الحقيقة

هذة قصيدة كانت في احد الشعار ونظرا لأنتشارها اوردتها لكم مستقلة لغرض الإستفادة من اراءكم

الحقيقة

الله يكفينا من اللي من المهجاع فاع
والله يكفينا من اللي يدور للخصوم

شاعر قادم على ساحة الملقا شجاع
من رجالٍ في الملازيم شيخان وقروم

مثل سيل منحدر تصطفق فيه الرصاع
لادقل من وادي مال ميراده عقوم

يحسب انه شابع يوم من حوله جياع
مادرا انه من مناهيلنا باقي محروم

مير لا وقفت له بالكلام الصدق طاع
والهدف قدام عينة وكل الرمي زوم

كل ما مدت يمينة بمد يرد صاع
لين يفطر مع هل المعرفة والا يصوم

والحقيقة واضحة ماتستر بالقناع
لازم تمشي عليها مفاهيم العموم

والعرب لامانع ان عندها حب اطلاع
مير ماتصلح شهادات من غير الختوم

انت في برد الشتاء يوم حر الصيف لاع
تتقي من الشمس لكن تصلاك السموم

ما تناظر منبر فية صوت الحق ذاع
تتكي وتقوم لاكن يمكن ماتقوم

صح لو غصت البحر تدري إن للبحر قاع
وصح لامديت نظرك تشوف اعلى الرجوم

لكن العب راس حربة وانا لك في الدفاع
وان تعاودت الخطا يمكن العب في الهجوم

والله ان الشعر ماينعسف لك بالذراع
شد حيلك وانت باقي بميقاف القدوم

السفينة ما يوجه بها غير الشراع
والبحر مايشتكي من البواخر ذي تعوم

والصداقة ذخر والمعرفة قبل الوداع
والعلوم تبين واللي على الخاطر حلوم

لو يجي بيني وبينك في المعنى نزاع
ما على وجه الحقيقة من العقال لوم

ولا يطارد حاجته في الخلا غير السباع
ولا يغرد في الفضاء كل من يقدر يحوم

قلتها واقولها كل وقت وكل ساع
واثق دام المقابل مواثيقة علوم

ماتغير وجهة الشخص كثرة الاستماع
ولاتغيره التماني ولا كثر الهموم

ولاتفرح لقمة الخبز من كانوا شباع
ولا توقف كلمة الغدر رجال عزوم

والدروب اتضيق وارض الله الباقي وساع
والنتائج تختلف من رقوم الى رقوم

والسديسة تختلف عن الثنية والرباع
والهزيلة مالها عندنا في السوق سوم

والمثايل قلتها وادري الدنيا متاع
ياحليل اللي رحل ما معة منها قسوم