يوم التعاسة

يوم التعاسة

ول يايوم التعاسة وجعلك ما تعود=وش تبي مني عسى الله لا يجزاك خير
كل ما جيت اتلاشا وتبعد من الوجود=قمت تبدي لي وتضحك معي صبح وعصير
لين قاربت المحاني وعديت الحدود=وابتديت اتغوص في غبة البحر الغزير
مادريت ان اتكالي على الرب الودود=بيده ارزاق الخلايق وتحديد المصير
التجي به واتحصن بذكره مالحسود=لو توقف خطو الأقدام من حث المسير
واتعجب في ظروف الزمن سحم وسود=كيف تاقف في طريقي وانا باقي صغير
ما استحت مني وهي تدري إن عندي جنود=تحتمي وتزوم بالطيب لاسج الضمير
من ينابيع تزود مراهيها العدود=غيلها له في حبوس الوفاء وسم وخرير
ماتوقفها العقوم الكبيرة والسدود=وما يصلها راعي الدلو بالحبل القصير
والبروق اللي تلامح وتقفاها الرعود=مايميزها العمى مثل تمييز البصير
في مزون ساقها من المناشي هب نود=لين سدت بالعطاء كل محتاج وفقير
واخضرت الأشجار منها وندى كل عود=وشمخت الأغصان فيها وميلها الثمير
واكتست كل الخمايل وزانت بالورود=واستضافت في محاضينها خير وفير
وانت يايوم التعاسة بعد تبذل جهود=ماتشوف الحق في القمة العليا منير
تتقي في حجة مالها عندك شهود=واتهددني بها وانت في وضع خطير
لكن افهمني وجنب مواهيبي وذود=لو جناح الصقر مكسور مايقدر يطير
والعيون الثاقبة بالنظر ترقا سنود=مايشتت نظرها الجور والوقت المرير
والمثايل والمعاني تراودني وفود=مالها الا اسوقها سوق مقطوع النظير
والثقة تبطي تقصر خطاويها القيود=والهموم اللي تحاول تماديني تحير
شاعر ماحن بالمعرفة قبس الزنود=وامتلك سيف على من يعاديني شطير
سيف عز في اللقاء من بريعات الحدود=ما تعيبه الندايب ولا شكل الجفير
والحكم يصغي لها العقل والفكر الشرود =والزمن باقي يروغ ويدير ويستدير
قالها اللي يحكم البدع ويعز الردود=شاعر لا ما قدم يستشير ويستخير
والمواقف تثبت الحق من عهد الجدود=يوم كان الوقت يسمع شهيقه والزفير
ما لحقنا في مواقيفنا شك ونقود=عزوة يحسب لها في الجمايل والمغير
روس قوم ابني عمر رمز طيب وساس جود=فعلنا يشهد لنا واسمنا يبقى كبير
ما تشبهنا بقوم النصارى واليهود=عزنا الله بأمن الايمان والدين اليسير
والقبايل قدرهم ما ينقص والبدود=بلغوهم ياهل العرف مضمون الذمير
واسمحوا القلب المعنا على مبنى القصود=ما ظهر من جوفه الا قليل من كثير
والختام انهي بيوتي على حسب البنود=واتحصن لا يترجم مغازيها الخبير