قصه ( مجنــــون ســــاره ) قصه رومانسيه وحب لغايه الرووعه لا تفوتكم (اتمنى التثبيت)

الجزء السادس والعشرون

وبعد طيحة فهد .. فهد وساره راحو يتغدون في ارقى المطاعم ..


وفي دبـــي:

نوره قاعده ويا ام عبدالله اللي هي عمتها
نوره : اقول عمتي
ام عبدالله : هلا بنيتي
نوره : بنتج مريم متى تزوركم مول مااشوفها
ام عبدالله : والله نادر ما اتيه لانها في بوظبي وتعرفين الدرب
نوره : صدق الله يعينها .. ابي اسولف وياها صدق اشتقتلها
ام عبدالله : ان شاء الله بتي عن جريب لانها اتصلت فيه البارحه ..
نوره : الله يعينج والله كيف يالسه بدون بنتج وايد صعبه
ام عبدالله : هيه والله عشان جذي كنت الح على عبدالله عشان يتزوج ..على الاقل احصل بنت تونسني وطلعتي مثل بنتي والله يانوره
نوره راحت باست فوق راس ام عبدالله : وانا ان شاء الله بونسج ..وترى والله انتي شرات امي
ام عبدالله بابتسامه : والله اصيله يا بنتي ..عرف عبدالله منو يختار
نوره استحت .. بس هي مستانسه وايد لان ام ريلها زينه وطيبه



اما الريم فهي عند عمها وطبعا عمها وايد طيب بس مرت عمها شوي متكبره وهي وايد تتأمر ومتحكمه في ريلها ..
الريم قاعده في غرفتها وحزينه
عمها دخل عليها : السلام عليكم
الريم بحزن : وعليكم السلام هلا عمي تفضل
عمها : افا يالريم شو الحزن كله
الريم والدموع في عيونها: مشتاقه حق اخويه
عمها : ما عليه الا هي ايام وان شاء الله بيرد..زين طلعي عند رباعتج غيري الجو
الريم : هيه والله فكرت اروح بيت نوره لانها تذكرني في ساره وانا وايد وياها بس قلت بستاذن منك
عمها : افا عليج يا بنتي ..انا بوصلج ..
الريم : لا عادي عندي سياره
عمها : لا عادي بنيتي انا بوصلج بس اول شي بنتغده في المطعم بعدين بوصلج
الريم : ومرت عمي بتيه
عمها يرمس بصوت واطي : لا ان شاء الله ما تشوفنا
الريم : ههههههههههههههههههه

الريم اتصلت في نوره عشان يتفقون ييلسون بيت اهلها يعني بيت ابو خالد ونوره قالت انها بتستاذن من ريلها وبتروح ..

الريم بعد ما تلبست وكل شي ظهرت من غرفتها ونزلت عشان تروح ويا عمها ولا مرت عمها قاعده في الصاله
مرت عمها تشوف الريم وهي نازله من عالسلم: ماشاء الله وين رايحه بهالوقت
الريم ما تحب مرت عمها لانها هي السبب في بعد عمها عنهم الريم وهي ترد على مرت عمها : رايحه بيت ربيعتي
مرت عمها : واستاذنتي من منو يالحلوه .. ترى في بيتكم على كيفج تطلعين بس مدامج عندنا نحن نتحكم فيج
الريم بقهر : اسمحيلي بس محد يتحكم فيه غير اخويه
مرت عمج : لا والله بس انا مب موافقه تروحين بيت ربيعتج نحن ما عندنا بنات يروحون بيت رباعتهن
الريم : اولا هاي اكثر من ربيعه انا من الصغر وياهم وبعدين خذت موافقة عمي
عمها دخل ..: السلام عليكم
مرته : انت وافقت ان الريم تروح بيت رباعتها
العم : بسم الله ردي على الاقل وبعدين انا وافقت انها تروح وانا اللي بوصلها .
مرته وقفت : ونحن ماعندنا بنات يروحون بيت رباعتهن
العم : بس هاي مب بنتج عشان تتحكمين فيها لو عيالج ما بقول شي بس هاي على مسؤوليتي انا وانا موافق
الريم استغربت من جراة عمها لانه دوم ما يكون جريئ جذي
مرته : ويعني شو
عمها : الريم يالله حبيبتي تاخرنا
مرته انقهرت وماقالت شي راحت على طول غرفتها
الريم راحت عند عمها : عمي اذا روحتي بتيب المشاكل بينك وبين مرت عمي خلاص ما بروح
عمها حاط ايده على راس الريم : لا حبيبتي عادي ..هاي مرت عمج ادور على المشاكل انا ماعرف كيف مستحملنها كل هالسنبين المهم ما علينا يالله نروح
الريم استانست لانها بتطلع لانها صدق كانت ملانه وضايقه


