على طول العمر حبك هو الوحيد اللي سكن قلبي

في دوام مازن

مازن : توني مخلص شغلي وياني ريال زمان ما شفته ويمكن انشغلت عنه ولا رديت عليه لانه كان مكلمني في موضوع اكيد عرفتوه خليل الفلاسي نشيت وسلمت عليه سبحان الله ها الريال وايد ارتحت له عموما يلس شوي معاي عقب قالي لو فاضى شو رايك نظهر أي مكان نيلس نسولف شوي كانت الفكره حلوه لاني مخلص شغلي وممكن اترخص من المدير واظهر .

طلعنا ورحنا يلسنا في كوفي شوب وطبعا كان خليل يبي يتخبرني عن الموضوع اللي رمسني عنه قبل بخصوص خطبته لاختي مزنه

مازن : تعذرت منه وقلت له الظروف اللى مرينا فيها طول ها الفترة عشان جي ما رديت اسأل اختي عن الموضوع

خليل : حصل خير يا خوي بس انا قلت اخليك تشاورها واخليها هي بعد تفكر لان هذا زواج مب أي شئ وبعدين انا كنت مشغول مع الوالد مريض وتدري كل يومين طايح المستشفي

مازن : كبر خليل في عيني وايد وهو يقولي انه يداري اهله وقلت له خلاص بتخبر اختي اليوم وان شاء الله في اقرب فرصة برد لك الخبر

خليل : خير يا خوي واتمني ما اكون ازعجتك

مازن : لا يا خوي افا عليك

عقبها ترخصنا من بعض وكل واحد راح شغله وانا طول الوقت كنت افكر في خليل وافكر كيف افاتح اختي في الموضوع لكن فعلا مصخناها طولنا على الريال ولازم اعرف رد اختي .

بعد ما وصلت البيت حصلت اماية ضاربة بوز ارمسها يا دوب ترد علي من وراء خاطرها حسيت اني بتخبل بلاها اماية الصبح مودعنها وانا ظاهر الدوام ما فيها شئ .
مازن : يلست يمها قلت لها بلاج الغالية شو فيج ؟؟

ام مازن: ما شئ ما بلاني شئ بس لو كنت ما تبي البنت ما كنت خليتني اتفشل قدام اهلها واطلبها وحليلهم الناس يوافقون وعقب تفر بنتهم جي

مازن : ايوا هذا اللي مضايقنج؟؟ خلاص الغالية احنا بعدنا ما سوينا شئ البنت بيت اهلها وبعده العرس ما صار كل واحد يسير في حال سبيلة (شو اقول انا ادري اني بديت اخرف شو ما صار شئ وانا اعرف انه صار وصار)

ام مازن : لا والله الحين تقول انك ما تبي البنت

مازن : انا ما قلت ما ابيها لكن دام ما عايبنها اسلوبي معاها انا جي ما بتغير تبي حياها الله ما تبي ما جبرتها توافق علي

ام مازن : بلاك قلبت السالفة البنت من حقها تتشره انك خطيبها ولا تتخبر عنها ولا شئ كأنها ما تعنيلك والله والله اني انحرجت من ام طارق وهي تتخبرني عنك وتقول بلاه مازن ما يزورنا ولا يزور خطيبته وله يا ام مازن جبرتيه على بنتي؟

مازن : (ادري اني مقصر بس والله العظيم اني مب قادر استوعب اني خطبت وحده غير الريم) قلت لاماية انا اسف بس والله اني استحي وانتي تعرفين ها الشئ

ام مازن : توعدني انك تزور خطيبتك؟

مازن : ان شاء الله وحبيت اماية على راسها وطلعت غرفتي

ام مازن : تعال بتتغدى

مازن : لا ما ابي كلت في الدوام (وانا بصراحة مقهور كل ما انسى اني خاطب يذكروني انا شو سويت بحالي وببنت الناس؟؟) ومن ضيقتي رقدت وانا عارف ان النوم بالنسبة لي هروب

بعد صلاة المغرب

مازن : نشيت من رقادي وانا حاس ان كل المواضيع تدور في راسي موضوع الريم والمبايل اللي عندها وموضوع مزنه وخليل اللي ياني ورمسني ولازم ارد عليه عشان جي نشيت ودقيت باب غرفة اختي بس عرفت من قيس اللي كان يالس يلعب بلاي ستيشن في الصالة ان الريم ومزنه مب في البيت سايرات بيت عمتي

دخلت وسبحت وكشخت ونزلت وحصلت اماية في الصالة يالسة تقرأ قرآن وقالت لي شو ها الكشخة على وين ليكون على بيت خطيبتك؟؟

مازن : (لويت بوزي لا حول احنا ما خلصنا من ها السالفة) قلت لها لا مواعد ربيعي سعيد اليوم ياي العين (اول مره اجذب على اماية بس صج حاس طفران وقلت بسير بيت عمتي انا بعد اطالع حسين وفكرت بعد في فكره ثانية )

في بيت عمتي ام حسين

خلود وفيصل والريم ومزنه كانوا يالسين مع بعض في الميلس يسولفون طبعا الحين فيصل مطيح بيت عمته عشان خلود ههههههههه .

مازن : دقيت الباب وفتحت لي الخدامة وقالت لي ان الجماعة كلهم في الميلس سرت صوب الميالس في بيت عمتي وحصلتهم سوالف وضحك وسلمت عليهم وتحجبت خلود عني لانها كانت حاطه الشيلة بس جي اما الريم كانت متحجبة هي ما تظهر شعرها قدامنا حتى مزنه كانت متحجبة سرت ويلست يم مزنه وتخبرت خلود عن حسين قالت مثل ما هو عقب طلبت منها تخبره اني ياي اشوفه قالت لي اطلع عادي اماية معاه ما حد غريب طالعت على فيصل قلت له بتسير معاي وله بتم عند خطيبتك؟؟

فيصل : لا انا شفته وسلمت عليه وعقب لا اسير بعد بطلع اشوفه

خلود : كنت ميته من الخجل

مازن : خيبة يا ويهج يا خلود كيف صار والله دنيا تذكرين يوم كنت اشلج الدكان وكنتي تتشرطي علي هههههه

مزنه : كنت اطالع مازن وهو يطلع من باب الميلس وساير عند حسين وكان خاطري اسير معاه بس حسين رافض نهائي يشوفني وانا ما ابي احرجة او اضايقة بعدين يكفيني اني معاهم في نفس البيت

الريم : (معليك يا مازن تتجاهلني انا ؟؟) وبتسمت لخلود اللي كانت تطالع علي وتعطيني حلاوة ههههههه

في غرفة حسين

حسين على السرير راقد وعمتي يالسة يمه تعطية الدواء وتسولف له دخلت ونشت عموه عشان تسلم علي وقربت منها وحبيتها على راسها عقب قربت عند حسين وسلمت عليه بايدي ووايهته خشوم ويلست يمه اتخبره عن صحته

حسين : وضعي على ما هو عليه والحمد لله على كل حال

مازن : عسى تتشافي وترجع حسين المشاغب هههههه (كنت حاب اغير له نفسيته الحزينه وحسيت اني مقصر في زيارة حسين لكني خذيت على نفسي عهد اني ازوره بشكل يومي يمكن جي يغير مزاجه ونفسيته)

حسين : عسى ربك كريم عقب قالي حسين هاه المعرس شو اخبارك مستعد للعرس وغمز لي

مازن : طالعت على حسين عقب على عمتي اللي خلتنا ونزلت وتنهت من خاطر

حسين : خيبة كل هذي تنهيده؟؟ تنسمع من بوظبي

مازن : شو اقولك يا حسين خليها على الله

حسين : بلاك الشيخ شو فيك عسى ما شر؟؟

مازن : ما ادري يا حسين احس نفسي وهجت نفسي بها الزواجه ووهجت بنت الناس معاي

حسين : ليش انت ما اخترتها عن حب؟؟

مازن : لا والله ما ادري شو خلاني اقول لماية اني بعرس يمكن كنت حاب احقق رغبة اماية في انها تشوفني معرس ويمكن كنت حاب اظهرها من حزنها على هاني ويمكن كنت اناني..

حسين : نزين دامك مب مرتاح لا تكمل

مازن : مب انا اللى اتصرف بنذاله شو ذنبها البنت تصير مطلقة من قبل لا تعرس وانت تعرف رمسة الناس ما راح تخليها في حالها

حسين : عيل تبي تكمل وتهدم حياتك وحياتها؟؟

مازن : ما ادري المهم انت ما قلت لي شو علومك اخبارك (مكشوف اني حاب اتهرب من السوالف في موضوع عرسي)

حسين : ابتسمت وقلت له نزين ولد خالي تهرب بس عقب يوم تطيح الفاس في الراس ما ينفع ..

مازن : نشيت وقلت لحسين تامر علي شئ بسير انا

حسين : سلامت راسك يا ولد خالي بس عاد لا تقطعونا بزياراتكم تراه صج حاس بضيق وملل..

