سجين القوافي

ارفعي راسـك دقيقـه وافهمينـي



الطفولـه كلهـا حـب وصداقـه



لا تغيب الشمس وانتي تكرهينـي



الفـراق المحتمـل مـر ٍ مذاقـه



جبت لك ورده وذبلت في يمينـي



وكان ما تكفيك ( ورده ) جبت باقه

هذه القصيدة للشاعر الكبير ..: ضيدان بن قضعان .. بعنوان (يا وجودي) ..
ياوجودي كل ماهب نسناس الشمال ... وجد من حدّه زمانه على اللي ما يبيه
وياوجودي كل مااغفيت ثم مال الظلال ... لاغفت عيني ولاذقت شيٍ مشتهيه
وجد من قفـّى وهو في رجا كلمة تعال ... والتفت من عقب مااقفى ولحدن لدّ فيه
وياعذابي لادنـا الليل من روس الجبال ... وانتهى يومٍ من العمر ماعاد ارتجيه
وانتي ابعد من سما الحلم ووصالك محال ... يابعد من هلّ دمعي ضحى الفرقا عليه
ياغناتي لاتحسبين دمعي يوم سال ... ضعف والاّ خوف والاّ كذا والاّ كـذيـه
والله اني من رجالٍ يضدون الرجال ... لكن الحظ الردي ساق دمعي كلـبيـه
ووالله اني كل مادار حوليك الجدال ... قمت كن الموت يشـر على قبري يإيديه
ووالله ان قد لي وانا اصد لاجالك مجال ... صدّت اللي لاتضايق تذّكر قبر اخيه
ومن سألني قلت مدري واذا عاد السؤال ... قلتله تكفى سؤالك ترى ماهو وجيه
وش تبيني اقول عماََ ترى ذبحي حلال ... والخطا منها علي صرت احبه واهويه
عذرها لو ماتعذر مثل واضرب مثال ... واحدن مايعرف الحر الأشقر يشتويه
وان رجعنا للتواصيف لله الكمـال ... لا انتـهى ليل المزايين جاتك تبتديه
كنها غفلٍ مع البدو طاويها الحـيال ... ما يمـيز وصفـها الاّ نبيهٍ من نبيه
واهني اللي وصلها وذاق امن الزلال ... رشفةٍ مع غفلة الناس من فيها لفيه
واعزتي للي سواتي عشق ما لا يطال ... ويوم طاله ضيع الحلم بين أمه و ابيه
يااول احلام الطفوله على حد الخيال ... الرجا بللي حمى البيت من حملة بريه
حال دونك سيف عنتر وتاسع حول حال ... باثر حولٍ حال دونك وانا ادعي هيه هيه
هيه يللي غرك الحسن واطغاك الجمال ... والله ان اموت ماشفت لاوصافك شبيه
لو يسام الحسن والتيه بجنيه وريـال ... مابقى في سوق غيرك لا ريال ولاجنيه
كيف اهدك للمقابيل وانتي راس مال ... راس مال ومال والماال مايعطى السفيه
حافظك حفظي لعيني ورمشي لك جلال ... وانتي تشحـّـين بالما وانا شفـّـي مويه
شايفن ظلمك وساكت وطال الليل طال ... لاتركتي طعن قلبي وانا ماقلت ليه ؟
لو بقا للهيل صبرن على فوح الدلال ... مابقى للقلب صبرن على شيٍ يجيه
كنت احسب ان الغلا زال واثره لايزال ... في الحشا ماكنه الا دخيلٍ في وجيه
ساقني حبك على الموت وسنيني هزال ... والظروف اقسى من الظلم للعرض النزيه
وانتي تسوقين عقلي على حد الهبال ... تحسبين ان من بغى شي يقدر يشتريه
والاّ انا ياوجد حالي وجودن مايقال ... وجد من ضحى بغاليه لرضا والديه
وياوجودي يااول العمر قبل ألبس عقال ... وجد من باع آآخر العمر في رغبة ذويه
وياوجودي كل ماهب صوتشششش من شمال ... وجد من حدّه زمانه على اللي مايبيه
هي مما راقي لي أتمنى أن تكون نالت إعجابكم ..
تحياتي .. الفارس الملغمق ..