في بلجيـــــــــكا :
فهد بعد ما تغدى ويا ساره
فهد وهو طالع من المطعم : ها حبيبتي شو رايج بالاكل
ساره : مممممممم لذيذ
فهد مستانس: الحمد لله اول مره تمدحين الاكل
ساره طنشته كانها ماسمعت
فهد : يالله الحينه وين تبينا نرو ح
ساره : اي مكان عادي
فهد ياشر على منطقه : شوفي هناك وين المحلات يقولون عندهم اشياء وايد حلوه وراقيه شو رايج نتشرى من هناك..ترى عندهم اكثر من محل .
ساره : وانت شو عرفك
فهد : افا عليج ترى انا دومي اسال ..شو تتحرين ريلج انسان عادي
ساره : الحينه بتدلع علينا
فهد : ههههههههه ادلع على العالم كله ولاعليج يا بعد نظري
ساره مستحيه : فهد
فهد : عاد قلنا ممنوع اللمس ما قلنا ممنوع المغازله وحتى لو منعتي بعد بغازل
ساره ما قالت شي ..

ساره وفهد وهم يتسوقون طبعا فهد يختار حق الريم
فهد وهو ياشر على قميص: ساره ساره
ساره مندمجه في الاغراض : مممم
فهد ماسك القميص : شو رايج هذا حق الريم
ساره تشوف القميص ولا استغربت من ذوق فهد لانه القميص روووعه وطبعا نادر مالشباب يكون عندهم ذوق في اغراض الحريم .
ساره : : الصراحه وايد حلو تستاهل الريم
ساره تختار حق امها ونوره وهند ..
ساره راحت شوي بعيده عن فهد ولا شافت ميداليه بحرف خالد والميداليه كلها بالاحجار وصدق كانت فخمه وغاليه على طول ساره اشترت لانها تذكرت خالد وخلت الميداليه في شنطتها
فهد اتقرب من ساره : ها حصلتي شي ثاني
ساره بتوتر : ها لا لا ما شي
فهد : خلاص نروح والله تعبت ماخلينا محل ما دخلناه شوفي الاكياس اللي في ادينا تقولين في دبي ما شي محلات
ساره : لازم نشتري حق الكل
فهد : زين فديتج تبين شي ثاني ولا نروح
ساره : لا خلاص
فهد عيل بخلي حد يمسك الاكياس ويوديه الفندق
ساره : اوكي

وهم ماشين ولا تسمع حد يناديها
ساره ساره سااااااااااااره
..وساره تصد ولاتشوف ربيعتها من ايام المدرسه فاطمه ووياها بنت ماتعرفها ..فهد شوي ابتعد عشان البنات ياخذون راحتهم
ساره استانست يوم شافت فاطمه : هلا والله
فاطمه حضنت ساره : شحالج الغاليه
ساره : الحمد لله زينه انتي شحالج وشحال الاهل وينج من زمان ماعرف اخبارج
ساره : بعد تعرفين مشاغل الدنيا
ساره شافت بنت عند فاطمه سلمت عليها ..
فاطمه : اعرفج على بنت عمي اشواق
ساره وهي تسلم على اشواق : هلا والله شحالج اشواق
اشواق : طيبه الحمد لله
..فاطمه تشوف فهد : منو هذا
اشواق من الصبح عيونها على فهد لانه صدق غاوي :
اشواق وهي تشوف فهد : اقول منو هذا ؟؟ تعرفينه
ساره تصد ولا تشوف اشواق تاشر على فهد : هذا ريلي
فاطمه : ماشاء الله عرسي ولا خبرتيني
ساره : والله قلت حق البنات يقولونج لاني ماعندي رقمج وبعدين توني معرسه
اشواق : اها يعني يايه بشهر العسل
ساره بضيج : هيه
اشواق من النوع اللي وايد فريه امها كويتيه وابوها اماراتي ..
اشواق : اقول عادي نسلم على ريلج
ساره استغربت من جرأه اشواق : طبعا
ساره وفاطمه واشواق راحو عند فهد
فهد مستحي منزل راسه مستغرب ليش يايين
فاطمه اول وحده رمست : هذا اكيد خالد اللي خاطبنج من صغرج صح
فهد اول ما سمع اسم خالد عصب ..فهد بعصبيه : لا يالاخت انا فهد مب خالد
فاطمه ويها احمر : اوووه سوري والله ماعرفت ترى اللي اعرفه ان خالد خاطبنها من صغرها وقالت انها بتزوجه