مازن : عندي لك حل

حسين : لحقني به

مازن : مفاجأة باجر بتعرف

حسين : يا غلاستك

مازن : يالله في وداعة الله

رمست عمتي وقلت لها بسير انا قالت لي ايلس بتتقهوا قلت لها لا بسير باجر عندي دوام المهم عقب دخلت الميلس وقلت لفيصل انت بعدك يالس؟؟

فيصل : بلاك انت هيه يالس عند خطيبتي شو يعورك انت؟؟ ههههه

مازن : قلت لمزنه وانتن بتمن معاه لحد ما يخلص وله اوصلكن البيت؟؟

مزنه : هيه بنسير معاك باجر وراي دوام ونشيت وقلت لريم تنش عشان شئ طبيعي انها بترجع معانا انا ومازن ما بتيلس عند فيصل

الريم : لا انا بيلس برجع مع فيصل

مازن : عادي تعودت على رمستها اللي مالها معني شو تيلس تسوي عند فيصل

الريم : كنت اعرف اني اللى اقوله هب منطقي ولا معقول

مزنه : اقول بلاج انتي باجر وراج جامعة بعدين فيصل شكله بيبات هنا

فيصل : يا ريت هههههه خلود موافقة؟؟

خلود : البيت بيتك ونحن ضيوف عندك

مازن : طالع ما صدقت الحبيبة لا يمزح طبعا ههههههه يالله مزنه يالله يا غلسة يا ريم ما فينا على خفة دمج الحين سمعتي؟؟

الريم : نزين يا مازن انا غلسة؟؟

مازن : هيه نعم

مزنه : بدوا اليهالوه يتهاشون الله يعيني عليهم ومسكت خلود وهي ناشه تسلم علي وقلت لها تعالي معاي بسير غرفتج

خلود : يالله

مزنه : طلعنا غرفة خلود وكانت مقابله غرفة حسين وكان بيني وبينه باب بس عموما دخلنا غرفتها وفتحت شنطتي وظهرت ظرف وعطيته خلود وقلت لها هذا عطيه حسين

خلود : كنت منصعقة وقلت لها اوكى غناتي

نزلنا وحصلنا النار شابه بين الريم ومازن وعشان اقطع الهواشة بينهم قلت لهم يالله بتكملون في البيت بصراحة مالي بارض لهم هم الاثنين ما ادري ليش في الفترة الاخيرة وايد يتناقرون بس اللي فيني مكفي ما ابي افكر في أي شخص غير في الرسالة اللي عطيتها خلود لحسين ويا تري بحصل لها جواب؟؟

في سيارة مازن

كنت احسب ان الاثنين بيكملون هواشتهم لكن شكلهم كل واحد استسلم وكانوا ساكتين طول الطريق بس مازن مر الكفتريا وشترا لنا عصير شكله كان حاس بالنار اللى فيني وسرنا البيت مباشرة ..

في البيت ..

مزنه : كنت توني بنزل من السيارة زجر على مازن وقالي مزنه ابيج في موضوع يلسى .. قلت له حاضر وتميت يالسة ورديت قفلت باب السيارة وانتظرته يرمس

الريم : نزلت من السيارة وسرت غرفتي وطبعا فتحت مبايلى اللي كنت قافلته وتمت المسجات توصل لاني كنت قافلته قريتهم عقب دقيت .. يمكن كنت محتاجة ارمس شخص حاليا .. بصراحة مازن قاهرني

في سيارة مازن

مازن : صديت صوب مزنه وقلت لها تذكرين مزنه من فتره طويلة رمستج عن شخص كلمني انه يبي يتقدم لج وانه عميل عندكم في البنك بصراحة الريال زارني اليوم في الدوام وتخبرني عن الموضوع .

مزنه : كنت ناسية الموضوع او يمكن مب ناستنه بس مهملتنه وقلت له نزين رد عليه الحين وقوله ما لك نصيب عندنا

مازن : شو؟؟ ليش عاد انا قلت لج الريال محترم وما فيه شئ يتعيب

مزنه : مب انت سألتني عن راي انا اقولك راي بدون تفكير (على فكره انا كنت مقررة اوافق على خليل عشان اغيض حسين بس الحين ما فيه مجال انا عقب اللي صار لحسين اكتشفت اني ما نسيت حبه وانه الشخص الوحيد اللي قلبي حبه ولو كنت خذت خليل ما كنت انتقمت من حسين كنت ظلمت نفسي والريال معاي)
مازن : حسيت ان مزنه ما تبي تتناقش في الموضوع عشان جي قلت لها اوكى الغالية على راحتج انا اللي علي سويته

مزنه : فيه شئ ثاني وله اروح؟؟

مازن : طالعت عليها وحسيت انها ضايقة عشان جي حاولت اوخر الضيق اللي فيها قلت لها ايه حساب العصير لو سمحتي هههههه

مزنه : هههههههههه خلاص فديتك بس الحين ما عندي خرده ههههه عقب نزلت من السيارة وتريت مازن يقفل السيارة ودخلنا البيت مع بعض وحصلنا قيس بروحة في الصالة قال هيه ضربتوني خيانه كلكم سرتوا بيت عموه وانا خليتوني بروحي مقابل اماية .

قيس : كنت بتهور وبقول لها تخطب لي انا بعد هههههههههه

مازن : زين ما تهورت وله كنت توهجت شغل عدل

مزنه : طالع المخابيل نزين يالله من رخصتكم بسير لا تنتقل لي العدوى (بصراحة كنت حابة ايلس مع نفسي وافكر في وايد اشياء)

مازن : انا يلست عند قيس اللي حاس ان فعلا اهملناه وقلت له باجر بسير بيت عموه تسير عندي ؟؟

قيس : اسير أي مكان بس ما اتم يالس بروحي هنا

مازن : عيل ادرس اول ما ترجع من المدرسة عشان عقب صلاة المغرب نسير عندهم

قيس : تم وحسيت نفسي متشقق من الفرح هههههه .

مازن : بلاك شاق الحلق تقول هندي جددوا له فيزته هههههه

قيس : باباه انا اول في فكر كيف في سوي اكل منشان ولاد مال انا بس الحين انا في مرتاح هههههههه

مازن : عافانا الله انت مره تمشى في الخط من حد يقولك شئ ؟؟

قيس : ايوا باباه

مازن : اقول فديتك انا وراي باجر دوام وانت وراك مدرسة قمر نش ارقد ابرك لك بدل ما تعذب اماية في نشتك الصبح

قيس : شور غاوي ههههههه بس قبل بطمن على الرعية في المطبخ هههههه(تراه قيس يحب ياكل وايد في الليل )

مازن : تطمن زين عليهم وطالع جان ناقصهم شئ هههههههه (وطلعت غرفتي اللي مالي مكان ثاني اشرد له واختلي فيها مع نفسي)

دخلت الغرفة وفتحت الكمبيوتر وفتحت المجلد الخاص فيني وتميت اكتب فيه عقب حسيت بالنعاس وظهرت ويلست على الشبرية ويات للمره الاولي ثريا في خاطري ومسكت مبايلى ورسلت لها مسج (مساء الخير)(اللي يسمعني كأني يبت الذيب من ذيله لكن على الاقل فيه تقدم ههههههه) ..

في بيت ابو طارق

ثريا : كنت توني برقد وبصراحة كان المبايل يمي لاني اضبط المنبه عشان صلاة الفير وقلت اكيد المسج اللي وصلني الحين في تالي الليل من بدرية هي دائما ترسل لي مسجات في ها الحزه وفتحت المسج تميت اقرا واطالع الرقم اللي وصلني منه المسج مب مصدقة عمري بسرعة نشيت وتميت اكتب مسج عقب ضحكت على عمري عقب اتصلت ببدرية اتخبرها شو اسوي

بدرية : هلاوغلا بالحلوين

ثريا : بدروه اخر خبر على الساحة الفنية مازن توه راسل لي مسج يمسى علي فيه شو اسوى ارسل له مسج وله اطنشه وله شو اسوي انصحيني

بدرية : هههههههه خيبة كل هذا عشان طرش لج مسج يمسى عليج؟؟ اسمعي هاي حركة عشان يشوفج ناشة وله اكيد ردي عليه يمكن يبي يرمسج

ثريا : مب احسن اتصل عليه انا

بدرية : يا الملقوفة لا اثقلي هههههههههههههه

ثريا : نزين يعني شو اسوي

بدرية : ردي عليه المساء وبس

ثريا : ان شاء الله يالله قلبي ويهج

بدرية : اوكى بشرط انج تخبريني شو يصير عندج اول بأول

ثريا : اوكى يالله برد عليه لا يقول ما ردت وقفلت عن بدرية وكتبت مسج لمازن(مساء الورد بدروبك ودهن العود في ثوبك .... هلا مازن)

في غرفة مازن
ما ادري ما توقعت انها ترد علي او ما توقعت ردها يكون بها الرقه وبصراحة حسيت باللوم فيها وحسيت اني فعلا ظالمها معاي عشان جي حاولت ادور لها مسج حلو بس يا خسارة كل مسجاتي نكد وله نكت يعني ما يناسبن في ها المواقف عشان جي اتصلت على سعيد بو عسكور ربيعي وطلبت منه يرسل لي مسجات حب وغرام وطبعا سعيد في الخدمة ههههههههههه واكيد انه تخبرني ليش وما رتاح غير يوم قلت له برسلهم لخطيبتي وعاد ما شجعني وتم يعطيني نصائحة اللي يسمعة ما كأنه مب عارف كيف كان يتصرف مع حرمته قبل يوم كان خاطبنها هههههههههههه

المهم انه رسل لي كم مسج بس صراحة كلهم خطيرات وبعد ما حسيت يناسبوا اني ارسلهم لها عشان جي قررت اني ارقد .. (الهروب هو الحل في كل حالة احس نفسي متوهج فيها ويمكن انا مب عارف شو سويت وهل اللي سويته صح وله غلط؟؟)

في بيت بو طارق
في غرفة ثريا

ثريا : اتريت الجواب بس ما فيه شئ وصل عشان جي بعد ما انتظاري طال قلت برقد لقيت بدرية داقة لي قلت لها لا رد ولا شئ حبيبتي اللي عندي يموت من الحياء ما اعرف كيف بتعامل معاه عقب

بدرية : ههههههههه الله يعينج لو انا منج كنت من زمان انتحرت ههه امزح لا تصدقين تسيرين تطلعين على الكرسي وتنتحري اصبري احسن لج وياما بتسمعي رمسة حلوه منه حتى انج بتملى منه

ثريا : يا ريت

بدرية : يالله برايج رقدي وفكري فيه ادري اليوم يعتبر يوم خاص عندج

ثريا : ههههههههههه فديتج يالله وانتي من اهل الخير ورقدت ما ادري كيف ومتي بس صج فكرت وايد في مازن وحسيت بالفرحة ..

