سبع قصائد لمجارات السبع الفرائد بين خالد الفيصل وسعيد بن ذياب العمري

القصيدة رقم (( 3 ))

أنا فيني من الايام جرحين على الخفاق=من الاقصين جرح وجرح من ربعي الادنيني
أقوم بجرح لكن ثاني الجرحين ساق وعاق=مشى سمه مع عرقي ويبست منه كفيني
يولعني وهج ناره وفي فكري كما البراق=عواصيف تودعني وعاصوف يلاقيني
مثل ريشة نقلها ريح مع شوك وفي مضياق=يمزع شوكها جنبي وبالرجلين داميني
ألمها جض به قلبي ودخّن بالصدر حراق=تفجر كنه البركان في سمعي وفي عيني
يعاقبني زماني يوم صدري بالعنا ما ضاق=أشيل الحمل ما تعبت من الوعرات رجليني
أعرف انه قدر عمري واعرف ان الزمن سراق=وهذا ما كتبه الله وأنا المكتوب يرضيني
سلامة قلبك اللي دايم لأعلى العلا تواق=عسى العلات ما ترقى لقلب يعشق الزين
يابو بندر مقادير الزمان ورميها الفتاق=ترى ما يلتقيها الاّ كريم وبن كريمين
اذا جاته عطاها الصدر لاشردة ولا مدراق=وعسّفها وروضها الين تحن وتلين
عسى جرح نوى قلبك يجيني واله مشتاق=ولو جاني المدواي يسعفك قبل يداويني
أنا أدري كيف لايثار وشموخ النفس والخفاق=وصبر عالجروح اللي حسامي شجّها فيني
يميني تقطع شمالي كلام حبل ماينطاق=وأبتّ اصبع يميني لو تفكر دقها عيني
فصبر أيوب يا خالد ووسع خاطر منضاق=ترى سيرتك يالطييّب تدرّس بالدواويني
وانا والله مجروح جروح غايرات عماق=ياليت جروح خفّاقي على جرح وجرحين