فهد عصب وراح مكان ثاني
فاطمه : اسمحيلي ساره ما كنت قاصده والله
ساره شوي فرحت لان فهد انقهر لانها تبى ينقهر من زمان : لا عادي .. بس الزواج قسمه ونصيب وللاسف انا وخالد ما اجتمعنا ولا كنا من نصيب بعد
اشواق وعيونها على فهد : بس سوري بس انتي وايد محظوظه .
ساره : ليش
اشواق : عندج ريل بهالجمال والاناقه وماتكونين محظوظه سوري ترى انا وايد جريئه
فاطمه تضرب اشواق : ايه فضحتينا صدق انج قوية عين
ساره : لا عادي خلا تاخذ راحتها ...بس يا اشواق مب يعني اذا عندي ريل حلو معناتها اني محظوظه في اهم من هذا كله اللي هو الحب
اشواق : يعني انتي ماتحبينه
ساره ما تبى تبين : لا ما قلت جذي بس حبيت ابين لج
فاطمه : خلاص حبيبتي بخليج روحي عند ريلج فضيحه اخرناج بس وين ساكنين في اي منطقه
ساره تاشر على الشقه اللي مجابله البحر : بهالشقه تشوفين
فاطمه مستغربه : شهر العسل وفي شقه ليش
ساره استحت : ها لا بس جذي لان المكان اوسع والشقه مجابله البحر
فاطمه : تصدقين شقتكم شوي عند شقتنا
ساره: زين الحمد لله عشان اشوفكم
اشواق : والله انج متفيجه في شهر العسل وتشوفين رباعتج
ساره : ما فيها شي عادي
فاطمه : زين عن اذنج بنخليج ..
ساره : يالله نشوفكم على خير باي

ساره راحت عند فهد اما فهد فهو معصب ومنقهر من كلام فاطمه
ساره : يالله نروح
فهد بعصبيه : يالله
ساره تشوف ملامح فهد ومبين عليه انه واصل حده وطبعا من حقه ..
اشواق كانت متخبله على جمال فهد .. اشواق تصد لفاطمه وهي مندهشه : اقول فاطمه
فاطمه : هلا
اشواق : بذمتج هذاانسان
فاطمه : منو
اشواق : فهد بعد منو
فاطمه : ليش لا يكون سمعتي انه من الجن
اشواق وهي تتنهد : ااااااااااااه لا قولي ملاك
فاطمه : ايه استغفر الله شو تخبلتي
اشواق : والله بحياتي يا فاطمه ماشفت بجماله ماشاء الله عليه قمر قمر قمر
فاطمه مستغربه : غريبه اول مره تتخبلين على حد كل مره اطنشين الشباب وهم اللي يتخبلون عليج
اشواق : الا هذا مينني
فاطمه : اقول ترى بذكرج الريال متزوج يا حلوه
اشواق : وشو يعني
فاطمه تمسك ايد اشواق وبعصبيه : ايه لا تنسين انه ريل ربيعتي
اشواق : قلتي ريل ربيعتج مب ربيعتي
فاطمه : اشواق والله بزعل عنج ..صدق يوم قالو هالايام البنات يلحقون ورى الرياييل
اشواق انا ما الحق وراه بس يمكن هيه ما تحب ريلها
فاطمه : ليش الاخت عندها حاسيه السادسه .
اشواق : لا بس لاحظت من كلامها يوم كنتي تتكلمين عن خالد انها ماتحب ريلها اللي هو فهد
فاطمه : الاخت على كيفها تالف
اشواق : والله اني حاسه بهالشي..عيل شي وحده بشهر عسلها بهالحزن
فاطمه : المهم ما يخصج
( اشواق امها كويتيه وابوها اماراتي وهي حلوه ودايما تهتم بشكلها يعني عدسات والشعر نصه برع وصبغ بس هي جذابه وايد بس طبعا مب احلى من جمال ساره لان ساره جمالها وايد طبيعي وطفولي )


اما فهد فرجع الشقه وهو متضايق وايد لانه ما يحب يسمع اسم خالد .. ساره لاحظت ضيق فهد وشافته في غرفته
راحت ساره وغيرت لبسها ولبست جلابيه مغربيه فخمه وايد ورفعت شعرها العسلي وحطت شوي مكياج ..
ساره راحت عند غرفة فهد: فهد
فهد صد صوب ساره واستانس توقع ان ساره بتسال عنه : هلا تفضلي يا عمري
ساره : لا بس حبيت اسال مممممممممم نحن بنطلع مكان لاني الصراحه غيرت لبسي
فهد : على راحتج اذا تبين تروحين اي مكان انا حاضر من عيوني ولو تبين اوديج القمر انا ما بتردد
ساره استغربت من كلام فهد مع انه متضايق بس بعد حنون وكلامه حلو : اوكي عيل عن اذنك بروح انام
ساره قبل ما تطلع صدت صوب فهد: هيه صح تذكرت ترى انا بتصل في امي اوكي
فهد : زين يا عمري سلمي عليها وايد
ساره : وانت بتنام بعد
فهد : الصراحه وايد مصدع اقول ساره عندج حبة بندول ترى صدق مصدع
ساره: هيه عندي ثواني بس
... راحت ساره طلعت حبة بندول وراحت عند فهد ..
ساره برقتها : تفضل
فهد لمس ايدينها وهو متعمد: تسلم هالايدين يا عمري
ساره استحت وعلى طول طلعت برع .. مع انها ما تحبه بس بعد قلبها وايد رقيق وطيب ..
ساره اتصلت في امها وسلمت على ام خالد وعلى الكل ..وكانت صدق مشتاقه لامها وكل ما تسمع صوتها تتدمع لانها اول مره تبتعد عن امها ..
اما في دبي