في بيت ابو حسين

خلود : بعد ما طلع فيصل وسار البيت طلعت غرفتي صليت ركعتين لله ويلست شوي اقرأ قرآن وادعية المساء والليلة بصراحة فعلا ارتباطي من فيصل خلاني وايد ملتزمه وصار يهتم يجيب لي كتب دينيه واشياء كثيره صغيرة انا كنت غافلة عنها نبهني عليها ما اقول لكم فيصل متزمت بالعكس طريقته وايد حلوه في النصح وبصراحة احس اني محظوظة بارتباطي منه عقب تذكرت الظرف اللي عطتني اياه مزنه وظهرت من غرفتي بعد ما خذته ودخلت غرفه اخوي حصلت اماية راقده هي دائما ترقد عنده من يوم الحادث وكنت احسب حسين بعد راقد لكنه زجر علي .

حسين : تعالي خلود بلاج؟

خلود قربت صوبه وكانت اضائة الغرفة وايد بسيطه يا دوب قدرت اوصل له لحد سريرة وقلت له تفضل

حسين : شو هذا ؟؟

خلود : ما ادري طالعة يالله تامر علي شئ؟؟

حسين : ايه شغلي الابجورة اللي يمي(فتحت الظرف وانا مب عارف من وين وابدا ما توقعت ان اللى راسلته مزنه) فتحت الظرف ولقيت

رغم انه لا يفصل بيني وبينك إلا خطوات
ورغم ان زيارتي لك لن يستغربها احد
ولن يتسائلوا..
إلا انك من حرمتني ان اكون بجوارك
ولكن تأكد انني كذلك رغم انك تمنعني

حسين..

ربما حالت الاقدار يوم بيني وبينك
لن اقول لك كيف لانك اعلم مني بها
ولن اقولها لافتح جروح قديمة
بل انا اليوم اكتب رسالتي لنفتح صفحة جديده
ولتقف امام حقيقة واحده
انك حب طفولتي
وانني لن اتخلى عنك مهما حاولت تبعدني عنك

الغالي

ما انكر اني في يوم اردت الانتقام منك
وهذا دليل حبي وليس كرهي إليك
ولكن اليوم
ارغب ان اجدد ذلك العهد
الذي قطعناه معا
ان نكون مع بعض في الشدائد قبل الرخاء

اعلنها

احبك...
وحبك قدري المحتوم
فهل لك ان تقتلع حبك من قلبي؟؟

مزنووووه



ظنكم ممكن مازن يتقبل فكره زواجه من ثريا وخلاص يتغير ؟؟

ومزنه اللى سوته صح وله غلط بانها رفضت خليل؟؟

وخليل ممكن يتقبل رفضها وله بيكون له وجه نظر ثانية؟؟

حسين بعد ما قرأ الرسالة من مزنه ممكن يشوفها وله بيعاند؟؟

فيصل وخلود ممكن يكملون مع بعض وله ممكن يصير شئ يغير عليهم؟؟

تشاو

طرفوه

في بيت ابو مازن
في حجرة مازن

نشيت من الرقاد وكان الوقت مغرب هذا عرفته من الظلام ا للى كان يغطي الغرفة رغم ان الستارة مفتوحة نشيت وكنت ضايق لان صلاة العصر فاتتني وعشان ما افوت بعد صلاة المغرب نشيت وصليت في الغرفة بعد ما طالعت الساعة وعرفت انهم مصلين في المسيد خلاص عقب نزلت اكل شئ لاني حاس يوعان لكن استغربت البيت فاضى متعود ها الحزه الاستاذ قيس يكون مع اماية في الصالة ومزنه احيانا تكون معاهم بس ما فيه حد تخبرت الخدامة وقالت لي انهم ظاهرين كلهم ..

صراحة حسيت بقلق اتصلت على مبايل اماية ..
مازن : اماية وينكم؟

ام مازن : موجودين فديتك بلاك؟

مازن : ما شئ تخرعت يوم نشيت وما حصلتكم كلكم ظاهرين خاصة ان الخدامة قالت انكم طلعتوا مع فيصل ليكون حسين ولد عمتي فيه شئ؟

ام مازن : لا فديتك حسين ما فيه شئ واحنا في بيت خالتك ام علي

مازن : سكت فتره عقب قلت لها اوكى برايكم

ام مازن : يالله تامر علي شئ انزين؟

وتوها بتقفل عنه إلا وام علي تقولها هذا مازن؟

ام مازن : هيه نعم تخرع علينا يوم ما حصلنا في البيت

ام علي : عطيني التلفون وخذت التلفون من ايد ام مازن بعد ما قالت ام مازن لمازن ان خالته ام علي بترمسة

مازن : هلا خالتي مساء الخير

ام علي : هلا ولدي شحالك ؟

مازن : يسرج الحال ..

ام علي : لو ما عندك شغل مازن تعال هنا البيت عندنا تعشى لان ا هلك ما بيظهرون إلا متعشين وانا بصراحة حابة انك تيانا

مازن : لا خالتي مره ثانية انا الحين بظهر عند واحد من الربع

ام علي : تردني يا مازن؟؟

مازن : بصراحة انحرجت منها وقلت لها لا افا عليج ما عاش اللي يردج بيكم بس انا ما اعرف البيت

ام علي : بخلى علي يتصل عليك ويوصفك البيت يالله نترياك لا تتأخر..

مازن : ان شاء الله خالتي

الريم : (ما ادري شو اقول احس ان تعابير ويهي فاضحتني واحس ان قلبي ما صار يدق بشكل عادي احس طبول احس ان الكل صار حاس بدقات قلبي )

ام مازن : ليش جي يا ام علي ما فيه داعي لكل هذا ترانا مب غرب

ام علي : انا حابة نيلس كلنا مع بعض ونتعشى ونسولف .. وله يا الريم؟؟

الريم : اكيد هيه نعم

ام علي : وبعد بو مازن بخلى علي يتصل عليه ويعزمة لو انه مثل ما قلتي البيت بيتكم ولا محتاجين عزومة

ام مازن : بو مازن اليوم ساير دبي وبيبات هناك ها الشغل ما يخلصة

ام علي : يالله عسى خير .. ونشيت عشان اقول لعلي عشان يتصل بمازن ويوصفة البيت وطبعا بعد ما ظهرت سرت بعد المطبخ اشوف الخدم شو مسوين واطمن على العشى

في بيت ابو حسين

حسين : خلاص اليوم مب قادر احس اني مشتاق لمزنه موت عشان جي دقيت على مازن اتخبره ان كان قال لها شئ وله لا ..

مازن : كنت توني نازل بسير بيت اهل الريم واتصل حسين وتميت ارمسة وطبعا قلت له اني بعدني ما رمست مزنه في شئ

حسين : مازن بقولك شئ

مازن : قول يا ولد عمتي

حسين : فيه شخص قالي انه ممكن اتعالج وهو بيشوف لي موضوع العلاج والمستشفي وبيرتب الموضوع وعقب زواجكم بسافر

مازن : فرحت وتضايقت (فرحت لان الخبر اللي قاله حسين بخصوص امكانية علاجة وتضايقت لانه ذكرني ان زواجي من ثريا ما باقي له شئ )

حسين : بلاك سكت لا تفهمني غلط (اتحسبت مازن فهمني اني ما ابيه يقول لمزنه شئ وهذا يمكن خطر في بالي بس تضايقت لمه مازن سكت)

مازن : لا ماشئ الغالي المهم بخليك انا الحين لاني ساير بيت اهل الريم عقب برد اكلمك اوكى؟

حسين : ان شاء الله بس ما فيه داعي يا مازن تيب سالفة علاجي

مازن : افا عليك خلاص ان شاء الله وقفلت عن حسين وظهرت من البيت بعد ما حسيت اني تسبحت من العطر ههههه والدخون وقبل لا اوصل منطقتهم سرت اطايب ويبت لهم صحن حلاوة كبير وشكله حلو وكنت حاب ايب للريم ورد لاني اعرفها تحب الورد لكن عقب قلت بلاني احسن اركد شوي خخخخخخخ اتصلت على علي يوم قربت من البيت عشان اتأكد لكن شو بيت فعلا قصر دخلت وانا حاس بخوف مب عارف ليش خايف عيوني تي في عيون الريم لكن هذا لا بد منه اكيد انها بتسلم على واكيد اني ما راح اقدر امنع عيوني من انها تطالع عليها

مازن : سلمت على علي وخاشمته عقب دخلني الميلس شو اوصف لكم الميلس يمكن ميلسهم كبر بيتنا كله ههههه بصراحة فخامة بالقو يلست يم فيصل اخوي.. ويلست اتخبر علي عن علومة واخبارة

علي : بخير وسهالة ما نشكو باس

مازن : عسى دوم

علي : وياك الغالي

مازن : الحين ارتحت من جهه علي لاني قبل كارهنه لاني احسبة بياخذ الريم مني لكن الحين دامة اخوها ما فيه داعي للحقد وتميت اسولف معاه ونضحك ونسولف خاصة ان الاستاذ قيس ما شاء الله عليه تم بعد يسولف وينكت ويمكن انا ارتحت لاني ما شفت الريم رغم ان في داخلى ابي اشوفها لاني توووولهت عليها ..

