وإن مـن الشعر لـحـكمه " يُـرجى المشاركة من الجميع "

الله اكبر خالـق الارض وسمـاه=خالق الكون الفسيـح بـلا حـدود
العزيـز الـي ولا يعبـد سـواه=الجواد الـي علـى خلقـه يجـود
عقبها والشعر لـه طعـم وحـلاه=ومن يذوق ابه الحـلا لازم يعـود
ورثنا الـي قـد تورّثنـا عـلاه=المبـادئ والقيـم ورث الجـدود
يـوم اغنيبـه يشوقنـي غـنـاه=في سبات الليـل والعالـم رقـود
ومن سمع صوتي يبا يعرف صداه=والقريحـه كثـر ماتملـك تجـود
الهقـاوي فـي كبيريـن الهقـاه=ماتنكّـس دوم ترقـا فـي سنـود
والكرم ميزة كريـمً مـن صبـاه=والحَقد ما يفارق القلـب الحقـود
والكِِبر اكبـر علامـات العصـاه=والتواضع وصف رجال محَمـود
والسفيـه محشـمً لـولا لـغـاه=كان يقلطلـه علـى دلـه وعـود
والحذر والخوف لو منهـا نجـاه=ماخذ الموت الحبـارى والشـرود
والسدود اذا سكنت وسط الصفـاه=مـادرو عنهـا مبحثـة السـدود
ومن عرف تركيبة البيروغطـاه=يعرف ان خلف البياض قلوب سود
والمناهـل والتجـارب فالحـيـاه=والبشـر تاردبهـا ورد الـعـدود
والنبيه الـي يميّـز وش خطـاه=وفي سبيل المعرفه يبـذل جهـود
يترك الـي يعبـد النـاس بريـاه=ويبتعد عن ديرة النـذل الحسـود
ويتجـود فالأمـانـه والـوصـاه=ولاتقوده مغريـات النفـس قـود
وغيرهـا ثنتيـن للأنفـس غنـاه=ماقناها من الرجال الـى الفهـود
طاعة الرحمن خوفـه وارتجـاه=الإلـه الـي لـه عبـاده سجـود
وعزة النفـس العزيـزه بنتـزاه=والله انهـا مكسـبً دايـم يـزود