نوره مع الريم ويا هند في غرفة نوره القبلانيه
نوره وهي يالسه على السرير: الله على غرفتي تصدقون اشتقت على غرفتي وايد
الريم تغمز : معقوله يعني اونج تذكرتي
نوره تضرب ايد الريم : ايه شو قصدج
الريم بدلع : لا اقول يعني انتي تذكرين حد اصلا يوم تكونين ويا حبيب عمرج عبودي
نوره : شوف هاي ادلعه لو سمحتي محد يدلعه غيري
الريم : بعد اونج تغارين
نوره : هيه ليش ما اغار مب ريلي فديته
هند : حشى حشى كلتينا
الريم تصد لهند : هيه صح وانتي متى بتملجين يعني بتعقدين قرانج على سالم .
هند وهي منتقهره : سكتي سكتي من متى اقولهم خلا املج يقولون اتريي ساره
نوره :هيه صح هي اكيد ما بتتاخر يعني حرام ما تتريينها
الريم : ليش بتسوون حفله
هند : لا بس كتب كتاب
الريم : اها .. يالله زين بالبركه مقدما
هند بغرور: الله يبارك فيج .. عاد الامهات اذا شافوني وايد بيزعلون
الريم : ليش
هند بدلع : بيقولون وينها هاي من قبل عشان نعطيها حق ولدنا بس انا ما بكون الا لسلومي حبيبي
نوره : ههههههههههههههههههههههه وايد واثقه من عمرج اقول اللي ما يطول العنب ... كمليها
هند : ليش ان شاء الله حد قال اني مب حلوه
نوره : عاديه الجمال
هند : قولي تغارين
نوره: تف تف تف انا اغار منج ليش حد قال انج احلى مني حبيبتي انا احلى عنج بمليون منج الحمد لله
الريم : انتو متفيجين تضاربون ..
ام خالد تناديهم : يالله يا الحلوات تعالو انزلو ..
نوره : هي والله نسينا ام ساره بعد تحت في الصاله فضيحه
الريم : يالله ننزل



اما في بيتكم محمد ..
ام محمد سرحانه .. محمد دخل عليها وخوفها
محمد : ووووه
ام محمد ماسكه قلبها : حسبي الله على ابليسك خوفتني
محمد : هههههههههههههههههههه..اقول امي الحلوه في شو سرحانه
ام محمد : والله الصراحه كنت افكر في شيخه
محمد قلبه دق :ليش شو صار
ام محمد : مستغربه لين الحينه ما ردو علينا حشى مب صلاة الاستخاره
محمد ":تعرفين امايه لازم البنت تفكر عدل ..عيل في بعضهم يفكرون بالشهور والله
ام محمد : هذيله اذا كانو غرب مب اهل ..وبعدين هي تعرف كل شي عنك يعني ليش محتاره لهالدرجه ..
محمد : ما عليه يا امايه خليهم على راحتهم
ام محمد : يبالي اتصل فيهم
محمد : شوفي انتي خليهم اسبوع تقريبا وااذا ما ردو اتصلي فيهم
ام محمد : على رايك .. ان شاء الله خير

محمد وايد خايف من اللي بيصير بعدين .. خايف على المشاكل اللي بتصير او يرغمون شيخه على الزواج منه وهالشي طبعا هو ما يبيه
..