في ميلس الحريم

ام مازن ومزنه والريم نشن يصلن وام علي دخلت المطبخ عشان تطمن على العشى واتصلت على علي وقالت له هاه يا ولدي مازن وصل عشان نحط لكم العشى؟

علي : مازن من ساعة هنا

ام علي : افا ولا دخل يسلم علينا ؟؟

علي : ما لي دعوه منج له

ام علي : خليه يدخل يسلم علينا ما فيه حد غريب انا وبنت خاله وله يستحي من امه واخته؟

علي : خلاص بقوله الحين وطالعت على مازن وضحكت

مازن : بلاك ؟

علي :هاي اماية تحسبك ما ياي ويوم قلت لها انك ياي قالت ليش ما دخل يسلم علينا ما فيه داخل غير اماية والريم وامك واختك وله تستحي منهم؟

مازن : خيبة قفطة وقلت له خلاص نزين الحين بدخل اسلم عليهم خبرهم

علي : ما فيه داعي تفضل تفضل وسرت وياه لين داخل ورجعت عنه عقب ايلس مع قيس وفيصل

مازن : حبيت خالتي ام علي على راسها بعد ما عاتبتني طبعا لاني ما دخلت اسلم عليها وعقب اكيد كانت عيوني تدور على كائن صغير بينهم خخخخخ ومن شفتها توها ناشة من سيادة الصلاة يبست في مكاني الحين بتسلم علي وبتي ايدي في ايدها؟

الريم : مشيت بخطوات تجاه مازن وحاولت اوخر القلق اللي باين على وسلمت عليه وحسيت بايدي اللي كانت متجمده قبل لا تسلم عليه صارت مثل النار وقلبي اكيد مثل النار بعد

مازن : ما كنت اسلم على الريم بايدي غير في الاعياد وصار اليوم بعد عيد عندي ..

ام علي : هاه يا ولدي علومك اخبارك؟

مازن : ما شئ والله

ام علي : ايلس نزين بلاك واقف

ومسكته عاد خالته ام علي وامه والريم ومزنه يضحكن علي معليهن عقب ترخصت عنهم وسرت الميلس

في بيت ابو طارق

ثريا : كنت اجهز مع الخدامة غرفة الضيوف حج خالتي فوزية اما بدرية اكيد بتبات في غرفتي ومعي بصراحة وقت زيارتهم وايد مناسبة انا محتاجة لبدرية وايد

ام طارق : انا مستانسة على زيارة فوزية بصراحة حاسة انه فيه عندي اهل يسألون عني صح ما قلت لكم اني ما عندي خوان ولا خوات وامي وابوي متوفين من زمان ورباني عمي وزوجني ولده راشد وسافرت معاه من زمان ما لي في الامارات غير اهل راشد ريلى وفوزية بنت خالتي

في شرم الشيخ

طارق : بدل ما ارتحت نفسيا من ها السفرة تعبت نفسيا وحسيت انها بلا فايده شئ احس اني خسرت حور لنهاية شكلي فعلا لازم اخليها لانها تحب فهد وانا ما لي غير اني انساها عشان جي قررت اني ارجع الامارات واكون مع اهلى واشغل وقتي بالشغل وربي كريم يخليني انساها

حجزت على اليوم اللي عقبة ورجعت على الامارات وطبعا اهلى ما يعرفون بموعد رجعتي خاصة اني قلت لهم بطول لكني ما قدرت السبب اللي سرت له فشلت فيه

في بيت ابو طارق

وصلوا قوم فوزية وبدرية وطبعا الترحيب والمهلى فيهم كان بدرجة كبيرة ومن بعد صلن بدرية وثريا المغرب طلعن غرفة ثريا وكل وحده فتحت قلبها لثانية تشكي لها همها

ام طارق وام فوزية وابو طارق يالسين في الصالة ويوم انفتح الباب ودخل طارق نشت ام طارق ولوت على ولدها وعقب سلم على ابوه وخالته فوزية وبصراحة ما توقع انه يحصل حد عندهم في البيت رغم انه شاف السيارة خارج في الحوي بس تحسب حد من ربع ابوه اثاريها سيارة بدرية ..

ام طارق : قلت للخدامة تخبر ثريا بان اخوها رجع

ثريا : يوم قالت لي الخدامة ما صدقت ونزلنا انا وبدرية وفعلا حصلنا الدكتور طارق يالس مع اماية وابوي وخالتي فوزية سلمنا عليه ويلسنا معاهم نسولف

في بيت ام علي

الريم : كنت يالسة ادرس عشان باجر عندي امتحان وشوي وسمعت حد يدق الباب كان اخوي علي ياي عندي

علي : هاه غناتي تدرسين؟

الريم : شوي وله ما من زود ههههه

علي : فديتج

الريم : حسيت ان علي في خاطره رمسة لا تستغربوا يمكن انا بس من فترة بسيطة تعرف على اخوي وامي لكن خلاص علي بالنسبة لي صار كتاب مفتوح سبحان الله يمكن لان خوان ما ادري وقلت له علي بلاك شو في خاطرك؟

علي : قربت صوب الريم ولويت عليها وقلت لها بصراحة كان خاطري اظهر معاج اليوم خاطري احس باحساس كل اخ وهو ياخذ اخته ويتمشى معاها بس ها الامتحان خرب علي

الريم : افا عليك بس جي وقفلت الكتاب وقلت له نص ساعة وبكون جاهزه لكن بشرط توديني العين مول ونتعشى في أي مطعم على ذوقك

علي : بس جي؟؟ فالج طيب لكن الامتحان يا فالحة شو بتسوين فيه؟

الريم : اقولك ولا تعصب؟

علي : قولي لي

الريم : الله يخلى البراشيم ههههههه (امزح) بس بدرس اول ما ارجع

علي : فديتج يالله عيل بترياج تحت لا تتأخري

الريم : لا ما راح اتأخر بس تخبر اماية كان بتسير معانا

علي : امج الغالية على وشك انها ترقد بعدين انا قلت ابي اسير مع اختي وبس

الريم : غمزت لعلي وقلت له نزين الشيخ يالله لا تأخرني وبعد ما نزل علي حسيت اني لازم البس احلى لبس وتكشخت احلى كشخه وحطيت مكياج ونزلت

علي : تميت اصفر شو ها القمر اللي نازل لا بصراحة ما اروم على هذا كله بيقولن علي يمشى مع قمر

الريم : تميت اسوي حركات واستعرض بالعباة والشيلة ونزلت من على الدرج ومسك علي ايدي كأني اميرة (يمكن في نظركم خبال بس والله احساس حلو)

ظهرنا انا وعلي وفي السيارة شغل لي شريط منوعات فيه احدث الاغاني بصراحة فيه اغنية لمحمد عبدو عيبتني وايد نسيت كلماتها بس حسيت انها مكتوبة لي وتوصف وضعي انا ومازن

دخلنا العين مول وطبعا كنت احس علي شوي هين لكن منو يقول قبل لا ننزل من السيارة تعليمات وارشادات حطي الغشواه وما ادري شو المهم بصراحة حاسة اني مستانسة بالقو لكن لمه شفت الزحمة في العين مول قلت لعلي خلاص ما ابي ظهرنا

علي : شو ظهرنا بوديج اعشيج

الريم : لا خلاص هونت وديني أي مطعم ناخذ بارسل ونتعشى في أي مكان هادي (بصراحة انا ما احب الزحمة وايد واحس اني ما اعرف اتصرف في وسط الزحمة)

علي : امرج الغالية

الريم : شوف عندك لين الساعة 12 عقب السحر بيقلب وبظهر على حقيقتي ههههه

علي : فديت اختي وطبعا لفينا شوي في العين مول بعد ما اقنعتها وخليتها تشتري ملابس بصراحة مثل ما قلت لكم خاطري احس انها اختي وانها تدلع علي وتتأمر علي (مب خبل بس يمكن لاني فقدت ها الاحساس وكنت طول عمري احلم فيه ويمكن بعد كان خاطري اعوض الريم عن غيابي انا وامي عنها)

الريم : عقب ما ظهرنا من العين مول وداني علي شارع خليفة وطلب لي عشى من مطعم هو اختارة وخذينا العشى بارسل وسرنا يلسنا في مكان في حديقة ما فيها حد وطبعا يلسنا نسولف ونضحك مع بعض حاولت خلالها اتعرف على اخوي علي اكثر وبصراحة كان شخصية مرحة وحبوب بالقو ..

