحتي وسادة
سنابلنا غدت حظ الطيور الحايمه والسوس=وحنا اللي زرعنا حقل سنبلنا وحصاده
يجوز انا صغار اجسام لكنا كبار نفوس=نفوس اكبر من دموع الهوى العذري وتوباده
وانا والله لو رمح الهوى بين اظلعي مغروس=لاقول انه مجرد رمح جا في غير ميعاده
لا والله ما اعتبرها الا مجرد شكة الدبوس=بسيطه هينه ما تصحي النايم من رقاده
تثور البندقية في الخبا والسبة النادوس=وترجع شرهة الرامي على النادوس وزناده
وانا لعيون طرواده والالياذه وهوميروس=نقشت حروف الالياذه وجبت حصان طرواده