الجزء السابع والعشرون

اشواق بعد ماشافت فهد صارت كله تسرح فيه لانها صدق كانت متخبله عليه ..
اشواق وهي واقفه عند النافذه وسرحانه .يت فاطمه وشافتها بعالم ثاني
فاطمه وهي واقفه عندها : اشواق اشواق
اشواق سرحانه
فاطمه بصريخ : اشووااااااااااااق
اشواق نقزت : وي باسم الله بلاج خوفتيني
فاطمه عاقده حواجبها : بلاج اشواق ..في شو تفكرين
اشواق قامت من النافذه : ها لا ما شي
فاطمه : علينا قولي بلاج
اشواق يلست على الكرسي : الصراحه بقولج بس لا تعصبين
فاطمه : اكيد بس شو فيج حيرتيني
اشواق حاطه ظفرها في فمها اونها مستحيه : افكر في فهد
فاطمه فتحت عيونها وعصبت :اشواق شو الحركات ؟؟ شو قلت لج انا ما قلت ان الريال متزوج شو انتي ما تفهمين
اشواق : والله مب بايدي والله يخبل هالانسان وااااااي على عيونه الوساع كانهم عيون غزال ولا خشمه كانه سيف ولا شعره السايح الاسود ولا جسمه المعضل يااي ياي حلو حلو
فاطمه تضرب على ايد اشواق : اشواق والله تخبلتي
اشواق : لا تلوميني والله عجبني
فاطمه : بذكرج ان الريال متزوج
اشواق : بس ما اعتقد مستانس في حياته احس ان ساره ما خذتنه عن غصب .. المهم ان الحب مب متبادل بينهم.
فاطمه : ليش الاخت عندها حاسيه ؟
اشواق : لاحظت من كلامها انها تحب خالد والحب لين الحينه موجود بس الدنيا اللي فرقتهم
فاطمه : يعني الحينه فهد بيودر ساره القمر وبياخذج
اشواق : شوفي انا ما انكر ان ساره وايد حلوه وصدق تخبل بس بعد انا حلوه ولا تنسين ان الرياييل يتخبلون عليه
فاطمه : لازم وحده اطلع نص شعرها وعدسات ومكياج لازم بتطلع جذي حلوه
اشواق معصبه : انا احب اتكشخ وبعدين انا بدون مكياج حلوه والاهم اني جذابه
(( اشواق صح ان جمالها عادي بس هي صدق جذابه لان كلامها روحه يجذب وحركاتها بعد ))
فاطمه : المهم يالله قومي خلا نروح انام
اشواق : اوكي يالله ..ويارب اشوف فهودي مره ثانيه
فاطمه تهز راسه : لا حول ولا قوه الا بالله الله يهديج
اما فهد بعد ماخذ حبة البندول حس بالراحه وهو يالس في غرفته على الكرسي الهزاز يفكر بكلام فاطمه يوم

توقعت انه خالد وهو يقول في نفسه (( ليش انا عصبت وانقهرت صح ما احب احد ينادي باسم خالد جدامي بس خلاص مب لازم انقهر الاهم ان ساره صارت ملكي وانا عندي امل انها تحبني واحس انها شوي تغيرت عليه استوت اطيب بوايد )) وهو رافع ايدينه للسماء ( يارب لين قلب ساره عليه وخلها تحبني ونعيش بسلام وحب ومحد يفرقنا ...
فهد شاف عمره ملان وايد قال احسن شي يكتب خاطره حق ساره ويعطيها لانه من زمان شاري بطايق حلوه فتم يكتب ..
اما ساره فلبست بجامه حلوه وانيقه بلون الوردي بس البجامه لين تحت الركب وهي ماتلبس هالشي جدام فهد يعني دوم لبسها طويل وايد .. بس هالمره قالت بلبس هاللبس لانها بتنام وبتقفل الباب كالعاده ..بس قبل ماتنام كانت ترتب اغراض اللي شارتنهم حق الاهل ..
فهد بعد ما كتب شاف باب غرفة ساره مفتوحه فقال اكيد واعيه ومادق الباب كعادته ..
ساره سمعت احد يفتح الباب ولا تشوف فهد ..
فهد اول مره يشوف لبس ساره شوي قصير تخبل الريال مع ان اللبس تحت الركب يعني مب وايد قصير بس بالنسباله شي غير لانها دوم مستوره ..
ساره حطت ايدها على راسها وتصارخ : اااااااااااااااه
فهد مستغرب : باسم الله بلاج ساره
ساره مستحيه وهي تروح عند فهد وادزه عشان يطلع : انا ما قلت لك دق الباب قبل ما اتي
فهد : زين شفت الباب مفتوح قلت عادي
ساره وهي ادز فهد عشان يطلع : اطلع بسرعه
فهد مسك ايد ساره : ساره بلاج ليش مستحيه عادي انا ريلج والله مب سيلاني
ساره : اطلع بسرعه قلت لك
فهد : زين زين صبري بعطيج شي
ساره بصريخ وبخجل : ما ابي برع برع
فهد طلع غصبن عليه
ساره بندت الباب ووقفت عند الباب وهي مستحيه
فهد يدق الباب : ساره حبيبتي زين فتحي والله بعطيج هالبطاقه وبعدين بندي الباب عليه كالعاده
ساره مستحيه وهي مسانده على الباب : ما ابي شي فهد روح
فهد : ساره يا بعد هلي فتحي والله بس خذي البطاقه ..ترى والله ما بروح غرفتي
ساره عرفت ان فهد عنيد ..فتحت الباب شوي خذت البطاقه وبندت الباب بسرعه
ساره : يالله الحينه روح نام
فهد : زين حبي اقري الكلمات ترى هالكلمات من صميم قلبي ..
ساره بعد ماخذت نفس ..يلست على السرير وفتحت البطاقه وكانت البطاقه حمراء ومعطره فتحت وقرت الكمات وفهد كان كاتب بخطه الراقي وحلو
*( يحلي حياتي يوم اناظر عيونك
*يرتاح بالي بالفرح يوم لقياك

كان الزهر ماخذ من حلاتك
سبحان ربي بالحسن كيف سواك
ودي اكحل عيوني بعيونك
واعيش العمر كله معاك
بس ابيك تحس فيني
وتعرف ان قلبي هواك
واختارك بين العالم والناس
لتكون انت شريك حياته
ودي بس ودي بس تعطيني فرصه
لجل اخليك تحس بحبي لك
واني سويت هذا كله لاني اموت فيك ..