في بيت ابو مازن
في حجرة مزنه

مزنه توني راجعة من الدوام وصليت الظهر وحاسة هلكانه بس تقلبت في السرير اني ارقد ما فيه فايده ظهرت ونزلت قلت يمكن احصل حد يالس في الصالة لكن كلهم في غرفهم وفيصل اليوم سار مع خلود واختها دبي عشان موضوع الفستان ولكن الاستاذ مازن اللي مب مهتم عشان جي قررت اني اسير الحين وارمسة عن موضوع ثريا

في حجرة مازن

مازن : كنت افكر في اخر مره شفت فيها الريم وسلامي عليها ولكن الدقات اللي كانت على الباب قطعت علي ورجعتني من عالم الخيال اللي كنت فيه

مزنه : راقد؟

مازن : لا بعدني

مزنه : ممكن ارمس وياك؟

مازن : افا عليج بدون ما تستأذني قولي اللي في خاطرج الشيخة مزنه

مزنه : خطيبتك ثريا

مازن : لويت بوزي وقلت لمزنه بلاها؟

مزنه : انت مقتنع فيها لمه خطبتها؟

مازن : لا تعليق

مزنه : مازن كلنا ملاحظين انك مب مهتم فيها ومب مهتم ان عرسك ما باقي عليه شئ وانت البنت ابدا ما تتخبر عنها ولا تسأل عنها كأنها ما تعني لك شئ مب كأنها حرمتك ومب باقي شئ وتصير في بيتك

مازن : ممكن ما نرمس عن الموضوع

مزنه : اسفة ما اقدر البنت قالت لي اسألك وهي وايد متضايقة حتى انها قالت لي لو ما تبيها خلاص طلقها وطبعا اماية ما تعرف بالموضوع وما حبيت اقول لها

مازن : حسيت بثريا للحظة حرام اللي انا اسويه فيها لكن...(وبعد ما رمست باي كلمة)

مزنه : لا انت مب مازن اخوي انت فيك شئ مب طبيعي

مازن : ابي ارقد ممكن؟

مزنه : قصدك تبي تهرب اوكى انا بظهر لكن الهروب تراه عمره ما يحل أي مشكلة لو حاس انه فيه شئ احسن ترمس من الحين مب عقب وظهرت عنه وانا واصله حدي صراحة اليوم حسيت باحساس ثريا اكثر وحسيت اني فعلا معصبة على مازن وبرود اعصابة

في بيت ابو طارق

بدرية وثريا توهن ناشات لانهن اصلا راقدات الساعة 6 الصباح وطبعا البقية تغدوا عنهن وكانوا يالسين في الصالة يطالعوا الاخبار ونزلن الانسة ثريا والانسة بدرية

طارق : خيبة خلصتن الرقاد طالع عيونهن كيف منتفخات

ام طارق : جي انا لين الصبح سمعانه سوالفهن

ام فهد : برايهن خلوهن

ام طارق : غلامة(طبعا تقول لثريا) سيري حطي الغدى حقج وحق بدرية

بدرية : لا خالتي ما نبي الحين

ثريا : الحمد لله ريحتيني هههههههه

طارق : اللي يسمعها يقول صج هي بتحط الغدى مب كأنها بطرش الخدامة

شوي ورن التلفون وراح طارق يرد وكان المتصل ابوه قاله انه بيتأخر في الدوام عشان عنده عملية اليوم وقاله يخبر امه عشان ما تخاف عليه وطبعا طارق قال لامه بعد ما قفل عن ابوه

بدرية : هاه وين بتمشونا في العين نحن اعتقد ما قصرنا فيكم ومشيناكم في دبي

طارق : اول مره اشوف ضيف يتشرط اقولج في دبي عندكم عادي تتمشون لكن في العين منجووود خخخخخخخخ

بدرية : لا والله ؟؟ عيل اماية يالله سرينا دبي

ثريا : خيبة يعني انتي يايه عشان تتمشين مب عشانا؟

بدرية : قفطة خيبة شو ارد عليها هاي الحين

ام فهد وام طارق ميتات ضحك عليهم وعقب قالت ام طارق خلاص الغالية بنوديج يبل حفيت بصراحة مكان حلو

طارق : او ام طارق تبي تسير يبل حفيت من عيوني

وبعدها نشن بدرية وثريا وتغدن وام فهد دخلت تريح شوي وام طارق بعد وطارق قال لهم انا بظهر شوي وبرجع لكم عقب المغرب تكونوا جاهزين

بدرية من العصر بنكون جاهزين

طارق : لا ما ينخاف عليج لو اني شاك اني بحصلكم جاهزين اعرف سوالف البنات

ثريا : لا انا وبدرية غير

طارق : نزين غير هانم يالله من رخصتكم لكن يوم أي احصلكم جاهزين

في بيت ام علي

ام علي : امممممم فيه شئ يدور في راسي انا مب عارفة كيف اوصل له طبعا انا اعرف ان الريم بنتي تميل لمازن ولد عمتها وهذا تأكدت منه بعد ما رمست معي الريم في يوم وقلت لها انج مرتبطة في مازن وهي نفت ها الشئ لكن كل شئ يدل على انه يعني لها شئ كبير وانا ما ابي بنتي ينكسر خاطرها لكن مازن مالج ولازم اتصرف واكنسل ها الزواجه لا تعتقدوا اني شريرة لكن انا في هذاك اليوم اللي زارنا فيه مازن مع اهله تأكدت انه هو بعد يحب الريم ويمكن ظروف معينة خلته يرتبط في ثريا ..

في بيت ابو طارق
بعد المغرب

ام فهد وام طارق وثريا وبدرية جاهزات ينتظرن طارق عشان يطلعن بس طارق تأخر عليهم يتصلون عليه ما يرد وبعدها بشوي وصل ابو طارق اللي كان هلكان من يوم طالع الصبح من البيت ما رجع لانه كان عنده عملية اليوم

بو طارق : على وين اشوفكم جاهزين وبعباياتكم؟

ام طارق : بنمشى ام فهد وبدرية وطارق وعدنا ينا بعد صلاة المغرب ونتصل عليه ما يرد

بو طارق : اكيد مشغول في شئ وبيرجع بعد شوي يالله المهم انا بطلع اريح شوي

ام طارق : احط لك شئ تاكله؟

بو طارق : لا ما لي نفس في أي شئ وطلع غرفته عشان يرتاح

ام طارق : سرت المطبخ وسويت كوب عصير برتقال طازج حق ابو طارق ولحقته الغرفة وعشان بعد اطلع له ملابس من الكبت لاني اعرفة بيدخل يسبح (مثل ما قلت لكم ارتباط ام طارق في ابو طارق وايد قوى ما شاء الله عليهم)

وبعد ما تطمنت ام طارق على بوطارق نزلت وحصلتهم بعدهم يتريون قالت لهم شو بعده ما وصل طارق صراحة بديت احاتية

ام فهد : انا قلبي كان نار من المحاتاه ها الولد ارتبط فيه وايد واحسه مثل فهد ولدي ما شاء الله عليه حبوب وراضى والديه مره من اشوفه احس اني اشوف فهد ولدي

بدرية : عطوني رقمه انا بتصل عليه من رقم غريب يمكن يرد يمكن يبي يتهرب عشان يظهرنا (بصراحة حاولت الطف الجو شوي لاني بعد ما اجذب عليكم حاسة بخوف)

ثريا : ظهرت مبايلى من الشنطة وطلعت رقم طارق وعطيته بدرية عشان تدق على طارق

في الوقت اللي بدرية تدق على طارق كان طارق يفتح باب الصالة ويدخل علينا

ام طارق : اللي اشوفه صح هذا ولدي ولكن شو القطعة البيضاء على ايده ومنو الريال اللي واقف معاه هذا كأنه مازن

ام فهد : ركضت صوب طارق اللي كان مبتسم ..

طارق : لا تخافوا لا تخافوا ما فيه شئ

ثريا : شو ما نخاف ايدك مجبسة طارق ونسيت اللي واقف عدال اخوي نسيت مازن

طارق نزيد ممكن نيلس بفهمكم كل اللي صار وقلت لمازن تفضل مازن

يلس طارق على كرسي كبير ويمه مازن اللي حاول يترخص بعد ما وصل طارق لكن طارق قاله تفضل

طارق : وانا ظاهر من البيت اتصلت على فيصل وقالي انه في دبي مع خطيبته وقلت بلف شوي في العين وفي اشارات دوار الساعة انا توني بظهر بعد كانت الاشارة خضراء كان واحد يكسر الاشارة بس الحمد لله ما كان مسرع وايد وايد وطبعا تداعمنا وحذتها ما اتصلت على ابوي اتصلت على مازن عشان يكون معاي وسرنا المستشفي وعقب سرنا مركز الشرطة والحين انا كاني ما فيني شئ بس كسر في الايد

ام فهد : فديتك الغالي ما تشوف شر خلاص باجر لازم نذبح على سلامتك

ام طارق : هيه نعم لازم

مازن : الحين انا بترخص يالله تامر على طارق ؟

ام طارق : وين يا ولدي ايلس بتتقهوى واشرت لثريا عشان تسير المطبخ تحط فواله لخطيبها وطبعا عرفت ام فهد على مازن قلت لها هذا مازن خطيب ثريا

ام فهد : والنعم فيه والله

مازن : والنعم بحالج خالتي المهم خالتي انا ما بتقهوى بسير البيت..

