اسبوع المرور الارشادي هل تحول الى اسبوع جني القسائم ؟؟

السلام عليكم ورحمة الله

في احدى نقاط التفتيش بالمنطقة وبالتحديد مساء امس الثلاثاء:10/4/1432هـ مررت بالصدفة فوجدت احد الاقارب من صغار السن وقد اوقفه رجال الامن جانبا تقدمت قليلا ثم وقف وعدت اليهم

*-وش عندكم قال العسكري يقول سيارتي منزلة من قدام .
*- الشاب الثاني يقول ما ربط الحزام .
*-شاب ثالث يقول الاستمارة مع ابوي .
*-الرابع يقول الاستمارة باسم جدي باخذ اغراض من السوق لأهلي وارجع ..
.سالت العسكري يا اخي ليش ما تشوف السيارة الاولى ماهي منزلة . قال ما ادري ذاك العسكري هو اللي قال .قلت طيب انت شف بعينك .
طبعا ملا حظة كبيرة :هو ما هو فاضي يطلع لأنه ماسك دفتر القسايم وهاتك يا كتابة .قسيمه بعد الثانية ,المهم لطش الاول بقسيمة والثاني بقسيمة والثالث بقسيمة .بقينا في الرابع كان حظه حلو كلمت العسكري اللي مسكه وجا .. وقال هذا اسبوع المرور قلت تمام بس في نظرك وشهو اسبوع المرور
قال توعية للناس .. قلت زين الكلام توعية اللي انا اشوفه انه اسبوع قسايم . ما اشوفكم ارشدتوا احد اواعطيتوا احد مطوية اونشره اواي شيء بمناسبة الاسبوع قال ما جانا شي من الادارة , يعني ما جاكم شي قلبتوها قسايم ..المهم الرجال كأنه انحرج شوي
وكان معنا واحد برضه مسكه العسكري الثاني والظاهر يعرفه هذا طالع فيه وسلم عليه ورجع له اوراقه ,ثم طالع فينا , وقال انا باخذ كلامكم ,
جلست اسولف انا والشاب هذا شوي وصاح العسكري الاول راعي القسايم وقال يا شباب ممنوع السوالف عند نقطة التفتيش علما اننا بعيد عنهم وعن الشارع .. وكان في قمة الزعل لأنه فاته قسيمة ..

ملحوظه بسيطه: احد الشباب يقول يا اخي اتق الله والله ان علي حوالي 20,000 الف ,عشرين الف قسايم من وين اسددها ..وراتبه ما يتعدى 300الآف ريال ..
برضه ملاحظه :سبقها اليوم العالمي للدفاع المدني وكانت الاجابه نفس اجابة الثاني , وصلنا شي من الادارة .اجل ليش متعبين انفسكم وصاجين الناس بسيارتكم نازلين طالعين طول الشوارع والصفارات مستمرة فوق الثلاث ساعات !!!
المهم
*- هل اصبح اسبوع المرور الارشادي اسبوع لجني القسايم ؟

*- هل اصبحت هذه الاسابيع كابوس على المواطنين ؟
*-متى يمكن ان ان تكون هذه الاسابيع واقعية حسب مفهومها العام ؟