* حكـاية ليـل *

اجتمعنا ثم افترقنا فكانت لنا حكاية
*******

أنا وأنتي بلا ميعــــــاد حاضــنا ســـواد الليـــل
سدل ثوبه يوارينـــا وغطانــــــــــا بجلبــــــابه

وسمّانــا شموع الليل ! طلة بـدر ضي اسهيــل
بصدفة تجتمع في ليل عــانق بـــرقه اسحــابه

أثار الليـل يخدعنــــا وش اللي غيره بالحيــل
جمعنـــــا في مهب الريح ! فرّقنـا في الغــــابة

أنا كنت اتحدي الليــل وأتمنى ســبوق الخيـــل
أنا قبل أعرفـــك ماخـفت من ليـلي ولا اهابـــه

بَعْد ما ذقت طعـم الشهد ريح الورد كيف الهيل
بــدا قلبي يعـــــاندني وعقـلي تـــاه بأسبــــابه

بديت أخاف من ليلي بديت أشــوف منه الويـل
إذا قلت أنتهى ليـــل ٍ يجيني ليــــل وابــدا بــه

أشوف الليــل بعدك محتويني بين حـــط وشيل
نوى يدفن بقــايا ذكرياتي في ضمـــا ترابـــــه

سمايه غيمت والحــظ مــال وما قويت الميـــل
شــبح فرقاك لو جيت ابعـــده تنهشني أنيابــه

بحبك هائم ٍ تائه مثل غصن ٍ جـــرفه الســــيل
دروبي ضائعـة كني كفيـف ٍ ضــاع مشـعـابه

أنــــا لو تهت وألا مت لا تنسي فــداك الجيــل
فداكي قلبي المجــــروح مفتــاحه على بـــابـه

مجرد تذكريني مـرة إذا أظـــلم عليــك الليــــل
عسى قلبــك يحن بدعـوة ٍ وعلى الله الجــابـة

مادام الليل غادر وأنتي أقفيتي وفـاض الكيــل
عزمت أهيم في الدنيا غريب ٍ فـــارق أحبابه

وسلامة قلوبكم

المهنـــدسـ