ثريا : خلوه على راحته وطلعت غرفتي (ما ادري شو من الاحاسيس اللي حسيت فيها حسيت اني فخوره فيه حسيت اني مقهوره منه حسيت بفرحة لمه شفته رغم خوفي على اخوي طارق)

بدرية : انا لحقت ثريا لمه طلعت غرفتها

مازن : انا ترخصت وسرت البيت بعد ما قلت لطارق ما فيه داعي يوصلني لين خاري وقلت له ارتاح وانا بتصل عليك عشان اطمن عليك

طبعا ام فهد وام طارق يلسن يسولفن مع طارق شوي عقب سار طارق غرفته يرتاح


--------------------------------------------------------------------------------

في حجرة ثريا

ثريا : شفتي ما يطيق يلس معانا شوي

بدرية : لا عاد هاي المره عنده حق يعني يايب اخوج مسوي حادث ما فيه مجال انه ييلس ويتقهوى قصده يسير عشان يخليكم مع طارق

ثريا : ما ادري شو اقولج

بدرية : انتي وايد حساسة لكن تعرفين شو ها القمر صراحة ما كنت اعتقد ان مازن بها الحلاة وها الشخصية رهيب صراحة

ثريا : طالعت على بدرية باستغراب

بدرية : لا بس مايد احلى منه هههههههه امزح معاج يالله اضحكي وقمي نسير نيلس معاهم ونطمن على طارق ونسوي تحقيق عن سبب الحادث ليش ما انتبه للى كاسر الاشارة

ثريا : والله ليسفرج طارق واكيد انه بيسفرني معاج لو سرنا نغلس عليه الحين

بدرية : يا سلام خلاص بقوله يسفرني عند مايد امريكا عيل ههههه يالله قمي قمي بلا نكد ما يسد انكم ضيعتوا علينا طلعة يبل حفيت وباجر برجع دبي بدون ما اكون ظهرت

ثريا : يالله يا غلسة وطلعنا وحصلنا اماية وخالتي ام فهد بروحن في الصالة وتخبرتهم عن طارق قالوا انه في غرفته

بدرية : خلاص نخليه يرتاح يالله قمي نسير نمشى شوي في حارتكم تراني ملانه بالقو

ثريا : بترخص منهم وبنسير

وتوني بقول لماية ورن التلفون رديت عليه كانت خالتي ام امازن داقة

ام مازن : هاه ثريا بنتي تستحقوا سلامت طارق توه مازن خبرني شحاله الحين؟

ثريا : الحمد لله

ام مازن : عطيني امج ارمسها

ثريا : عطيت اماية التيلفون وقلت لها خالتي ام مازن

ام مازن : سلامته طارق ان شاء الله

ام طارق : الله يسلمج الغالية يالله الحمد لله انها سدت لين هنا

ام مازن : الحمد لله انا توه مازن قالي وان شاء الله باجر بنيكم عشان نطمن عليه

ام طارق : حياكم الله البيت بيتكم

ام مازن : يالله المهم حبيت اطمن على طارق فديته

ام طارق : فيج الخير الغالية

ثريا : بعد ما خلصت اماية مرمسة خالتي ام مازن قلت لها بنسير انا وبدرية نمشى شوي في الحارة

ام طارق : برايكن

في دبي

حور : رجعت البيت خاصة بعد ما عرفت ان عمتي وبدرية ساروا العين وان عزه بروحها مع عمي .. خاصة اني مب وايد مع عزه وما راح تحس بان فيني شئ ولاني حاولت انسى كل اللي سمعته من طارق واعتبره ما كأنه صار

عزه : انا كل يوم اتصل على اماية عشان اطمن واليوم قالت لي ان طارق سوا حادث وان ايده مكسوره بصراحة قلبي عورني عليه وبعد ما قفلت عنها ظهرت وخبرت ابويه اللي كان يطالع التلفزيون وكانت حور تلاعب مايد

ابو فهد : شو حادث وعسى مب متعور وايد؟

عزه : تقول اماية ايده مكسوره

ابو فهد : عيل باجر ان شاء الله بسير العين اطمن عليه

عزه : بسير وياك ابويه .. والله اشتقت اماية

ابو فهد : وانتي يا حور بتسيرين معانا؟

حور : هاه؟؟ لا عمي ما بسير

مايد الصغير : انا بروح وياك يدي

ابو فهد : عيل دام مايد بيسير انتي بعد سيري ويانا يا حور

حور : لا لا عمي برايكم سيروا انتو ومايد براية يسير وياكم انا بسير عند اماية بعدها تعبانه

ابو فهد : على راحتج عيل عزه اتجهزي باجر بنسير من الصبح

عزه : ان شاء الله ابويه

في العين
في بيت ابو طارق

طبعا ام مازن وابو مازن ومزنه ومازن وفيصل وقيس ساروا عشان يطمنون على طارق وبعد وصلوا قوم دبي ابو فهد وعزه ومايد الصغير

في ميلس الحريم

ام طارق : عرفت ام مازن على ام فهد ويلسن يسولفن ..

ام فهد : والله اني من شفت طارق داخل علي بايده المكسوره ان قلبي عورني عليه فديته غلاته من غلاه فهد ولدي ودمعت عينها ومسكت مايد ولد فهد وحبته على راسه

ام طارق : طبعا قالت لام مازن ان فهد متوفي وان مايد ولده ..

ام مازن : هيه الله يرحمه لكن حمدي ربج انتي ولدج راح من الدنيا وخلى لج ولد يحمل اسمه انا ولدي سار بعده عمره 20 سنه وبعد هي بجت

مزنه : شو قلبتنها مناحة استهدوا بالله بلاكم

ام طارق : هيه والله صج يا بنتي وقالت لثريا تقرب الفواله وتمت تقص وتعزم عليهم

عزه : يلست يم بدرية اختي وهي تتخبرني عن حور وانا كان خاطري اعرف سبب الحادث اللي تعرض له طارق بس ما حد عاطني ويه

مزنه : يلست يم ثريا وقلت لها انا رمست مازن ولا تحاتي الغالية بس مازن شخصيته يستحي وله ما فيه شئ (قلت ها الكلام وانا بصراحة حاسة بالذنب تجاه ثريا )

ثريا : خلاص بتحمله وامري لله

مزنه : يالله الله يعينج على حيائه هههه

ثريا : هيه نعم

مزنه : تميت اسوي حركات حج مايد الصغير فديته وايد حلو وتميت ازجره عشان اسلم عليه وهو يستحي وينخش في حضن يدته

بدرية : تعال يمكن تخطبك هههههه

مزنه : هيه تعال ممكن اخطبك تراني ا شتغل ومهري جاهز ههههه

بدرية : عيل زين

مايد : رمس يدته في اذنها وقالها بسير عند يدي خلاص الولد واصل حده من الحياء ههههه

ام طارق : تعال انا بوديك وشليت مايد ووقفت عدال الباب ودقيته وظهر لي بو طارق وقلت له دخل مايد عند يده

ابو طارق : شليت مايد ودخلته وفديته ما احلاه سلم على الريايل كلهم وخاشمهم ويلس يم قيس

قيس : يلست اسولف مع مايد الصغير

طارق : انا كنت اطالع مايد وشوي وياني مايد

مايد : ليش ايدك مربوطة ؟

طارق : تعورت فيها

مايد : عشان ما سمعت كلام امك ؟؟

قيس : جاوب يا طارق وهجه هههههه

كلهم تموا يضحكوا على طارق اللي صار ويه احمر ومايد يطالع عليهم وعقب سار يلس في حجر يده على باله يضحكون عليه

في دبي
في المطار

وصل مايد وطبعا ما حد يدري عن موعد رجعته وهو ما قال لاهله عشان ما يعارضون رجعته وسار بيت اهل بدرية ودق الباب لانه حاب يسوي مفاجأة حق بدرية لكن الخدامة فتحت له الباب وقالت له انه ما فيه حد في البيت

مايد : حسيت خلاص بيغموا علي حسيت بخوف وكنت ما ابي اتصل على بدرية وبطاقتي مال الامارات في البيت لكن شو يصبرني اسير البيت واركب بطاقة الامارات اشتريت كرت شارع واتصلت على مبايلها ولكن بدرية ما ردت علي وانا عارف بدرية ما راح ترد على أي رقم غريب اف يعني ما فيه حل غير اني اسير البيت واركب بطاقتي الامارات

في بيت ابوطارق

ابو مازن وام مازن ومزنه ترخصوا وساروا البيت اما طارق وقيس ومازن يلسوا مع طارق في الميلس يسولفوا