ساره بعد ما قرت الكلام حست بحب فهد .
ساره وهي ماسكه البطاقه : يحليلك يا فهد لهالدرجه تحبني .. وهي تتنهد : ااااااااااااه بس انا صعب احبك صعب لان قلبي لين الحينه مع خالد وانا وعدته اني اكون قاسيه معاك ..شو اسوي ياربي ..

اما فهد فهو مستانس لانه قدر يعبر عن اللي بخاطره حتى لو ببطاقه المهم ساره تحس فيه وتعرف مدى حب فهد لها ..





وفي الصـــــــــباح :
في دبي
هند مع ام ساره وام خالد وهم يفطرون
هند وهي تشرب الحليب: امايه عندي فكره بس شو فكره تجنن
ام خالد : اصبحنا واصبح الملك لله
هند : شو شكلي مكتوب ردوو اذكار الصباح
ام ساره : هههههههههههههههههه
ام خالد : لا تونا قايمين من النوم وين فكرتي بشي
هند وهي تاشر على عقلها: هالمخ مدام عايش يفكر باشياء حلوه
ام خالد : والله لين الحينه ماشوف غير الخراب
ام ساره وهي تضحك : هههههههههه حرام عليج خليها تكمل ..
هند : محد حاس فيه غير خالوتي
ام خالد : قولي يا ام لسانين
هند تشوف امها من طرف عينها : انا ام لسانين يالله انمشيها .. المهم شو رايكم نروح رحله ويابعض شوي نغير الجو ملينا من قعدة البيت ها شو رايكم
ام خالد : وين يعني
هند : البر مثلا
ام خالد : زين ومنو بيودينا يا حلوه
هند : خلود بعد منو
ام خالد : ايه شو خلود بعد اصغر عيالج قولي خالد

هند : زين عادي ادلع اخويه ..اونها ماترضى على ولدها .. لازم ولدها الوحيد
ام خالد : عسى ربي يخليه لي . لا تحسدين الولد
هند : وي الحينه بتضارب ويايه اقول امايه اقنعي ولدج خلا يودينا
ام ساره : يمكن الريال مشغول
هند : وين مشغول .. ليش هذا عايش بالدنيا يحليله اخويه
ام ساره : شو قصدج
هند : ها ووو لا شي
هند قصدها ان اخوها عايش بذكرى وحلم ساره ..
ام خالد : بشوف بكلم نوره
هند : لازم كل شي نوره نوره يا حظها حصلت ام تموت فيها وريل يموت فيها
ام خالد : الله وكبر عليج تحسدين اختج
هند : ماشاء الله عيني عليها بارده .. نوره اكيد بتيه لانها قالت انها بتتغدى ويانا
ام ساره تتلفت يمين يسار : وين خالد عيل
ام خالد : خالد اعتقد بعده في الغرفه ..اكيد البارحه سهران ..
هند : ها شو قلتي
ام خالد : بكلم نوره وبعدين بنكلم خالد بنشوف شو يصير
هند : يارب يارب نروح يارب



في بلجـــــــــــيكا :

ساره قامت من النوم هالمره قبل فهد ..وبعد ماقامت راحت الصاله وماشفت فهد كل مره فهد يدق عليها الباب استغربت ..
ساره ادور يمين يسار ادور على فهد ..وماشافته راحت صوب غرفته شافت شوي الباب مفتوح استحت تتدخل ساره دقت الباب بس فهد بسابع نومه وساره بدها ادق الباب ومحد فتح استغربت ساره
ساره تقول في نفسها ( معقوله فهد طلع برع خلا ادخل واشوف )
ساره وهي تتدخل مثل الحراميه ولا تشوف فهد نايم بس مثل الاطفال يعني برائه الدنيا فيه ..
راحت ساره عنده وهي تتامل في ملامحه ومستحيه وايد ..ساره بكل رقه : فهد فهد
فهد مايدري عن الدنيا نايم
ساره شافت ما شي فايده علت صوتها : فهد فهااااد
فهد فتح عيونه ولا يشوف ملامح مثل الملاك..
فهد مستغرب اول مره ساره تدخل غرفته : يا سلام على هالصباح ..اخاف انا احلم
ساره استحت : يالله قوم بسك رقاد
فهد : لا اخاف احلم معقوله ساره هني
ساره منزله راسها وبخجل : شفتك ما ييت قلت يمكن روحت

