عز الله انه رجني حبها رج

اسعد الله اوقاتكم بكل خير
اتشرف بطرح هذه القصيدة في هذا المنتدى آمل ان تحوز على رضاكم

يا طير ياللي لك على الحوم منهج = والجو لك من بينه دروب وفجاج
بلغ سلامي لادعج العين في وج = اللي تركني فالهوا ضايعٍ داج
وقلّه ترى لك صاحبٍ منك محرج = احراج ما قبله ولا بعده احراج
قلّه يدور لي من الحب مخرج = ان كان باقي فيه مدخل ومخراج
الى متى وآنا احترق وآتوهج = واصلى لهيب الحب كني على صاج
أعيش في غربه وكربه وفي عج = ويعيش في بسطه وفي فلّة احجاج
ويبطي علّي اسنين ويغيب ويسج = ولا يفتكرني غير لا صار محتاج
لا ضاق صدره جاك عنّه يفرج = ويقول شعرك يطرب ويبهج ابهاج
واقوم اغني له على قافية اج = ويردد أبياتي على قافية آآج
واليا ذكرت انه ماغير ايتهرج = تصبح مواويلي واهازيجي ازعاج
نفسي تقلّي هج عن قربها هج = لانت استرحت ولا كسبت أجر يا حاج
لكنّ عقلي في هواها تبرمج = يسري هواها في عروقي والاوداج
عز الله انه رجني حبها رج = رج العراوي لامشت فوق بطناج
كنت اعتبر نفسي طبيبٍ معالج = واليوم ادور لي من اسبابها علاج
كني لها مدمن وهي لي مروج = لين اتلفت كل الخلايا والانساج
الله خلقها فتنة اعيون وامهج = من يوم مولدها على راسها تاج
لو شفت مبسمها ليا جات تهرج = اتجمعه ياقوت وتفرقه عاج
والرمش جيشً بالقذايف مدجج = يا بخت منهو عن نظر عينها ماج
ولا استرسل الشلال ولا تموج = ماتوصفه صوره ولا هرج هرّاج
شيٍ على طوله وشيٍ مدرّج = ليلٍ على وجهٍ كما البدر وهاج
تجهر عيون اللي عليها تفرّج = هذا وهي من دون حمره ومكياج
أثور وازعل واشجب الحب واحتج = وانظم لها الفرقا طريقه ومنهاج
ولا شفتها حتى اللسان ايتبنج = ويمحى كلام الليل مع صبح الابلاج
واعود انظم في الحلا والتغنج = واحبس بيوتي الاوله وسط الادراج

وسلامتكم
شعر: خالد ال مشرف العمري