هذي قصتي وِضحتْ

ألا ياللي تعاتبني ترا ماقوى العتب واللوم

أموت من العتب ساعة عتابك تفتح ابوابه

أنا رجلٍ تقدِّيني على دْروب الرجال اسْلوم

عوايد ربعي اهل العرف لابه من بعد لابه

أعِزّالنفس وارفعها ولاارْضى في قليل السوم

حشيمٍ عارفٍ قدْري وقدري كل ٍ ايْهابه

أنا ماقْلُطْ على السفره وانا ماني لها معزوم

لَوِِِِِِِانّ الجوع في بطني يصول امْكَشِّر انيابه

واذا كان الزمن قاسي عليّه والوفا معدوم

أنا درب الوفا دربي أعَرْفه زين وارْقابه

واذا كانك تبي تعرف وشَ اللي منه انا مهموم

أنا لي صاحبٍ ذقت المراره لحظة اغْيابه

عرفته يوم انا طفلٍ يبنّي بالخيال احْلوم

وشِفْت أجمل به أوصاف ومناظر حسن خلابه

شربت الحب من كاسه وزدت من العزوم عْزوم

طموحي آصَلِ لْقلبه مدام انّي انا اولابه

وفي غمرة غضب عارم شربنا كاسه المسموم

حصل شيٍ جديدٍ ماحسبنا وقتها حْسابه

غلطنا والغلط وارد ولافينا حدٍ معصوم

وحنا بالغلط لحظة غلطنا مارضينابه

تجاهلنا ولع قلب و غرام بداخله مرسوم

تفارقنا وضاع اللي بهالدنيا حلمنابه

ورضينا بالقدر غصبا مدام ان القدر محتوم

وكـلٍّ ساعة الفرقا تهل ادْموعه اهدابه

ومن ماصابني عقب الفراق ويومه المشئوم

غديت اغْرب غريبٍ حزنه الطاغي تروّابه

أصارع جرحي الدامي واشيل مْن الهموم اهْموم

واسلّي نفسي بحرف القصايد واتغنّابه

وهذي قصتي وِضحتْ ووَاقعها غدا مفهوم

شرحت ابْها وقائع رحلة الخافق مع احْبابه

واذا ودِّك تعاتبني ترا ماقْوى العتب واللوم

أموت من القهر ساعة عتابك تفتح ابْوابه