فهد : افا اروح بدونج انا من دونج اضيع يا بعد عمري ساره ويها احمر : فهد حشى توك ناش ولحقت تتغزل
فهد قام من الفراش يعني يلس وهو حاط ايدينه على قلبه : هالقلب ما يمل منج ودايما انتي بداخله احبج يا ساره احبج ..
ساره طلعت من الحيا
فهد يزقرها : ساره وين بتروحين
ساره : يوم بتشبع غزل بعدين تعال
فهد : خلاص خلاص ما بقول شي ..زين تعالي قوميني تراني تعبان
ساره صدت تشوفه : الله وكبر على خبثكم يالشباب
فهد : ههههههههههههههههههههههههه .. يا عيني عليكم انتو يالحريم ان كيدهن لعظيم
ساره ابتسمت وطلعت ..
فهد وايد مستانس من تصرفات ساره صح بعدها ما تحبه بس على الاقل تتكلم وياه عدل وتضحك وياه ..

فهد قام وغسل ويهه وطلع واتلبس واتكشخ..ولبس كاب باللون الاحمروقميص احمر وبنطلون جينز يا سلام عليه

.. ساره لبست قميص وردي مع جاكيت على شكل ورود باللون البنفسجي والوردي طبعا لين تحت الركب وبنطلون بنفجسي .. مع شنطه مطرزه باللون البنفسجي والوردي . وكانت انيقه كعادتها ..

فهد طلع من الغرفه :
فهد عند باب غرفة ساره : ها يا عمري شاهزه
ساره وهي تلبس الخواتم : هيه جاهزه..
فهد يشوف ساره من فوق لتحت : يا سلام عليج يا ساره دومج انيقه ..
فهد يدور : ها شورايج بكشخة ريلج
ساره بدلع : عادي
فهد : افا يعني ولا مره قلتي اني حلو
ساره : ليش مب واثق من نفسك
فهد : واثق يا عمري بس ابي اسمع من حبيبة عمري
ساره : فهد تاخرنا
فهد : غيري السالفه شو وراج
ساره ابتسمت ..
فهد : هيه صح بسير اييب كاميرا
ساره : اوكي ..تعال نحن اول شي بنروح الحديقه صح..
فهد : لا حبيبتي اول شي بنروج تلفريك
ساره مسكت قلبها : وي انا اخاف من مكان مرتفع
فهد وقف عند ساره وهو يتامل في عيونها : تخافين وانا معاج ..
ساره استحت : لا بس يعني مكان مرتفع
فهد : ولا تقولين تخافين تركبين العاب مخيفه بعد
ساره : لا عادي احب العب واغامر
فهد : اها زين الحمد لله
ساره وفهد طلعو اول شي يفطرون ..بعدين قررو يروحون تلفريك ..

*******************************

في دبي
هند تحاول ويا نوره : يالله نورووه اقنعي خالد
نوره : اف اف حشره انتي حشى توني يايه ارحميني هند ماسكه ايدين نوره : فديتج اختي اقنعي خالد
نوره : وينه الحينه ..
هند : بغرفته اتوقع ..
نوره : ماظهر يتغده ولا شي
هند : لا
نوره خايفه : بلاه اخويه
نوره راحت غرفة خالد ولا تسمع خالد يغني بصوته الحلو :
خالد وهو يغني مايعرف ان احد يسمعه :
اشواق قلبي تناديك ..وتقولك وينك يا حبيبي
محتاجلك والله موت .. تعال وريح قليبي