قيس بصراحة ارتحت وايد لمايد وخاطري خواني يعرسوا ويكون عندهم عيال .. بصراحة اليهالوه حلوين

بدرية : حاسة بتعب قلت لهم بطلع الغرفة ارتاح

ثريا : بسير المطبخ ايب عصير وبلحقج

بدرية : وانتي عزه بتسيرين معانا؟

عزه : لا بتم هنا مع اماية وخالتي (وانا كان في خاطري يدخل طارق واطمن عليه)

بدرية : ما انتبهت لمبايلى اصلا كنت مخلتنه في الشنطه ولا انتبهت لاي مكالامات فيه

ثريا : يبت عصير فيمتو مع الثلج وبصراحة حاسة مرتاحة اليوم ومستانسة وتميت امدح العصير حق بدرية اللي كانت مغمضة عيونها تحاول ترقد

بدرية : اقولج بلاج انتي اليوم

ثريا : شفت القمر امس واليوم

بدرية : عافانا الله ربي يثبتج بعقلج وبصراحة كنت مشتاقة لمايد وايد وهو من كم يوم ما دق وانا قلت اعاند له ما ادق شوي وسمعنا مبايل يرد وبصراحة مالي خاطر ارد

ثريا : ايبه لج؟

بدرية : لا ما لي خاطر ارمس حد وبعدني ما كملت رمستي وكان الاتصال قطع بس نطيت فجئة ويبت شنطتي وطالعت الرقم وعيوني تدمع لاني كنت حاطة لمايد نغمة خاصة ويمكن ما انتبهت لرنه ويمكن ما توقعت

ثريا : بسم الله بلاج انتي اللي عافانا الله مب انا

بدرية : اشرت لثريا انها تسكت الحين واتصلت على مبايل مايد

بداية الاتصال دموع من طرفي ومليون سؤال خوف علي من مايد

ثريا : مب فاهمه شئ وعشان جي ظهرت من الغرفة وقلت اخليها تاخذ راحتها

مايد : ما قدرت احس انج ضايقة وانا في بلاد وانتي في بلاد انا قررت ان نعرس واخذج معاي اكمل دراستي خلاص انا اللي مب قادر اصبر بلاج

بدرية : ياه يا كبر التضحية اللى سواها مايد عشان خاطري وانا اللي معانده من كم يوم ما اتصلت عليه اثاريه هو محضر لي ها المفاجأة فديتك يا مايد

مايد : صح وينكم فيه سرت البيت عشان اسوي لج مفاجاة قالت لي الخدامة انكم مب في البيت

بدرية : نحن في العين لكن الليلة انا برجع دبي مشتاقة لك موووووت

مايد : انا بيج العين

بدرية :لا انا برجع دبي اليوم..وبعد ما خلصت مرمستنه نزلت تحت وخبرت اماية ان مايد رجع اليوم وانه في دبي واني برجع دبي ..

ام فهد : تري لين باجر بنرجع كلنا

بدرية : ما اقدر اماية برجع الليلة وبرايكم انتو تموا عادي تراه بسير بسيارتي

ام فهد : خلاص خبري ابوج ويصير خير

بدرية : ترخصت من ابويه ووافق وطلعت الغرفة جهزت اغراضى وطبعا قلت لثريا تعالي الاسبوع الياي عشان نسير نحجز لج فستان العرس لانه ما باقي شئ على عرسج

ثريا : ان شاء الله الغالية بس ديري بالج على نفسج ولا تسرعي

بدرية : افا عليج من عيوني الثنتين


بعد ما دخل عضوء يديد من مشجعي علاقةمازن والريم واللي هي ام الريم ممكن ينجح الحزب في كنسله ارتباط مازن من ثريا واخذ الريم؟

حسين بيسافر يتعالج؟؟

حور وطارق ممكن تنتهي علاقتهم لين هنا وله فيه محاولات من طرف طارق؟؟

واخيرا بدرية ومايد بيكونوا زوجين وله فيه شئ بيحصل؟؟

تشاو

في دبي

مايد : وصلت البيت وسلمت على اهلى وطبعا جاوبت على اسئلتهم

ليش رجعت؟؟
تراك لاحق على الزواج؟
وطبعا عتاب كبير اني ضيعت الفصل الثاني من ها السنه لكن كل شئ يهون عشان خاطر عيون بدور غناتي وطلعت غرفتي وقلت برتاح شوي خاصة اني توني واصل ومرهق لكن قلت قبل اسمع صوت بدرية

مايد : اتصلت عليها وردت علي وبعدني ما قلت ولا كلمة

بدرية : هلا عمري هلا كلي هلا غناتي

مايد : احم كل هذا لي انا ؟؟

بدرية : ومنو غيرك يستاهل ها الرمسة

مايد : يعني هاي رمسة بس

بدرية : لا طبعا هاي من القلب وها الشئ انت حسيت فيه وله؟؟ وطبعا قالتها بدلع

مايد : وينج فيه؟

بدرية : في الطريق ياية دبي

مايد : كنت منسدح على السرير وخلاص برقد ولكن من قالت لي ها الرمسة قلت لها لا والله ومنو معاج؟

بدرية : بروحي

مايد : اسمعي انتي وين بالضبط؟

بدرية : توني في العوهه

مايد : خلج مكانج وانا بيج بصراحة ما اقدر اتحمل انج ياية بروحج وفي ها الحزه (طبعا الوقت كان عقب صلاة المغرب)

بدرية : لا غناتي لا تيا ولا شئ انت ارتاح وانا اوعدك اني امشى على راحتي بعدين انا بدرية والاجر على الله ههههههه

مايد : لا طبعا ما اقدر ارتاح

بدرية : لا تصير خواف عاد

مايد : نزين رمسيني طول الطريق معاج سماعات اذن وله ؟؟

بدرية : هيه عندي(وانا ما عندي بس خفت اقوله لا يصير يحاتي اكثر)

مايد : وغلاتي عندج ما تزيدين السرعة اكثر من مائة سمعتي؟

بدرية : من عيوني يا عيوني

في بيت ابو مازن

ام مازن : صليت المغرب ويلست اقرأ قرآن شوي لحد ما وصلوا عيالي من المسيد

مازن وفيصل وقيس : مساج الله بالخير اماية

ام مازن : مساكم الله بالنور هلا عيالي (وكانت مبتسمة لهم)

مازن : فديت اللي يبتسم وحبيت اماية على راسها ويلست يمها

فيصل : رن مبايلى وكانت خلود داقة ورديت عليها وقلت لها بدق انا عقب شوي

ام مازن : هاه يا ولدي يا فيصل خلصت انت وحرمتك خذت كل اللي تباه؟

فيصل : هيه نعم

ام مازن : وانت يا مازن حرمتك تجهزت خلاص تراه ما باقي شئ على عرسكم

مازن : ما ادري عنها اتصلى انتي فيها وسأليها انا تدرين فيني استحي

ام مازن : ان شاء الله يلى تستحي

قيس : يالله متى بعرس انا (لقافة ههههههه)

ام مازن : نزين بالنسة حج غرف النوم تراه اختكم مزنه اختارتها لكم وهي هدية منها لكم وباجر بيركبوهم وباقي اللمسات حريمكم عقب يشوفون شو يبون ونحن حاضرين

فيصل : وينها مزنوه بشكرها

ام مازن : اختك سايرة عند الريم

مازن : فز قلبي من طروا الريم وقلت لماية ومنو شلها عند الريم ؟

قيس : خاينة

ام مازن : ابوك وداها وهو ساير العزبة السولعية تراه اليوم ولدت (السولعية ناقة عند ابو مازن)

قيس : لولولولولولييييييييش الف الف مبروك ما ياكم يا ا م مازن هههههههه(طبعا يتمصخر)

كلهم ضحكوا عقب قال مازن نزين ومزنه منو بيرجعها عقب؟؟

قيس : لا تقولي ابويه يا يمه شو رايك مازن انا وانت نسير نيبها؟؟(يخطط الولد)

ام مازن : هيه احسن بدل ما ابوك يسير لها

قيس : فديته ابويه بي تعبان من العزبه (مكار)

ام مازن : يالله من رخصتكم بسير المطبخ اطالع الخدامات يجهزون القهوه

قيس : ما فيه داعي اماية بس هاتوا عصير ( بصراحة خطير ها الولد)

ام مازن : سوت لقيس مالت خخخخخخخ مب لك الشيخ خالتك ام طارق وبنت خالتها بيزوروني الحين

مازن : يالله يا قيس شو ها القفطة هههههه

قيس : عادي دامها يات من اماية حبيبتي (استاهل حد قالي اتليقف وايد؟)

فيصل : يالله من رخصتكم وله تبي شئ اماية ايبة لج؟

قيس : توكل انت سير ادري فيك ميت تبي ترمس خالد هههههه(طبعا يقصد خلود)

فيصل : يا الرزه بس لو منك انا عقب ما اماية قفطتني ما ارمس ولا بكلمة

مازن : ياخي انا ما اعرف ها الولد ويه شو؟؟

فيصل : ليش يا مازن ما تعرف ؟؟ ويه لوح هههههههههه

قيس : خيبة شكلي تهزأت

في بيت ابو طارق

طارق يالس في الميلس مع عمه بو فهد وابوه ومايد الصغير

مايد : قرب صوب طارق وقاله انت عندك جيم بوي وله بلايستيشن؟

طارق : ليش؟؟

مايد : عشان نلعب

طارق : فديتك هيه عندي يالله تعال بنسير غرفتي هناك نلعب ومسكت مايد من ايده ونشيت وقلت لهم بنطلع فوق غرفتي نلعب