نوره دخلت عليه ولا تشوف خالد يالس على السرير وماسك صوره طفولته ويا ساره والدموع بعيونه ..خالد لاحظ ان حد دخل راح مسح دموعه
نوره تقربت من خالد : اشحالك اخويه
خالد بنبره كلها حسره وحزن وهو ماد ايدينه عشان يسلم على نوره : الحمد لله اختي انتي شحالج وشحال عبدالله ريلج..
نوره يلست: الحمد لله ..شو ماشاء الله استويت مغني ..
خالد يتنهد: اااااااااااااااه اللي يحب يا نوره يطلع مغني وشاعر وكل شي
نوره : حق ساره صح
خالد : وليش منو بقلبي غير ساره
نوره وهي تشوف صور : وشو اللي بايدينك
خالد ماسك الصور : هاي صوري مع ساره يوم كنا في الروضه ..
نوره : خالد متى بتنساها
خالد قام من عند السرير : نوره لاتعيدين الموال..
نوره : قلبي يعورني عليك ساره اتزوجت ياخالد اتزوج خلاص ساره صارت ملك انسان ثاني
خالد بصريخ :لا تقولين هالكلام لاتذكريني ..انتي تقطعين قلبي زياده كافي ارحموني ارحموني
خالد حاط ايدينه على راسه وهو يدمع ..
نوره ودموعها اربع اربع : فديتك اخوي انا وربي مب قصدي اجرحك
خالد والدموع بعيونه : نوره انتي تعرفين ان ساره هي الهوى اللي اتنفسه وانا بدونها مستحيل اعيش ..
نوره : بس هي متزوجه يا خالد
خالد : ما عليه بترياها العمر كله حتى لو ما اتزوج بترياها
نوره : بس اذا هي مابغتك
خالد : مستحيل ساره وعدتني انها بتكون لي
نوره : واذا ما بغتك او نستك
خالد : اوعدج يا نوره اذا ساره في يوم من الايام قررت تنساني وتحب فهد انا بخليها وبتزوج بعد ... وانا متاكد في يوم من الايام ان ساره بتكون لي ..مستحيل تنسى حبنا مستحيل تحب انسان فرق بينا مستحيل
نروه : زين يا خالد شو رياك نغير الجو.. ترى قلبي يعورني عليك
خالد شو تبيني اسوي
نوره : شو رايك نطلع اليوم في البر يعني نروح راس الخيمه او حتا اي مكان
خالد : والله مالي نفس
نوره : يالله اخويه عشان خاطري على الاقل نشوف ابتسامتك
خالد : بشرط ما بنطول وايد يعني بعد صلاه المغرب نكون في البيت
نوره : ما عليه الاهم ان نحن نطلع
خالد : عشانج والله
نوره تحضن اخوها : فديتك اخويه عساني ماانحرم منك

نوره قدرت تقنع اخوها انهم يطلعون ويغيرون الجو بالذات عشان يغيرون من نفسية خالد بعد ماشافت دموعه وحزنه ..

هند مستانسه وايد على طول سارت تتلبس وجهزت اغراضها والكل استانس الا ام ساره لانها كانت تتمنى ساره وياهم ..

ساره ويا فهد راحو صوب التلفريك ولا تشوف ساره التلفريك فوق الجبل يعني مكان صدق مرتفع
ساره وهي خايفه : فهد المكان وايد عالي
فهد يبتسم : لا تخافين يا عمري صدقيني بتستانسين على الاقل تشوفين الاماكن من بعيد وتشوفين كل مكان
ساره : ونحن بس بنكون
فهد : هيه انا طالب ان نحن نكون بروحنا احسن
ساره : الله يعين الصراحه خايفه
فهد: ربنا معانا يا عمري يالله نروح يا دورنا
ساره وريولها بتزور تشيلها من حقها الصراحه المكان وايد مرتفع
فهد وساره ركبو التلفريك وفهد مستانس لانه يحب الاماكن المرتفعه ..
ساره كانت خايفه بس بعد ماشفت ان التلفريك شوي شوي يتحرك اطمانت ..
فهد واقف عند ساره : ها يا عمري شو رايج بالمناظر حلوه صح
ساره وهي تشوف تحت : احس كل الاشياء صغيره
فهد : واحلى شي تشوفين الطبيعه كلها من مكان عالي ساره : صدق رووعه
فهد : قلت لج . ان رووعه
ساره وفهد يرمسون وهم يشوفون تحت ..
ولا فجاه التلفريك يهتز بالحيل
ولا ساره كنت واقفه ومن الاهتزاز طاحت وقعدت وفهد واقف لانه كان متمسك عدل ولا على طول يمسك ايدين ساره : باسم الله بلاج يا عمري
ساره مستحيه : ماعرف شو صار
فهد ماسك ايدين ساره وساعدها على الوقفه ..وساره ويها محمر مستحيه وايد .. ولا يوم تصد تشوف فهد ماسك عمره يبى يضحك عيونه تدمع بس ما يضحك عشان ما تزعل ساره
ساره منقهره : تضحك عليه
فهد ما قدر ايود عمره : هههههههههههههههههههههههههههههههههههههههههههههههههه ههههههههههههه
ساره تشوف فهد من فوق لتحت ..: زين يا فهد قوم ما اكلمك
فهد وهو يمسح دموعه من الضحك : لا فديتج والله شكلك يضحك
ساره : بدل ما تقول سلامتج
فهد : اقول تذكرين ذيج المره يوم طحت ضحكتي عليه لا بعد ولا ساعدتيني على الاقل انتي طحتي ومحد شافج انا العالم كله شافني
ساره : لا بارك الله في التلفريك مالك
فهد: هههههههههههههههههههه

فهد وايد مستانس لان كل يوم وساره تتغير وصارت تضحك وتتغشمر ..


هل ساره بتنسى صدق خالد ؟؟ وبتحب فهد
ولا في شي بيفرق ساره عن فهد ..
واشواق هل بتصر وبتلحق وراء فهد ولاهي نزوه ..
وخالد شو اللي بيصير له
وشو ينتظر باقي الشخصيات

اترقبوني مع احلى الاحداث