ابو فهد : صج ها الولد تعب من وين يسير

طارق : بالعكس فديته حبوب (كان خاطري اشل مايد في حضني لكن ايدي المكسوره منعتني وكتفيت اني امسكه من ايده لكن حتى مجرد اني ماسكه من ايده احس براحة)

في غرفة ثريا

اتصل على بدرية ما ترد على حسيت اني ميته خوف عليها وطلعت من غرفتي وتوني بنزل قلت بسير ايلس معاهم عشان اهدى اعصابي وتلاقيت مع طارق ومايد

طارق : بلاج؟

ثريا : اتصل على بدرية عشان اتطمن عليها ما ترد علي

طارق : يمكن ما تبي تنشغل بالتلفون وهي تسوق

ثريا : لا طبعا مب شخصية بدرية جي اكيد فيها شئ

طارق : لا تيلسي توسوسي لحظة بشغل اللعبة لمايد وبيج سيري غرفتج لا تنزلي جي عقب خالتي ام فهد تحاتي

ثريا : نزين

طارق : شغلت اللعبة لمايد وسرت غرفة ثريا وقلت لها عطيني رقم بدرية المبايل انا بتصل عليها وعطتني الرقم واتصلت وبعد بدرية ما ردت رسلت لها مسج(بدرية انا طارق طمنيني عليج)

ثريا : انا ليش خليتها تطلع بروحها وخلاص الدموع توها بتنزل

طارق : وصلني مسج فتحته كان من بدرية (لا تحاتي انا في قرب البيت وطمن ثريا لانها تتصل علي بعد وقول لها برمسها عقب)

ثريا : اف الحين ارتحت بس ليش الحمارة ما ترد علي انا؟؟

طارق : ههههههههههههههههه ما ادري

ثريا : نزين معليها براويها عقب شغلها

طارق : يالله من رخصتج بسير عند مايد لا يخبص شئ

ثريا : وانا بنزل عندهم وبطمنهم بعد على الدبه هاي ونزلت ولقيت اماية وخالتي لابسات عباياتهم وقلت لهم على وين؟؟

ام طارق : بيت خالتج ام مازن عازمتنا على قهوه

ثريا : اها وسرت ويلست يم عزه وقلت لها لو مب طارق متعور كنا قلنا له يظهرنا (انا بعد اخطط لشئ)

عزه : تظاهرت بعدم المبالاة لو ان من هناك قلبي يدق وخاطري فعلا اظهر مع طارق

ثريا : شو رايج نسير نيلس معاهم في الغرفة يالسين يلعبون

عزه : لا طبعا (خيبة احس بموت لو سرت غرفته ويلست هناك انا متأكده ما بقدر اشيل عيوني من عليه)

ثريا : نزين تحبين الافلام الاجنبية؟

عزه : اموت فيهم

ثريا : وطارق بعد يحبهم وعنده سيديهات وايد لافلام اجنبية شو رايج ايب من عنده فلم ونيلس نطالع تراه ما ورانا شئ

عزه : اوكى

في بيت ام علي

علي : توني راجع من السينما من مع ربعي اللى ياين معاي من دبي والليلة بيباتون عندي

ام علي : انا توني تطمنت على علي والريم في غرفتها الحين بسير ارقد صج تعبانه لاني انا اليوم كنت في دبي سرت اشوف اخوية واتطمن عليه

الريم : ما كنت ادري ان اخوي علي معاه احد في الميلس وبدون ما افكر ولا شئ دخلت الميلس بعد ما شفت سيارة اخوي علي في الكراج لانه متعود ييلس في الميلس يطالع افلام او يلعب بلايستيشن

منذر : انا اللي طالعت اول واحد اول ما انفتح باب الميلس

علي : انا بعد رفعت راسي لاني استغربت منو بيفتح الباب من اهل البيت واماية عارفة ان معي ربعي وانصدمت يوم شفت الريم بدون شيلة واقفة على الباب ..

الريم : من الزيغة والموقف المحرج اللي انا فيه بدل ما اشرد تميت واقفة في مكاني وما حسيت بعمري غير في غرفتي بعد ما سحبني علي اخوية لين الغرفة

علي : عرفت ان الريم ما كان قصدها لكن انا بصراحة حسيت بغيض يوم شفتها جي وما ادري كيف يريتها من ايدها لين وصلتها غرفتها

الريم : بعدني مب مستوعبة اللي صار لا حول ولا قوة إلا بالله صج فشله بالقو والله يعين علي اخوي على التعليقات اللي بيلاقيها من ربعة الحين انا شو وداني الميلس ما ادري ودومي اكون لابسة شيله اشمعني اليوم ما ادري وفي ها الحزه فكرت اتصل على مزنه ما ادري ليش

مزنه : مرحبا ملاييييين ولا يسدن في ذمتية حيا الله ريموووه

الريم : كنت اسمع رمستها وما رمست

مزنه : وابوي الريم بلاج ؟؟ متصلة عشان تسكتين؟

الريم : سكتي يا مزنوووه والله اني طحت في موقف محرج اليوم ..

مزنه : غلابلات العدو شو من الموقف قولي

الريم : شو اقولج دخلت على علي اخوية الميلس وكان عنده ربعة لا والقهر جي بدون شيله..

مزنه : خيبة وعقب علي اخوج شو سوا؟؟

الريم : انا يوم يوم شفتهم ما شردت تميت واقفة في مكاني ما حسيت غير بنفسي في الغرفة كيف؟؟ علي طبعا يرني من ايدي

مزنه : بصراحة ما اعرف اضحك وله ازعل لانه اكيد موقف يفشل واخيرا ما قدرت امنع ضحكتي وقلت للريم وانتي دومج جي ؟؟

الريم : يختي والله ما ادري بلاني كل يوم علي اخوية يسهر في الميلس ما اسير عنده إلا ولابسة شيلة بلاني اليوم ما اعرف

مزنه : خلاص نزين اللي حصل حصل بس لا تضايقي وباجر بفضحج عند قيس هههههه بخليه يضحك عليج

الريم : خيبة وانا شو خلاني اقولج الشيمة كله ولا قيس

مزنه : نزين ما بقول في حالة وحده لو نسيت اني اقوله ههههه

الريم : مب منج يالله بخليج الحين باجر وراي جامعة وقفلت المبايل وحاولت ارقد ما قدرت تميت اتخيل موقفي وانا واقفه وماسكة باب الميلس وبدون شيله وربع علي اخوي يطالعوني عقب نشيت وسرت غرفة اماية دقيت الباب

ام علي : ادخل علي

الريم : وانا افتح الباب قلت لها انا الريم مب علي

ام علي : نشيت ويلست بعد ما كنت منسدحة على الشبرية وتفاجأت الريم في غرفتي ؟

الريم : سرت ويلست يمها على الشبرية وقلت لها ما ياني رقاد

ام علي : ليش فديتج وخذتها في حضني وتميت امسح على شعرها

الريم : ما اقول لكم شكثر الشعور اللي انا احس فيه الحين حلو وشكثر انا افتقدته في حياتي حسيت اني ما ابي ارمس ولا اقول ولا كلمة بس ابي استمتع بحنان اماية اللي احس فيه في كل دقة من دقات قلبها وفي كل لمسه تمسح فيها على شعري

ام علي : خليتها حسيت انها ما تبي ترمس وانا بعد افتقدت بنتي وايد وفتقدت اني اخذها في حضني فديتج يا الريم وطبعت الحين على ايدها بوسة ..

الريم : ما ادري كم من الوقت مر وانا على ها الوضع في حضن اماية عقب قلت لها اماية

ام علي : هاه فديتج؟

الريم : ليش ما دورتي على ليش حرمتيني من حضنج الدافئ كل ها السنوات؟؟ (هذا السؤال لو تذكروا كان يدور في بالي الحين يات الفرصة المناسبة اسألة وانسى كل موضوع ثاني يت عشانه)

ام علي : انا دورت عليج يا الريم بس عمتج غيرت مكان سكنها الاولي ولانه بتقولي لي العين مب من كبرها ادري ها الشئ بس هذا اللي ما عنده شخص يمنعة انه يدور ريلى اللى تزوجته بعد ابوج كان ريال كبير في السن وانسان غني لابعد مدي ويوم تزوجني كان يعتقد انه اشتراني بفلوسة انا ما الومة بس الوم اهلى اللي فروني عليه .. ومسحت الدمعة اللي نزلت على خدي

الريم : فديتج يا اماية اثاريج انتي بعد عانيتي مب بس انا

ام علي : يالله الحمد لله على كل حال المهم انج الحين في حضني وما راح اتركج في يوم وما راح اسمح لاحد يضايقج

الريم : تميت في حضن اماية لين الصبح هي نششتني للجامعة وطبعا ما قلت لها سالفة الموقف المحرج اللي تعرضت له وسرت الجامعة بس كنت احاتي علي اخوية


يتبع